កូរ៉េខាងត្បូងប្រជែងបាញ់បង្ហោះផ្កាយរណបចារកម្ម មិនឲ្យចាញ់កូរ៉េខាងជើង
ជិត២សប្តាហ៍ក្រោយ កូរ៉េខាងជើងបាញ់បង្ហោះផ្កាយរណបចារកិច្ច កូរ៉េខាងត្បូងបានអះអាងថា ខ្លួនក៏បានជោគជ័យ ក្នុងការបាញ់បញ្ជូនផ្កាយរណបស៊ើបការណ៍យោធា ទៅក្នុងគន្លងតារាវិថី ដែរ នៅថ្ងៃសៅរ៍ទី ២ធ្នូ។ នៅថ្ងៃដដែលនេះ ព្យុងយ៉ាងគំរាមបាញ់ទម្លាក់ផ្កាយរណបចារកិច្ចអាមេរិក ក្នុងករណីដែលផ្កាយរណបរបស់ខ្លួនរងការវាយប្រហារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៤
ជាប្រទេសដែលឈានមុខខាងផ្នែកបច្ចេកវិទ្យា កូរ៉េខាងត្បូងតាំងខ្លួនមិនឲ្យចាញ់បងប្អូនសត្រូវកូរ៉េខាងជើង។ ជិត២សប្តាហ៍ក្រោយពី កូរ៉េខាងជើងបាញ់បង្ហោះបានសម្រេច ផ្កាយរណបស៊ើបការណ៍សម្ងាត់យោធា កូរ៉េខាងត្បូងបានប្រកាសថា ខ្លួនបានបញ្ជូនដោយជោគជ័យ ផ្កាយរណបចារកិច្ចទៅក្នុងទីអវកាស។
បើតាមក្រុមហ៊ុនSpace X ដែលជាអ្នកទទួលបន្ទុកបាញ់បង្ហោះផ្កាយរណបរបស់កូរ៉េខាងត្បូង រ៉ូក្កែតFalcon 9 ដែលមានដឹកផ្កាយរណបចារកិច្ចរបស់កូរ៉េខាងត្បូង និងផ្កាយរណបរបស់អតិថិជនមួយចំនួនផ្សេងទៀត ត្រូវបាញ់ចេញពីទីតាំងបាញ់បង្ហោះVandenberg ក្នុងរដ្ឋកាលីហ្វ័នីញ៉ា នៅព្រឹកថ្ងៃសុក្រ ដែលត្រូវនឹងម៉ោង៣ភ្លឺ ម៉ោងនៅសេអ៊ូល។
ក្រសួងការពារជាតិកូរ៉េខាងត្បូងអះអាងថា នៅតែ១១នាទីក្រោយបំបែកខ្លួនចេញពីរ៉ូក្កែត ផ្កាយរណបចារកម្មយោធាបានចូលទៅក្នុងគន្លងតារាវីថី និងអាចដំណើរការទាក់ទងភ្លាមៗជាមួយមណ្ឌលត្រួតពិនិត្យនៅលើដី។ កូរ៉េខាងត្បូងបញ្ជូនផ្កាយរណបចារកម្មទៅក្នុងទីអវកាសដើម្បីតាមដានសកម្មភាពយោធារបស់កូរ៉េខាងជើង ដែលមានអាវុធនុយក្លេអ៊ែរ។
យោងតាមអ្នកទទួលខុសត្រូវម្នាក់របស់ក្រសួងការពារជាតិកូរ៉េខាងត្បូង ដែលស្រង់សំដីដោយទីភ្នាក់ងារព័ត៌មានកូរ៉េខាងត្បូង យុនហាប់ ផ្កាយរណបចារកម្មមានសមត្ថភាពចាប់ និងថតបានច្បាស់ សូម្បីវត្ថុដ៏តូច ទំហំ៣០សង់ទីម៉ែត្រ។
កន្លងមក ដើម្បីតាមដានសកម្មភាពរបស់ព្យុងយ៉ាង សេអ៊ូលត្រូវពឹងផ្អែកច្រើនទៅលើផ្កាយរណបស៊ើបការណ៍កងទ័ពរបស់សម្ព័ន្ធមិត្តអាមេរិក។ តាមការពន្យល់របស់សាស្រា្តចារ្យChoi Gi-il នៅសកលវិទ្យាល័យSangji ទោះធ្លាប់ឈានមុខនៅក្នុងកម្មវិធីផ្កាយរណបយោធា ផ្ទុយទៅវិញ កូរ៉េខាងត្បូងនៅមានសកម្មភាពមានកម្រិតខាងផ្កាយរណបចារកម្ម។ ប៉ុន្តែ នៅក្រោយ របបកុម្មុយនិស្តព្យុងយ៉ាង ជោគជ័យ ក្នុងការបាញ់បង្ហោះផ្កាយរណបចារកម្ម កាលពីខែវិច្ឆិកាកន្លងទៅ រដ្ឋាភិបាលសេអ៊ូលត្រូវបាញ់បង្ហោះផ្កាយរណបចារកម្ម ដើម្បីបង្ហាញថា ខ្លួនក៏មានសមត្ថភាពនឹងគេដែរ។
កូរ៉េខាងជើងឯណោះវិញ អះអាងថា ចាប់តាំងពីបញ្ជូនដោយជោគជ័យផ្កាយរណបចារកម្ម ទៅក្នុងគន្លងតារាវិថី ខ្លួនអាចតាមដានមើលមូលដ្ឋានយោធារបស់កូរ៉េខាងត្បូង និងអាមេរិក ជាពិសេសមូលដ្ឋានកងទ័ពអាមេរិកនៅលើកោះ Guam នៅ មហាសមុទ្រប៉ាស៊ីហ្វិក។ កូរ៉េខាងត្បូងធ្លាប់បញ្ជាក់ថា រុស្ស៊ីបានចូលរួមផ្នែកបច្ចេកវិទ្យា ដើម្បីជួយជំរុញឲ្យកូរ៉េខាងជើងបាញ់បញ្ជូនបានសម្រេចផ្កាយរណបចារកម្មលើកនេះ។
នៅសប្តាហ៍នេះ អ្នកនាំពាក្យរបស់ទីបញ្ជាការដ្ឋានអវកាសអាមេរិក លោក Sheryll Klinkel បាននិយាយប្រាប់អ្នកកាសែតថា អាមេរិកមានមធ្យោបាយគ្រប់បែបយ៉ាង ដើម្បីរារាំងកុំឲ្យសត្រូវមានសមត្ថភាពអវកាស មកគំរាមកំហែងអាមេរិក។ ប៉ុន្តែ អ្នកនាំពាក្យរបស់ក្រសួងការពារជាតិកូរ៉េខាងជើង ដែលដកស្រង់សំដីដោយទីភ្នាក់ងារKCNA បានព្រមានអាមេរិកពីការប្រកាសសង្រ្គាម បើសិនអាមេរិកហ៊ានវាយប្រហាររាល់វត្ថុរបស់កូរ៉េខាងជើង ក្នុងទីអវកាស។ កូរ៉េខាងជើងគំរាមផងដែរ ថា នឹងបាញ់បំផ្លាញ ផ្កាយរណបចារកម្មរបស់អាមេរិក ក្នុងករណីដែលអាមេរិកធ្វើសកម្មយោធាប្រឆាំង ផ្កាយរណបរបស់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ