ថៃ៖ លោក ភិថា លាឈប់ពីតំណែងមេដឹកនាំបក្សប្រឆាំង តែសន្យាបន្តជ្រោមជ្រែងគណបក្សកាវក្លៃ
«ខ្ញុំសូមប្រកាសលាឈប់ពីប្រធានគណបក្សប្រឆាំង កាវក្លៃ ដើម្បីនឹងបើកផ្លូវឲ្យអ្នកតំណាងរាស្ត្រម្នាក់ផ្សេង ដែលអាចមានសិទ្ធិបញ្ចេញមតិបាននៅរដ្ឋសភាផង និងធ្វើជាប្រធានបក្ស ប្រឆាំង បានផង»។ នេះជាការប្រកាសផ្លូវការរបស់ លោក ភិថា លីមចៈរើនរ៉ាត់ ក្នុងហ្វេសបុក។
ចុះផ្សាយនៅថ្ងៃ៖
ស្តាប់ - ០២:៤៨
តាមច្បាប់ជាធរមាននៅស្រុកសៀម តួនាទីប្រធានបក្សប្រឆាំង គឺត្រូវជាសមាជិករដ្ឋសភា។ បេក្ខភាពសមាជិករដ្ឋសភារបស់លោក ភិថា ត្រូវ ព្យួរចោល ព្រោះតែជាប់បណ្តឹងជាច្រើន នៅក្រុមប្រឹក្សារដ្ឋធម្មនុញ្ញ។
ការលាចុះពីតំណែងប្រធានបក្សប្រឆាំង នៅពេលនេះ ត្រូវគេមើលឃើញច្បាស់ថា ដើម្បីសម្រួលភាពជាប់ឃាំងនយោបាយ ពីព្រោះតែលោក ភិថា ជាប់បណ្តឹងតាមផ្លូវច្បាប់។ បណ្តឹងសំខាន់ៗ ទី១ ជុំវិញក្រុមហ៊ុនសារព័ត៌មាន ដែលបើតាមច្បាប់ថៃ ហាមឃាត់មិនឲ្យអ្នកតំណាងរាស្ត្រលូកដៃពាក់ព័ន្ធរកស៊ី ឬធ្វើជាម្ចាស់ក្រុមហ៊ុនកាសែត ទេ។ ទី២ រូបលោកក៏ជាប់បណ្តឹងចោទប្រកាន់១ទៀត ជុំវិញគម្រោងការផ្តួលរំលំរបបរាជានិយម។
នៅខែឧសភា គណបក្សកាវក្លៃ បានឈ្នះសំឡេងឆ្នោត ច្រើនជាងគេ ក៏ប៉ុន្តែ លោក ភិថា ត្រូវពួកយោធារបបសឹក និងក្រុមអ្នកអភិរក្សនិយម រារាំងប៉ែងជើង មិនឲ្យឡើងអង្គុយកៅអីនាយករដ្ឋមន្ត្រីថៃ។ នេះក៏ព្រោះតែ បន្ទាត់នយោបាយរបស់លោក ប៉ះពាល់គេឯងច្រើនពេក គឺ កែទម្រង់ស៊ីជម្រៅជ្រៅ ខ្លាំង រហូតពាក់ព័ន្ធនឹងរបបរាជានិយម និងប៉ះច្បាប់ប្រមាថព្រះចេស្តាព្រះរាជា ផង។
ទោះបីជាប្រកាសលាឈប់ពីមុខតំណែងមេដឹកនាំបក្សប្រឆាំងក្តី តែលោក ភិថា សន្យានៅបន្តជីវិតនយោបាយ និងធ្វើសកម្មភាពផ្សេងៗដើម្បីជ្រោមជ្រែងគណបក្សកាវក្លៃ។ អ្នកនយោបាយវ័យ ៤៣ ឆ្នាំរូបនេះ បានសូមឲ្យអ្នកគាំទ្ររបស់ខ្លួន ទៅប្រមូលផ្តុំជុំគ្នា នៅកណ្តាលរាជធានីបាំងកក នាថ្ងៃទី២៤កញ្ញា ខាងមុខ ដើម្បីនឹងសម្រេចជ្រើសរើសមេដឹកនាំបក្សប្រឆាំង ថ្មី។
នេះក៏ស្តែងឲ្យឃើញជាថ្មីទៀតអំពីការផ្លាស់ប្តូរវេនគ្នាដឹកនាំគណបក្សយ៉ាងរលូននៅថៃ។ នយោបាយវិទូសៀម សាស្ត្រាចារ្យ Thitinan Pongsudhirak នៅសកលវិទ្យាល័យ Chulalongkorn បានវិភាគប្រាប់ទីភ្នាក់ងារព័ត៌មានបារាំង AFP ថា គណបក្សកាវក្លៃ មិនឈរឱបជើងប្រមូលផ្តុំជុំវិញតែបុគ្គលម្នាក់នោះទេ ប៉ុន្តែពួកគេរួមសាមគ្គីគ្នា ឈរនៅលើឧត្តមគតិ កែទម្រង់ផ្លាស់ប្តូរ ដើម្បីភាពទំនើបជឿនលឿនរបស់ស្រុកថៃ។ ពោលគឺ មិនបុគ្គលនិយម តែ ជាតិនិយម ក្នុងន័យប្រយោជន៍ជាតិរួមជាធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ