លោកស៊ី ជីនពីង៖ចិន និងអាស៊ីកណ្តាលត្រូវបង្កើនកិច្ចសហប្រតិបត្តិការរវាងគ្នាឲ្យបានពេញទំហឹងនៅលើគ្រប់វិស័យ
ថ្ងៃសុក្រ ទី១៩ ឧសភានេះជាថ្ងៃទី២ និងជាថ្ងៃចុងក្រោយនៃកិច្ចប្រជុំកំពូលចិន អាស៊ីកណ្តាលរៀបចំក្នុងទីក្រុងស៊ីអាន ប្រទេសចិន។ ក្រុមប្រទេសអាស៊ីកណ្តាលដែលបានចូលរួមសុទ្ធសឹងជាអតីតសហភាពសូវៀត គឺកាហ្សាក់ស្ថាន កៀហ្ស៊ីស៊ីស្ថាន តាហ្ស៊ីគីស្ថាន តួកមេនីស្ថាន និងអ៊ូសបេគីស្ថាន។ ក្រោយការដួលរលំសហភាពសូវៀតក្នុងឆ្នាំ ១៩៩១ ប្រទេសទាំង ៥ បានទទួលឯករាជ្យ និងបានភ្ជាប់ការទូតជាមួយចិនក្នុងឆ្នាំ ១៩៩២។ តែនេះជាលើកទី១ ដែលចិនបានរៀបចំឲ្យមានកិច្ចប្រជុំកំពូលចិន អាស៊ីកណ្តាលក្នុងឆ្នាំ ២០២៣ នេះ។
ចុះផ្សាយនៅថ្ងៃ៖
ស្តាប់ - ០២:២៩
នៅក្នុងកិច្ចប្រជុំកំពូលមិនធ្លាប់មានរវាងចិន និងអាស៊ីកណ្តាល ប្រធានាធិបតីចិនលោកស៊ី ជីនពីងបានជំរុញឲ្យចិន និងប្រទេសអាស៊ីកណ្តាលទាំង ៥ប្រទេសរួមដៃបង្កើនកិច្ចសហប្រតិបត្តិការរវាងគ្នាឲ្យបានពេញទំហឹងនៅលើគ្រប់វិស័យទាំងអស់។ ក្រៅពីវិស័យពាណិជ្ជកម្ម សេដ្ឋកិច្ច ឧស្សាហកម្ម ថាមពល និងដឹកជញ្ជូនដែលសុទ្ធសឹងជាវិស័យដែលបាន និងកំពុងធ្វើស្រាប់ លោកស៊ីបានស្នើឲ្យបន្ថែមនូវកិច្ចសហប្រតិបត្តិការក្នុងវិស័យថ្មីផ្សេងទៀត ដូចយ៉ាងហិរញ្ញវត្ថុ កសិកម្ម សុខាភិបាល ឌីជីថល ការកាត់បន្ថយឧស្ម័នផ្ទះកញ្ចក់ ឬមួយការកាត់បន្ថយភាពក្រីក្រ។
ទន្ទឹមគ្នានេះ លោកស៊ីក៏បានគូសបញ្ជាក់ពីភាពចាំបាច់ក្នុងការពង្រីកកិច្ចសហប្រតិបត្តិការនៅក្នុងវិស័យសន្តិសុខដើម្បីប្រឆាំងនឹងអ្វីដែលក្រុងប៉េកាំងចាត់ទុកជាមេរោគ ៣ ប្រចាំតំបន់ គឺការផ្តាច់ទឹកដីនិយម ភេរវនិយម និងជ្រុលនិយម។ បន្ទាប់មក លោកស៊ីបានអំពាវនាវឲ្យប្រឆាំងទប់នឹងការលូកដៃរបស់បរទេសចូលកិច្ចការផ្ទៃក្នុងរបស់ប្រទេសនៅក្នុងតំបន់ និងការព្យាយាមបំផុសបំផុលឲ្យមានបដិវត្តពណ៌។ តាមប្រធានាធិបតីចិន អាស៊ីកណ្តាល និងចិនគួរតែពង្រឹងទំនុកចិត្តគ្នាជាយុទ្ធសាស្ត្រឲ្យបានស៊ីជម្រៅដើម្បីរក្សាមិត្តភាពជាអមតៈ ហើយដើម្បីបញ្ជាក់ពីសក្ខីភាពមួយនេះ លោកស៊ីបានសន្យាផ្តល់លុយឲ្យតំបន់ចំនួន ៣ ៧០០លានដុល្លារ។
គួរបញ្ជាក់ថា ពាណិជ្ជកម្មរបស់ចិនជាមួយ ៥ប្រទេសអាស៊ីកណ្តាលមានទឹកប្រាក់ ៧០ ០០០លានដុល្លារក្នុងឆ្នាំ ២០២២ និងបានហាក់ឡើងចំនួន ២២% នៅត្រីមាសទី១ ឆ្នាំ ២០២៣។ ទន្ទឹមនឹងដៃគូពាណិជ្ជកម្មដ៏សំខាន់របស់ចិន ប្រទេសទាំងនេះក៏ជាទីកន្លែងមួយដ៏សំខាន់នៃគម្រោងខ្សែក្រវ៉ាត់ និងផ្លូវរបស់ចិនដែរ។ តែអ្វីដែលគ្មានអ្នកណាមើលរំលងបាននោះគឺថា ឥទ្ធិពលរបស់ចិននៅក្នុងបណ្តាប្រទេសអតីតសាធារណរដ្ឋសហភាពសូវៀតនឹងមានកាន់តែខ្លាំង ខណៈដែលរុស្ស៊ីកំពុងជាប់ដៃនៅក្នុងសង្រ្គាមអ៊ុយក្រែន។ នេះមិនមែនជាត្រីងៀតឆ្លៀតពងទេ តែជាឱកាស។ បន្ទាប់ពីកិច្ចប្រជុំកំពូលលើកទី១ លោកស៊ី ជីនពីងបានប្រាប់ឲ្យដឹងពីការជួបជុំគ្នាជាថ្មីនៅឆ្នាំ ២០២៥ ក្នុងប្រទេសកាហ្សាក់ស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ