ប្រេសិតពិសេសអាមេរិកទទួលបន្ទុកអាកាសធាតុបំពេញទស្សនកិច្ចលើកទី៣ នៅចិន
នៅថ្ងៃអាទិត្យ ទី១៦ កក្កដា ប្រេសិតអាមេរិកទទួលបន្ទុកសំណុំរឿងអាកាសធាតុលោកចន ឃ៊ែរីផ្តើមទស្សនកិច្ចនៅក្នុងប្រទេសចិន និងត្រូវស្ថិតនៅទីនោះរហូតដល់ថ្ងៃពុធ ទី១៩ កក្កដា។ កម្មវត្ថុ និងមហិច្ឆតារបស់លោកចន ឃ៊ែរី គឺបន្តកិច្ចសន្ទនាជាមួយចិនស្តីពីបញ្ហាអាកាសធាតុ។ កិច្ចសន្ទនាមួយនេះត្រូវបានផ្អាកតាំងពីខែសីហា ឆ្នាំ ២០២២។ គួរបញ្ជាក់ថា តាំងពីទទួលបានតំណែងជាប្រេសិតអាមេរិកទទួលបន្ទុកអាកាសធាតុ នេះជាលើកទី៣ ហើយដែលលោកចន ឃ៊ែរីបានធ្វើដំណើរទៅចិន។
ចុះផ្សាយនៅថ្ងៃ៖
ស្តាប់ - ០២:០០
វត្តមានរបស់ប្រេសិតអាមេរិកទទួលបន្ទុកអាកាសធាតុលោកចន ឃ៊ែរីនៅចិនពេលនេះបានធ្វើឡើង ចំពេលដែលផែនដីកំពុងទទួលរងផលវិបាកពីការប្រែប្រួលអាកាសធាតុជាមួយនឹងរលកកម្តៅនៅតាមតំបន់ជាច្រើនក្នុងលោក។ សូម្បីតែចិនខ្លួនឯងក៏បានរងគ្រោះដែរ ព្រោះតាំងពីប៉ុន្មានសប្តាហ៍កន្លងទៅនេះ ក្រុងប៉េកាំងបានស្គាល់សីតុណ្ហភាពក្នុងរង្វង់ ៤០អង្សារ។ គួរបញ្ជាក់ថា ក្នុងនាមជាអ្នកបំពុលផែនដីខ្លាំងជាងគេ អាមេរិក និងចិនដែលជាមហាអំណាចសេដ្ឋកិច្ចលំដាប់ទី១ និងទី២ ក្នុងលោកបានខកខានមិនបានជួបនិយាយគ្នារឿងអាកាសធាតុតាំងពីខែសីហា ឆ្នាំ ២០២២ មកម្ល៉េះ។
ក្នុងខែសីហា ឆ្នាំ ២០២២ ចិនបានព្យួរកិច្ចសន្ទនារឿងអាកាសធាតុជាមួយអាមេរិកដើម្បីប្រឆាំងនឹងទស្សនកិច្ចនៅតៃវ៉ាន់របស់លោកស្រីណាន់ស៊ី ប៉េឡូស៊ីដែលពេលនោះជាប្រធានសភាអាមេរិក។ តែឥឡូវនេះ បរិយាកាសហាក់ដូចជាធូរស្រាលបន្តិច ពិសេសតាំងពីក្រោយមានទស្សនកិច្ចបន្តបន្ទាប់របស់ថ្នាក់ដឹកនាំអាមេរិកនៅចិន។ បន្ទាប់ពីទស្សនកិច្ចរបស់ប្រមុខការទូតអាមេរិកលោកអង់តូនី ប៊្លីនកិនក្នុងខែមិថុនា រដ្ឋមន្រ្តីហិរញ្ញវត្ថុអាមេរិកលោកស្រីចានែត យេលែនបានទៅចិនក្នុងខែកក្កដា និងបន្តដោយលោកចន ឃ៊ែរីពេលនេះ។
រដ្ឋបាលអាមេរិករបស់ប្រធានាធិបតីលោកចូ បៃដិនយល់ថា អាកាសធាតុជាវិស័យមួយដែលមហាអំណាចទាំងពីរអាចសហការគ្នាដោយរលូន។ អ្វីដែលលោកចន ឃ៊ែរីត្រូវលើកទៅជជែកជាមួយចិនរួមមាន បង្កើនមហិច្ឆតានៅក្នុងយុទ្ធនាការប្រឆាំងនឹងការប្រែប្រួលអាកាសធាតុ ការអនុវត្តន៍នូវបទប្បញ្ញត្តិស្តីពីអាកាសធាតុ និងប្រឹងប្រែងជំរុញឲ្យសន្និសីទអន្តរជាតិស្តីពីអាកាសធាតុ COP២៨ ដែលគ្រោងរៀបចំនៅក្នុងប្រទេសអេមីរ៉ាតអារ៉ាប់រួមនាដំណាច់ឆ្នាំ ២០២៣ ទទួលបានជោគជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ