តុលាការធម្មនុញ្ញថៃសម្រេចឱ្យអតីតប្រធានបក្សកាវក្លៃបន្តអាណត្តិជាតំណាងរាស្ត្រ
បន្ទាប់ពីរង់ចាំក្នុងភាពមន្ទិលនយោបាយអស់ជាច្រើនខែ តុលាការធម្មនុញ្ញថៃ បានចេញសាលក្រមនៅថ្ងៃពុធទី ២៤មករា២០២៤នេះ បញ្ជាក់អំពីភាពស្អាតស្អំរបស់លោក ភិថា លឹមចៈរើនរ៉ាត់ អតីតប្រមុខបក្សកាវក្លៃ។ តាមរយៈសេចក្តីប្រកាសនេះ លោកភិថា លឹមចៈរើនរ៉ាត់ អាចត្រលប់ទៅអង្គុយលើអាសនៈនៅក្នុងសភា ក្នុងនាមជាតំណាងរាស្ត្រ។
ចុះផ្សាយនៅថ្ងៃ៖
“តុលាការបានសម្រេចថាអាណត្តិជាតំណាងរាស្ត្ររបស់លោកភិថា លឹមចៈរើនរ៉ាត់មិនទាន់ចប់ទេ”។ នេះបើតាមសាលក្រម ប្រកាសដោយលោកចៅក្រមPunya Udchachon ជាមួយនឹងសេចក្តីសន្និដ្ឋានបញ្ចប់ថា “iTV គ្មានសកម្មភាពជាអង្គការសារព័ត៌មានទេ នៅពេលគណបក្សកាវក្លៃបានសម្រេចដាក់ឈ្មោះជនជាប់ចោទ ភិថា លឹមចៈរើនរ៉ាត់ ឱ្យឈរឈ្មោះបោះឆ្នោត។ ការមានភាគហ៊ុនក្នុងក្រុមហ៊ុននេះមិនមែនជាការរំលោភច្បាប់ឡើយ។
គ្រាន់តែបានឮសាលក្រមនេះភ្លាម សកម្មជនបក្សដែលបានប្រមូលផ្តុំគ្នានៅមុខតុលាការ ក្រោមការត្រួតពិនិត្យយ៉ាងតឹងតែងពីនគរបាល បាននាំគ្នាស្រែកជ័យឃោសអបអរហៅលោកភិថាជានាយករដ្ឋមន្ត្រីភ្លាម។
នេះជាសាលក្រមដែលថៃ ជាពិសេសយុវជនជំនាន់ក្រោយដែលគាំទ្រគណបក្សក្លាវក្លៃ រង់ចាំបំផុត។ មានទំនោរប្រជាធិបតេយ្យចង់ធ្វើទំនើបកម្មរបបរាជានិយមនិងនយោបាយចាស់គំរិលក្រោមអំណាចយោធា គណបក្សក្លាវក្លៃដឹកនាំដឹកនាំដោយលោក ភិថា លឹមចៈរើនរ៉ាត់ វ័យ៤៣ឆ្នាំ បានឈ្នះនាំមុខយ៉ាងត្រចះត្រចង់ក្នុងសម័យបោះឆ្នោតសភាថៃ កាលពីខែមេសា២០២៣ ប៉ុន្តែមិនអាចក្លាយជាអ្នកដឹកនាំរដ្ឋាភិបាលបានដោយហេតុតែជំហរតឹងតែងជ្រុលចំពោះរាជវាំង និងជាប់បណ្តឹងចោទប្រកាន់ជាច្រើននៅតុលាការ។
ក្នុងពេលសិក្សាបណ្តឹង តុលាការបានព្យួរបេក្ខភាពជាសមាជិកសភារបស់លោកភិថា លឹមចៈរើនរ៉ាត់ តាំងពីតែកក្កដា២០២៣មក។ តែនៅថ្ងៃនេះ តុលាការធម្មនុញ្ញថៃបានសម្រេចលាងសម្អាតបញ្ជាក់ពីភាពស្អាតស្អំរបស់លោក ភិថា លឹមចៈរើនរ៉ាត់ ពីបទចោទប្រកាន់ទីមួយ ពាក់ព័ន្ធនឹងការមានក្រុមហ៊ុនសារព័ត៌មានiTV។ ប៉ុន្តែអតីតប្រធានគណបក្សប្រឆាំងកាវក្លៃរូបនេះ នៅតែប្រឈមនឹងការដកតំណែងជាតំណាងរាស្ត្រដដែល ព្រោះលោកនៅប្រឈមនឹងរឿងក្តីចោទប្រកាន់មួយទៀត ពីបទមានគម្រោងការផ្តួលរំលំរបបរាជានិយម។ តុលាការធម្មនុញ្ញត្រូវផ្តល់សម្រេចសាលក្រមនៅថ្ងៃពុធទី៣១មករា២០២៤សប្តាហ៍ក្រោយ។
តុលាការធម្មនុញ្ញថៃ បានដើរតួនាទីក្នុងវិបត្តិនយោបាយថៃច្រើនណាស់ មានជាអាទិ៍ការសម្រេចរំលាយគណបក្សFuture Forward (បក្សកាវក្លៃចាស់) កាលពីឆ្នាំ២០២០ ដែលជំរុញឱ្យមានបាតុកម្មនិស្សិតនិងយុវជនយ៉ាងខ្លាំងក្លាទាមទាររំលាយប្រព័ន្ធរាជានិយមថៃ។ កាលណោះតុលាការបានកាត់ទោសប្រមុខចលនា លោកថាណាថន មិនឱ្យធ្វើនយោបាយ១០ឆ្នាំ។ កាលពីប៉ុន្មានខែមុនទៀត តុលាការធម្មនុញ្ញដដែលនេះ បានដកសិទ្ធិជាតំណាងរាស្ត្រពីសកម្មជនបក្សប្រឆាំងដ៏ល្បីម្នាក់ ពីបទមានចំណែកក្នុងក្រុមឃោសនាព័ត៌មានពេលធ្វើយុទ្ធនការបោះឆ្នោតឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ