ប្រទេសចិន និងអាមេរិកបានចូលរួមសមយុទ្ធផ្លូវសមុទ្ររៀបចំដោយប្រទេសឥណ្ឌូណេស៊ី
ចាប់ពីថ្ងៃចន្ទ ទី៥ ដល់ថ្ងៃព្រហស្បតិ៍ ទី៨ មិថុនា ប្រទេសឥណ្ឌូណេស៊ីធ្វើជាម្ចាស់ផ្ទះរៀបចំសមយុទ្ធផ្លូវសមុទ្រអន្តរជាតិនៅកោះស៊ូឡាវេស៊ីស្ថិតប៉ែកខាងកើតប្រទេស។ សមយុទ្ធពហុភាគីផ្លូវសមុទ្រក្រោមឈ្មោះ « Komodo » មានការចូលរួមពី១៧ប្រទេស ពិសេសអាមេរិក ចិន និងរុស្ស៊ី។ តែអ្នកនំាពាក្យកងទ័ពជើងទឹកឥណ្ឌូណេស៊ីបានពន្យល់ថា សមយុទ្ធ « Komodo » មិនមែនជាការហ្វឹកហ្វឺនសង្រ្គាមទេ តែជាការផ្តល់អាទិភាពឲ្យកិច្ចសហប្រតិបត្តិការផ្លូវសមុទ្រនៅក្នុងតំបន់។
ចុះផ្សាយនៅថ្ងៃ៖
ស្តាប់ - ០១:៤៧
វត្តមានរួមគ្នារបស់អាមេរិក និងចិននៅក្នុងសមយុទ្ធពហុភាគីរៀបចំដោយឥណ្ឌូណេស៊ីពេលនេះជារឿងកម្រដែលគេមិនធ្លាប់បានឃើញ។ ជារឿងកម្រព្រោះមហាអំណាចទាំងពីរកំពុងបន្តប៉ះទង្គិចគ្នានៅក្នុងវិស័យយោធា ការទូត បច្ចេកវិទ្យា និងវិស័យសេដ្ឋកិច្ច។ មួយវិញទៀត អាមេរិកក៏បានបង្កើនវត្តមានរបស់ខ្លួននៅក្នុងតំបន់អាស៊ីប៉ាស៊ីហ្វិកដើម្បីប្រឆាំងនឹងឥទ្ធិពលរបស់ចិននៅក្នុងតំបន់ ពិសេសសមយុទ្ធដែលចិនបានរៀបចំច្រើនដងនៅជុំវិញកោះតៃវ៉ាន់។ តែទោះជាយ៉ាងនេះក្តី គូប្រជែងទាំងពីរបានយល់ព្រមបញ្ជូននាវាចម្បាំងទៅចូលរួមសមយុទ្ធ « Komodo » ដែលរៀបចំដោយឥណ្ឌូណេស៊ី។
ក្រៅពីអាមេរិក និងចិន រុស្ស៊ី និងអូស្រ្តាលីក៏បានបញ្ជូននាវាចម្បាំងរបស់ខ្លួនទៅចូលរួមដែរ។ យោងតាមរដ្ឋអំណាចឥណ្ឌូណេស៊ី មាននាវាចម្បាំងបរទេសសរុបចំនួន ១៧គ្រឿងបានចូលរួមនៅក្នុងសមយុទ្ធ « Komodo » ហើយឥណ្ឌូណេស៊ីតែម្នាក់ឯងបានបញ្ជូនប្រមាណជា ២០គ្រឿង។ អ្នកនាំពាក្យកងទ័ពជើងទឹកឥណ្ឌូណេស៊ីបានពន្យល់ថា សមយុទ្ធ « Komodo » មិនមែនជាការហ្វឹកហ្វឺនសង្រ្គាមទេ តែជាសមយុទ្ធដែលឲ្យអាទិភាពលើកិច្ចសហប្រតិបត្តិការផ្លូវសមុទ្រនៅក្នុងតំបន់។
សម្រាប់អាមេរិក អ្នកនាំពាក្យស្ថានទូតប្រចាំឥណ្ឌូណេស៊ីបានថ្លែងប្រាប់ AFP កាលពីថ្ងៃអាទិត្យ ទី៤ មិថុនាថា សមយុទ្ធ « Komodo » នឹងអនុញ្ញាតឲ្យអាមេរិកចូលរួមជាមួយបណ្តាប្រទេសដែលមានគោលដៅដូចសម្ព័ន្ធមិត្ត និងដៃគូរបស់អាមេរិកដើម្បីសហការលើបញ្ហាប្រឈមរួម ដូចយ៉ាងបេសកកម្មមនុស្សធម៌ និងការឆ្លើយតបទៅនឹងគ្រោះមហន្តរាយធម្មជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ