អឺរ៉ុបចង់ពង្រឹងទំនាក់ទំនងជាមួយអាស៊ីកណ្តាល ខណៈដែលរុស្ស៊ីកំពុងជាប់ដៃនៅអ៊ុយក្រែន
នៅថ្ងៃសុក្រ ទី២ មិថុនា ប្រទេសកៀហ្ស៊ីស៊ីស្ថានធ្វើជាម្ចាស់ផ្ទះរៀបចំកិច្ចប្រជុំកំពូលអឺរ៉ុប អាស៊ីកណ្តាល។ ប្រធានក្រុមប្រឹក្សាអឺរ៉ុបលោកស្ហាល មីស្ហែលបានចូលរួមប្រជុំជាមួយថ្នាក់ដឹកនាំរបស់៥ប្រទេសនៅអាស៊ីកណ្តាល គឺកាហ្សាក់ស្ថាន កៀហ្ស៊ីស៊ីស្ថាន តាហ្ស៊ីគីស្ថាន តួកមេនីស្ថាន និងអូសបេគីស្ថាន។ នេះជាកិច្ចប្រជុំកំពូលអឺរ៉ុប អាស៊ីកណ្តាលលើកទី២ ក្រោយពីបានរៀបចំលើកទី១ កាលពីខែតុលា ឆ្នាំ ២០២២ ក្នុងប្រទេសកាហ្សាក់ស្ថាន។ មួយវិញទៀត កិច្ចប្រជុំកំពូលអឺរ៉ុប អាស៊ីកណ្តាលលើកទី២ រៀបចំឡើងនៅក្រោយកិច្ចប្រជុំកំពូលចិន អាស៊ីកណ្តាល។
ចុះផ្សាយនៅថ្ងៃ៖
ស្តាប់ - ០២:០៨
ខុសពីចិនដែលបានកោះហៅមេដឹកនាំអាស៊ីកណ្តាលទៅប្រជុំក្នុងក្រុងប៉េកាំងកាលពី ២សប្តាហ៍មុន អឺរ៉ុបបានរៀបចំកិច្ចប្រជុំកំពូលនេះនៅក្នុងទឹកដីអាស៊ីកណ្តាលតែម្តង។ ថ្លែងនៅក្នុងពិធីបើកសម័យប្រជុំពេញអង្គជាផ្លូវការ ប្រធានក្រុមប្រឹក្សាអឺរ៉ុបលោកស្ហាល មីស្ហែលបានទាមទារឲ្យពង្រឹងទំនាក់ទំនងរវាងសហភាពអឺរ៉ុប និងអាស៊ីកណ្តាល។ ចំណែកប្រធានាធិបតីកៀហ្ស៊ីស៊ីស្ថានលោកសាឌៀរ យ៉ាប៉ារ៉ូវបានអំពាវនាវឲ្យលោកស្ហាល មីស្ហែលយកអាស៊ីកណ្តាលធ្វើជាលំហភូមិសាស្រ្តសេដ្ឋកិច្ចរួបរួមដើម្បីសម្រួលដល់គ្រប់ទម្រង់ខុសៗគ្នានៃកិច្ចសហប្រតិបត្តិការ។
ការអំពាវនាវនេះក៏ទទួលបានការចែករំលែកពីប្រធានាធិបតីអូសបេគីស្ថានដែរ។ ចំណែកមេដឹកនាំតាហ្ស៊ីគីស្ថានបានគូសបញ្ជាក់ពីភាពចាំបាច់សម្រាប់ប្រទេសតាហ្ស៊ីគីស្ថានក្នុងការទទួលបានអត្ថប្រយោជន៍ពីប្រព័ន្ធពាណិជ្ជកម្មអនុគ្រោះជាមួយសហភាពអឺរ៉ុប។ ដោយឡែក ប្រធានាធិបតីកាហ្សាក់ស្ថានដែលប្រទេសជាដៃគូសេដ្ឋកិច្ចដ៏សំខាន់របស់សហភាពអឺរ៉ុបនៅក្នុងតំបន់បានធានាថា លោកចង់បង្កើនការនាំប្រេងទៅកាន់អឺរ៉ុបតាមសមុទ្រកាសព្យែនតាមបំពង់បង្ហូរប្រេងដោយគេចទឹកដីរុស្ស៊ី។
គួរបញ្ជាក់ថា ក្រៅពីជាអ្នកផ្តល់ជំនួយឲ្យអាស៊ីកណ្តាលក្នុងទឹកប្រាក់ ១ ១០០លានអឺរ៉ូចន្លោះឆ្នាំ ២០១៤ និង ២០២០ សហភាពអឺរ៉ុបក៏ដៃគូវិនិយោគសំខាន់ទី១ របស់អាស៊ីកណ្តាលដែរ។ ដៃគូវិនិយោគនេះនឹងមានសន្ទុះឡើងថែមទៀតក្នុងពេលដែលរុស្ស៊ីកំពុងជាប់ដៃ និងអូសជើងនៅក្នុងសង្រ្គាមអ៊ុយក្រែន។ តែក្នុងពេលជាមួយគ្នា មហាអំណាចផ្សេងក៏មិនបានមើលរំលងឱកាសមួយនេះដែរ ពិសេសប្រទេសចិន។ យ៉ាងណាក៏ដោយ ទោះបីជាបណ្តាប្រទេសអាស៊ីកណ្តាលបានបង្ហាញពីឆន្ទៈក្នុងការអនុវត្តន៍នូវនយោបាយការបរទេសពហុវ៉ិចទ័រក៏ដោយក៏ប្រទេសទាំងនេះនៅតែមានចំណងទាក់ទងយ៉ាងជិតស្និទ្ធជាមួយរុស្ស៊ីដែលជាមហាអំណាចក្នុងតំបន់ជាប្រវត្តិសាស្រ្តតាមរយៈសម្ព័ន្ធភាពយោធា សេដ្ឋកិច្ច និងវប្បធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ