“ទំនាក់ទំនងជាមួយចិន” ក្លាយជាប្រធានបទក្តៅនៃការតស៊ូមតិរបស់បេក្ខជនប្រធានាធិបតីតៃវ៉ាន់
នៅពីរសប្តាហ៍ទៀតគឺនៅថ្ងៃទី ១៣មករា តៃវ៉ាន់ត្រូវបោះឆ្នោតជ្រើសរើសប្រធានាធិបតីនិងសមាជិកសភាថ្មី។ ជាការបោះឆ្នោតដ៏សំខាន់សម្រាប់កោះប្រជាធិបតេយ្យតៃវ៉ាន់ដែលមានបេក្ខជនមកពីគណបក្សបីកំពុងប្រជែងគ្នា។ នៅថ្ងៃសៅរ៍នេះ បេក្ខជនប្រធានាធិបតីបានជួបតស៊ូមតិគ្នាតាមកញ្ចក់ទូរទស្សន៍ជុំវិញប្រធានបទស្នូលមួយគឺទំនាក់ទំនងជាមួយចិន។
ចុះផ្សាយនៅថ្ងៃ៖
ស្តាប់ - ០២:៤៩
ក្នុងកម្មវិធីជួបតស៊ូមតិ នាថ្ងៃសៅរ៍ទី៣០ធ្នូនេះ បេក្ខជនប្រធានាធិបតីតៃវ៉ាន់ ទាំងបីគណបក្ស បានប្រទាក់សំដីគ្នាយ៉ាងខ្លាំងជុំវិញប្រធានបទ “ទំនាក់ទំនងរវាងកោះតៃវ៉ាន់និងចិន”។
បេក្ខជនប្រធានាធិបតីនៃគណបក្សចម្រើនប្រជាធិបតេយ្យកំពុងកាន់អំណាច លោក វីលីយ៉ាំ ឡៃ ដែលក៏ជាអនុប្រធានាធិបតីផុតអាណត្តិនិងដែលល្បីខាងមានជំហរឯករាជ្យនិយមសម្រាប់តៃវ៉ាន់នោះ គ្រាន់តែបានសិទ្ធិនិយាយភ្លាម បានផ្តើមវាយប្រហារមុនគេ សំដៅលើគូប្រជែងបក្សជាតិនិយមចិនតួមីងតាងថា “ប្រសិនបើបក្សស្និទ្ធនឹងចិនប៉េកាំងជាប់ឆ្នោត រាល់កិច្ចខិតខំប្រឹងប្រែងពង្រឹងវិស័យការពារជាតិនឹងត្រូវរលាយ។ លោកឡៃបានចោទលោកហ៊ូ យូ អ៊ី បេក្ខជនបក្សគួមីងតាង ដែលមានទំនាក់ទំនងជិតស្និទ្ធល្អជាមួយរដ្ឋាភិបាលក្រុងប៉េកាំង ថាត្រូវរ៉ូវជាមួយចិន។
ជាការរិះគន់តបវិញ លោក ហ៊ូយូអ៊ី បានចោទលោក វីលីយ៉ាំ លីថាគាំទ្រឯករាជ្យភាពតៃវ៉ាន់ជ្រុល។ ដោយហេតុជំហរចង់បានឯករាជ្យពេកនេះហើយ ទើបតៃវ៉ាន់បច្ចុប្បន្នត្រូវបានគេចាត់ទុកជាកន្លែងដ៏គ្រោះថ្នាក់ជាងគេនៅលើពិភពលោក។ លោក ហ៊ូ បានបញ្ជាក់ជំហរប្រឆាំងនឹងការទាមទារឯករាជ្យឱ្យតៃវ៉ាន់ ដោយយល់ថាតៃប៉ិត្រូវតែរក្សាទំនាក់ទំនងនិងការផ្តោះប្តូរជាមួយចិន។
ចំណែកបេក្ខជនទីបី លោកកូ វេន ជេ នៃគណបក្សប្រជាជនតៃវ៉ាន់ ដែលបានបង្ហាញវត្តមានគួរឱ្យភ្ញាក់ផ្អើលទន្ទឹមនឹងបក្សធំជាគូប្រជែងគ្នាជាប្រពៃណីនោះ បានសាកល្បងបង្វែរការតស៊ូមតិមកផ្តោតលើបញ្ហាប្រចាំថ្ងៃ ដូចជាតម្លៃស្នាក់នៅ ឬបញ្ហាប្រាក់ខែទាប និងបញ្ហាជាកង្វល់របស់យុវជនម្ចាស់ឆ្នោតក្មេងៗ។ លោកកូ បានព្រមានថា ជាង៣០ឆ្នាំមកនេះ អ្នកនយោបាយបានធ្វើឱ្យតៃវ៉ាន់ខាតបង់ពេលវេលាជុំវិញតែប្រធានបទតែមួយ។ តែឆ្នាំនេះ បក្សប្រជាជន អាចនឹងធ្វើគណបក្សធំៗទាំងពីរដួលបាន។ សម្រាប់លោកកូ បក្សប្រជាធិបតេយ្យកំពុងកាន់អំណាចមាននយោបាយខ្ជះខ្ជាយប្រកាន់ឥរិយាបថបង្កជម្លោះជ្រុល ឯបក្សគួមីងតាង គិតតែពីរឿងភ្ជាប់កិច្ចសហប្រតិបត្តិការជាមួយចិន។
ប៉ុន្តែគណបក្សកាន់អំណាចបានបិទបញ្ចប់ការតស៊ូមតិដោយបន្ទោសគូប្រជែងទាំងពីរថាទម្លាក់ទំនួលខុសត្រូវនៃភាពតានតឹងមកលើរដ្ឋាភិបាល តែតាមការពិតទៅអ្នកបង្កហេតុគឺចិនទៅវិញទេ។ តៃវ៉ាន់ត្រូវតែរួបរួមគ្នាជាធ្លុងមួយអាចបញ្ចៀសសង្គ្រាមបាន។
គេនៅមិនទាន់ដឹងថាតើការតស៊ូមតិនេះ ជះឥទ្ធិពលយ៉ាងណាលើឆន្ទៈរបស់ប្រជាពលរដ្ឋក្នុងការបោះឆ្នោត។ លទ្ធផលនៃការស្ទង់មតិអាចបញ្ជាក់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ