ជប៉ុន ចង់សហការជាមួយអាស៊ាន ដើម្បីផលិតរថយន្តសម្រាប់នាំចេញទៅកាន់ពិភពលោក
រាជរដ្ឋាភិបាលជប៉ុន អញ្ជើញថ្នាក់ដឹកនាំអាស៊ាន ចូលរួមកិច្ចប្រជុំកំពូល ចំនួន៣ថ្ងៃ នៅរាជធានីតូក្យូ ក្នុងឱកាសអបអររំឭកខួបទំនាក់ទំនងស្ពានមេត្រីទូត ៥០ឆ្នាំ រវាងជប៉ុន-អាស៊ាន។ ក្នុងពេលទទួលទានអាហារល្ងាចរួមគ្នា នាយករដ្ឋមន្ត្រីជប៉ុន ហ្វូមីអូ គីស៊ីដា បានបង្ហើបពីគម្រោងផ្តួចផ្តើមចង់វិនិយោគទុនវិស័យឧស្សាហកម្មផលិតរថយន្ត ក្នុងតំបន់អាស៊ាន និងចាត់ទុកថា អាស៊ាន ជាតំបន់មានសក្កានុពលខ្ពស់ ហើយនិងចង់យកអាស៊ានជាមជ្ឈមណ្ឌលផលិតរថយន្តសម្រាប់នាំចេញទៅកាន់ពិភពលោក។ ក្រៅពីសំណុំរឿងរកស៊ីជួញដូរ ប្រធានបទក្តៅនៅក្នុងកិច្ចប្រជុំកំពូលនេះ គឺកិច្ចសហការសន្តិសុខផ្លូវសមុទ្រនិងបញ្ហាអាកាសធាតុ។
ចុះផ្សាយនៅថ្ងៃ៖
ស្តាប់ - ០៣:១០
នៅក្រុងតូក្យូ ចុងសប្តាហ៍នេះ ថ្នាក់ដឹកនាំជប៉ុន និង អាស៊ាន យល់ព្រមសហការគ្នាលើវិស័យជាច្រើន រាប់ចាប់តាំងពីវិស័យអាកាសធាតុ ថាមពល រ៉ែកម្រ ផ្លូវអាកាស បញ្ញាសិប្បនិម្មិត និង សុវត្ថិភាពសន្តិសុខព័ត៌មានវិទ្យា។ បន្ថែមពីនេះ ប្រធានបទសំខាន់ ដែលនាយករដ្ឋមន្ត្រីជប៉ុន លើកឡើងក្នុងសុន្ទរកថាខ្លី នាពេលលៀងអាហារល្ងាច គឺ ឧស្សាហកម្មផលិតរថយន្ត។ ប្រមុខរដ្ឋាភិបាលក្រុងតូក្យូ លោក ហ្វូមីអូ គីស៊ីដា បានថ្លែងថា ថ្នាក់ដឹកនាំជប៉ុន-អាស៊ាន នឹងប្រកាសគម្រោងគំនិតផ្តួចផ្តើម ស្តីពី ឧស្សាហកម្មផលិតរថយន្តជាន់ថ្មី ហើយ អាស៊ាន នឹងក្លាយជាមជ្ឈមណ្ឌលផលិតរថយន្តលំដាប់ពិភពលោក និងផលិតរថយន្តសម្រាប់នាំចេញ។
មួយវិញទៀត នៅថ្ងៃច័ន្ទ ទី១៨ធ្នូ ជប៉ុននឹងត្រូវធ្វើជាប្រធានអង្គប្រជុំ ផ្តោតសារៈសំខាន់អំពីបញ្ហាបរិស្ថានអាកាសធាតុ ដើម្បីរកមធ្យោបាយកាត់បន្ថយធ្យូងថ្ម ដែល ជប៉ុនម្ចាស់ផ្ទះ ជាអ្នកផ្តួចផ្តើម និងបានឲ្យឈ្មោះថា «អាស៊ាន សហគមន៍មិនបញ្ចេញផ្សែងពុល»។ បើតាមគម្រោង គឺ នាយករដ្ឋមន្ត្រីអូស្ត្រាលី អង់តូនី អាល់បានីស៊ី ក៏នឹងចូលរួមប្រជុំដែរ តាមរយៈវីដេអូពីចម្ងាយ។
ក្រៅពីប្រធានសំខាន់ៗទាំងនេះ គឺសំណុំរឿង «សន្តិសុខផ្លូវសមុទ្រ» ជាប្រធានបទចម្បង ដែល ជប៉ុន ចាត់ទុកថានេះជា«បញ្ហារួម» និងជាក្តីកង្វល់រួមរបស់រដ្ឋបាលក្រុងតូក្យូ។ រដ្ឋបាលក្រុងតូក្យូ ក៏មានបញ្ហាផ្លូវសមុទ្រជាមួយមហាយក្សចិន ដូចរដ្ឋសមាជិកអាស៊ានមួយចំនួនដែរ។ ដូច្នេះហើយ ទើបភាគី ជប៉ុន និង អាស៊ាន បានយកចិត្តទុកដាក់ជាពិសេសអំពីការពង្រឹងកិច្ចសហការផ្នែកសន្តិសុខផ្លូវសមុទ្រ។ ក្នុងបញ្ហានេះដែរ នៅថ្ងៃសៅរ៍ នាយករដ្ឋមន្ត្រីជប៉ុន លោក ហ្វូមីអូ គីស៊ីដា និង នាយករដ្ឋមន្ត្រី ម៉ាឡេស៊ី លោក អានវ៉ា អ៊ីប្រាហ៊ីម បានពិភាក្សាគ្នា ហើយភាគីទាំងពីរបានសម្រេចរឹតចំណងដៃគូសហការជាយុទ្ធសាស្ត្រ។ រដ្ឋបាលក្រុងតូក្យូ ក៏បានសម្រេចផ្តល់កញ្ចប់ថវិកាចំនួន ៤០០ លានយ៉េន (ស្មើនឹង២,៨លានដុល្លារ) ដល់រដ្ឋបាលក្រុងកូឡាឡាំពួរ ដើម្បីទិញឧបករណ៍ប្រកាសអាសន្ននិងគ្រឿងសម្ភារៈត្រួតពិនិត្យតាមដានសន្តិសុខផ្លូវសមុទ្រ ។
ចំណែកហ្វីលីពីន ប្រធានាធិបតី ហ្វ៊ែរឌីណង់ ម៉ាកូស ជូញ៉រ ក៏អញ្ជើញទៅតូក្យូដោយផ្ទាល់ និងបានផ្តល់បទសម្ភាសទៅកាន់ទូរទស្សន៍ជប៉ុន NHK នៅថ្ងៃអាទិត្យ។ ក្នុងបទសម្ភាសនោះ ប្រមុខរដ្ឋហ្វីលីពីន បានចាត់ទុកថា ស្ថានភាពសមុទ្រចិនខាងត្បូង កំពុងតែរីកបញ្ហាធំឡើងៗ ហើយកាន់តែស្មុកស្មាញខ្លាំង។ បើតាមកាសែតក្នុងស្រុក គឺ ជប៉ុន និង ហ្វីលីពីន ជជែកគ្នាជុំវិញកិច្ចព្រមព្រៀងវិស័យសន្តិសុខយោធា ដែលអនុញ្ញាតអាចឲ្យ រដ្ឋបាលតូក្យូ និងម៉ានីល បោះទីតាំងមូលដ្ឋានទ័ព នៅក្នុងប្រទេសទាំងពីរទៅវិញទៅមក។ គួររំឭកថា កាលពីខែវិច្ឆិកា ជប៉ុនបានយល់ព្រមផ្តល់ប្រព័ន្ធការពារដល់ហ្វីលីពីន ហើយថែមទាំងជួយសម្ភារៈផ្សេងទៀតសម្រាប់បំពាក់នាវាហ្វីលីពីននិងក្រុមឆ្មាំសមុទ្រ។
ទន្ទឹមនឹងគ្នានេះ ពីថ្ងៃអាទិត្យ លោក ហ្វូមីអូ គីស៊ីដា នាយករដ្ឋមន្ត្រីជប៉ុន មានប្រសាសន៍ថា ខណៈពេលដែលពិភពលោកកំពុងតែប្រទាញប្រទង់និងបែងចែកបក្សពួកនៅក្នុងសំណុំបញ្ហាជម្លោះផ្សេងៗគ្នា ប៉ុន្តែ ជប៉ុន នឹងនៅជាមួយអាស៊ានជានិច្ច ដើម្បីជំរុញឲ្យតំបន់សមុទ្រអាស៊ីប៉ាស៊ីហ្វិក មានភាព«សេរី និងបើកចំហ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ