បង្ហូរទឹកនៅហ្វូគូស្ហ៊ីម៉ា៖ ចិនប្រកាសរឹតបន្តឹងការត្រួតពិនិត្យផលិតផលចំណីអាហារមកពីជប៉ុន
អាជ្ញាធរគយចិនបានចេញសេចក្តីប្រកាសនៅថ្ងៃសុក្រនេះថា ខ្លួននឹងបង្កើនការរឹតបន្តឹងការនាំចូលផលិតផលចំណីអាហារពីប្រទេស នៅបន្ទាប់ពីជប៉ុនគ្រោងបញ្ចេញ បង្ហូរទឹកពីមជ្ឈមណ្ឌលនុយក្លេអ៊ែរនៅហ្វូគូស្ហ៊ីម៉ាទៅក្នុងទឹកសមុទ្រ។ កាលពីថ្ងៃអង្គារ ទីភ្នាក់ងារថាមពលនុយក្លេអ៊ែរអន្តរជាតិ AIEA បានបើកភ្លើងខៀវឲ្យរដ្ឋាភិបាលជប៉ុនបង្ហូរទឹកកាកសំណល់ពីមជ្ឈមណ្ឌលនុយក្លេអ៊ែរនៅក្នុងហេតុផលថា ផែនការរបស់រដ្ឋាភិបាលជប៉ុនក្នុងការត្រៀមបង្ហូរទឹកនៅហ៊្វូគូស្ហ៊ីម៉ាទៅក្នុងសមុទ្របានគោរពត្រឹមត្រូវតាមនិយាមសុវត្ថិភាពអន្តរជាតិ។ រដ្ឋាភិបាលកូរ៉េខាងត្បូងដែលធ្លាប់បារម្ភពីបញ្ហាសុវត្ថិភាព បាននិយាយនៅថ្ងៃសុក្រនេះថា កូរ៉េខាងត្បូងមិនប្រឆាំងនឹងគម្រោងបង្ហូរទឹកកាកសំណល់ចេញពីរោងចក្រនុយក្លេអ៊ែរហ្វូគូស្ហ៊ីម៉ាទៅក្នុងទឹកសមុទ្រ។
ចុះផ្សាយនៅថ្ងៃ៖
ស្តាប់ - ០២:៤៦
គម្រោងជប៉ុនបង្ហូរទឹកកាកសំណល់ចេញពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាទៅក្នុងសមុទ្របានបង្កឲ្យមតិប្រឆាំងពី ប្រទេសចិន កូរ៉េខាងត្បូង និងសហគមន៍អ្នកនេសាទជប៉ុននៅហ៊្វូគូស្ហ៊ីម៉ា។ ប៉ុន្តែ នៅថ្ងៃសុក្រនេះ រដ្ឋាភិបាលកូរ៉េខាងត្បូងអះអាងថា ទៅតាមការសិក្សារបស់ខ្លួនកាលពីខែឧសភា និងដោយយោងទៅលើទិន្នន័យរបាយការណ៍របស់ទីភ្នាក់ងារថាមពលនុយក្លេអ៊ែរអន្តរជាតិ AIEA កូរ៉េខាងត្បូងយល់ស្របជាមួយរបាយការណ៍របស់ទីភ្នាក់ងារAIEAដែលជឿថា គម្រោងបង្ហូរទឹករបស់រដ្ឋាភិបាលជប៉ុន ចេញពីរោងចក្រនុយក្លេអ៊ែរហ្វូគូស៊្ហីម៉ាទៅក្នុងទឹកសមុទ្រធ្វើឡើងដោយគោរពតាមនិយាមសុវត្ថិភាពអន្តរជាតិ។
ចិនឯណោះវិញតាមរយៈក្រសួងការបរទេស ដែលដំឡើងសំឡេងប្រឆាំងខ្លាំងតាំងពីដំបូងទី បាននិយាយថា របាយការណ៍របស់ទីភ្នាក់ងារ AIEAមិនអាចត្រូវគេយកទៅប្រើធ្វើជាភ្លើងខៀវអនុញ្ញាតឲ្យគេបង្ហូរទឹកចេញពីរោងចក្រនុយក្លេអ៊ែរនៅហ្វូគូស្ហ៊ីម៉ាទៅក្នុងទឹកសមុទ្រ។
ដោយព្រមានពីគ្រោះថ្នាក់សារធាតុសកម្មទៅលើសុខភាពមនុស្ស និងក្នុងហេតុផលសន្តិសុខជាតិ អាជ្ញាធរគយចិនបានប្រកាសនៅថ្ងៃសុក្រនេះថា អាជ្ញាធរនឹងចាត់វិធានតាមដានខ្ពស់ ដូចជា បន្តហាមការនាំចូលផលិតផលចំណីអាហារមកពីតំបន់ចំនួន១០របស់ជប៉ុន ជាពិសេសហ្វូគូស្ហ៊ីម៉ាដែលចិនបានអនុវត្ត១២ឆ្នាំមកហើយ តាំងពីឆ្នាំ ២០១១ដែលមានគ្រោះថ្នាក់ផ្ទុះឆេះរោងចក្រនុយក្លេអ៊ែរនៅហ្វូគូស្ហ៊ីម៉ា។ ជាមួយវិធានការលើកនេះ អាជ្ញាធរគយចិននឹងបង្កើនការត្រួតពិនិត្យរកសារធាតុវិទ្យុសកម្មលើផលិតផលចំណីអាហារដែលមានប្រភពចេញមកពីតំបន់ផ្សេងៗទៀតរបស់ជប៉ុន។ អាជ្ញាធរគយចិនមិនបានបញ្ជាក់ប្រភេទទំនិញ និងតំបន់ដែលអាចជាប់ក្នុងបញ្ជីខ្មៅរបស់ខ្លួន ប៉ុន្តែមន្រ្តីជប៉ុនកំពុងបារម្ភថា ចិនដែលជាអ្នកទិញគ្រឿងសមុទ្រច្រើនជាងគេរបស់ជប៉ុន នឹងអាចឈប់ទិញគ្រឿងសមុទ្រជប៉ុន បន្ទាប់ពីជប៉ុនចាប់ផ្តើមបង្ហូរទឹកកាកសំណល់ចេញពីរោងចក្រនុយក្លេអ៊ែរហ្វូគូស៊្ហីម៉ាទៅក្នុងទឹកសមុទ្រ ដែលរដ្ឋាភិបាលជប៉ុនគ្រោងធ្វើចាប់ពីរដូវក្តៅឆ្នាំ២០២៣។
នៅក្រោយភ្លើងខៀវរបស់ទីភ្នាក់ងារថាមពលនុយក្លេអ៊ែរអន្តរជាតិ អាជ្ញាធរគ្រប់គ្រងនុយក្លេអ៊ែរជប៉ុនបានសម្រេចនៅថ្ងៃសុក្រនេះ អនុញ្ញាតឲ្យក្រុមហ៊ុនអគ្គិសនីជប៉ុនតិបកូTepco បង្ហូរទឹករាប់លានតោនចេញពីរោងចក្រនុយក្លេអ៊ែរទៅក្នុងទឹកសមុទ្រ។
តាមគម្រោង ទឹកកាកសំណល់ប្រមាណ ១លាន៣សែនតោន ដែលយកចេញពីអាងបន្ថយកំដៅម៉ាស៊ីនប្រតិករ (រ៉េអាក់ទ័រ) នុយក្លេអ៊ែរ ឬជាទឹកភ្លៀង ទឹកក្រោមដីនៅទីតាំងមជ្ឈមណ្ឌល ត្រូវក្រុមហ៊ុនតិបកូបានប្រើប្រាស់ប្រព័ន្ធALPS ដើម្បីដកយកចេញសារធាតុវិទ្យុសកម្ម ដោយនៅសល់តែសារធាតុទ្រីត្យូម។ មានវត្តមានផ្ទាល់នៅរោងចក្រនុយក្លេអ៊ែរហ្វូគូស៊្ហីម៉ា កាលពីថ្ងៃព្រហស្បតិ៍ម្សិលមិញ នាយកទីភ្នាក់ងារ AIEA លោករ៉ាហ្វាអ៊ែល ហ្រ្គោស៊ី បញ្ជាក់សាជាថ្មីថា ទឹកដែលត្រូវបង្ហូរទៅក្នុងសមុទ្រគ្មានផលប៉ះពាល់ដល់មនុស្ស និងបរិស្ថាន ព្រោះថា ទឹកទាំងនោះនឹងត្រូវយកទៅបន្សុត បំបែកយកសារធាតុវិទ្យុសកម្មដែលគ្រោះថ្នាក់ចេញសិន មុននឹងត្រូវបង្ហូរចូលបន្តិចម្តងៗទៅក្នុងសមុទ្រ ក្នុងរយៈពេលជាច្រើនឆ្នាំ។ មន្រ្តីរបស់ទីភ្នាក់ងារ AIEAទៀតសោតនឹងនៅ ប្រចាំការជាប់នៅរោងចក្រហ្វូគូស្ហ៊ីម៉ា ដើម្បីតាមដានរាល់ពេលដែលក្រុមហ៊ុនតិបកូចាក់បង្ហូរទឹកចេញពីរោងចក្រហ្វូគូស្ហ៊ីម៉ាទៅក្នុងសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ