G៧ ចង្អុលមុខរុស្ស៊ី និងចិនពីបទបានរំលោភបំពានលើច្បាប់ពាណិជ្ជកម្មអន្តរជាតិ
ថ្ងៃអាទិត្យ ទី២៩ តុលាជាថ្ងៃទី២ និងជាថ្ងៃចុងក្រោយនៃកិច្ចប្រជុំថ្នាក់រដ្ឋមន្រ្តីពាណិជ្ជកម្មនៃក្រុមប្រទេស G៧ ក្នុងក្រុងអូសាកា ប្រទេសជប៉ុន។ នៅក្នុងកិច្ចប្រជុំរយៈពេល ២ថ្ងៃ G៧ បានលើកយកប្រធានបទជាច្រើនទៅជជែក ក្នុងនោះក៏បានសម្តែងក្តីបារម្ភពីស្ថានភាពនៅតំបន់ដើមបូព៌ា ពិសេសផលវិបាកកើតចេញពីសង្រ្គាមរវាងអ៊ីស្រាអែល និងចលនាប៉ាឡេស្ទីនហាម៉ាសដែរ។
ចុះផ្សាយនៅថ្ងៃ៖
ស្តាប់ - ០២:៤៩
នៅក្នុងទំនាក់ទំនងពាណិជ្ជកម្មអន្តរជាតិត្រូវបាន G៧ គូសបញ្ជាក់ពីភាពចាំបាច់ជាមូលដ្ឋាននៃការប្រកួតប្រជែងស្មើភាព និងសារៈសំខាន់នៃប្រព័ន្ធពាណិជ្ជកម្មសេរី និងយុត្តិធម៌ដោយផ្អែកលើនីតិរដ្ឋ។ G៧ បានសម្តែងការសោកស្តាយ និងថ្កោលទោសរុស្ស៊ីពីបទបានវាយប្រហារកម្ទេចហេដ្ឋារចនាសម្ព័ន្ធសម្រាប់ការនាំចេញគ្រាប់ធញ្ញជាតិអ៊ុយក្រែន ក្រោយពីរុស្ស៊ីបានបដិសេធមិនបន្តកិច្ចព្រមព្រៀងដែលអនុញ្ញាតឲ្យអ៊ុយក្រែននាំចេញគ្រាប់ធញ្ញជាតិរបស់ខ្លួន។ បន្ទាប់មក G៧ ក៏បានស្នើឲ្យលុបចោលជាបន្ទាន់នូវរាល់វិធានការណាដែលរឹតបន្តឹងពាណិជ្ជកម្ម ពិសេសការនាំចូលគ្រឿងសមុទ្រពីជប៉ុន។
ទោះបីជា G៧ មិនបានលើកចំឈ្មោះប្រទេសណាក៏ដោយក៏គេដឹងថា រុស្ស៊ី និងចិនជាផ្ទាំងស៊ីប ព្រោះថ្មីៗកន្លងទៅនេះ ចិន និងរុស្ស៊ីបានព្យួរការនាំចូលគ្រឿងសមុទ្រពីជប៉ុនបន្ទាប់ពីជប៉ុនបានសម្រេចបង្ហូរទឹកពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាចូលសមុទ្រ។ G៧ យល់ថា វាពិតជាសំខាន់ដែលវិធានការរឹតបន្តឹងការនាំចូលចំណីអាហារត្រូវធ្វើឡើងដោយផ្អែកលើទិន្នន័យវិទ្យាសាស្រ្ត និងការគោរពច្បាប់អន្តរជាតិត្រឹមត្រូវ។ បន្ទាប់មក G៧ បានបញ្ជាក់ពីការចង់កាត់បន្ថយការពឹងលើការនាំចូលពីប្រទេសផ្សេង ពិសេសពីចិន និងរុស្ស៊ី។ នៅក្នុងន័យនេះ G៧ ចង់បន្តកិច្ចខិតខំប្រឹងប្រែងខ្លួនឯងដើម្បីបំពាក់នូវសង្វាក់ផ្គត់ផ្គង់ដែលធន់ និងថេរសម្រាប់ផលិតផលសំខាន់មួយចំនួន ដូចជារ៉ែយុទ្ធសាស្រ្ត សឺមីកុងឌុចទ័រ និងអាគុយ។
ក្រៅពីនេះ កិច្ចប្រជុំថ្នាក់រដ្ឋមន្រ្តីពាណិជ្ជកម្ម G៧ ក៏បានជជែកពីសន្តិសុខស្បៀង ការប្រែប្រួលអាកាសធាតុ និងកំណែទម្រង់អង្គការពាណិជ្ជកម្មពិភពលោក។ តែ G៧ មិនភ្លេចនិយាយពីស្ថានភាពនៅតំបន់ដើមបូព៌ា ពិសេសផលវិបាកដែលកើតចេញសង្រ្គាមរវាងអ៊ីស្រាអែល និងចលនាប៉ាឡេស្ទីនហាម៉ាស។ ប្រធានរឿងមួយនេះមិនត្រូវបាន G៧ ដាក់បញ្ចូលទៅក្នុងសេចក្តីថ្លែងការណ៍រួមរបស់ខ្លួនទេ។ តែប្រមុខការទូតជប៉ុនលោកស្រីយ៉ូកូ កាមីកាវ៉ាបានថ្លែងនៅក្នុងសន្និសីទកាសែតថា មានការព្រួយបារម្ភពីកំណើនថែមទៀតនៃភាពមិនប្រាកដប្រជាដោយសារស្ថានភាពថ្មីៗនៅអ៊ីស្រាអែល និងនៅប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ