ប្រមុខការទូតចិនប្រកាសគាំទ្រតួនាទីរបស់ឥណ្ឌូណេស៊ីជាប្រទេសដ៏ធំ
លោក វ៉ាងយី រដ្ឋមន្ត្រីការបរទេសចិន កំពុងបំពេញទស្សនកិច្ចនៅក្នុងប្រទេសឥណ្ឌូណេស៊ី។ នៅថ្ងៃព្រហស្បតិ៍ទី១៨មេសានេះ លោកប្រមុខការទូតចិនបានចូលជួបប្រធានាធិបតីផុតអាណត្តិ ចូកូ វីដូដូ ផងនិងប្រធានាធិបតីជាប់ឆ្នោតថ្មី លោក ប្រាបូវ៉ូ ស៊ូប្រីយ៉ាតូ ផង ដោយប្រកាសគាំទ្រយ៉ាងពេញទំហឹងតួនាទីរបស់ឥណ្ឌូណេស៊ីជាប្រទេសដ៏ធំមួយ។
ចុះផ្សាយនៅថ្ងៃ៖
ស្តាប់ - ០២:៣០
ដំណើរទស្សនកិច្ចរបស់លោកវ៉ាងយី រដ្ឋមន្ត្រីការបរទេសចិន នៅឥណ្ឌូណេស៊ី ប្រព្រឹត្តទៅក្នុងក្របខ័ណ្ឌនៃទំនាក់ទំនងពិសេសរវាងប៉េកាំងនិងហ្សាការតា ដែលលោកប្រធានាធិបតីចិនស៊ីជីនពីងអួតអាងថាជាទំនាក់ទំនងដើម្បីសន្តិភាពតំបន់ក្នុងផ្ទៃនៃភាពតានតឹងរវាងចិននិងបណ្តាប្រទេសជិតខាងអាស៊ីអាគ្នេយ៍រាប់ទាំងហ្វីលីពីន។
បន្ទាប់ពីបានជជែកពិភាក្សាជាមួយសមភាគីឥណ្ឌូណេស៊ីលោកស្រី រ៉េតណូ ម៉ារស៊ូឌី នៅពេលព្រលឹមលោកវ៉ាងយី បានចូលជួបប្រធានាធិបតីផុតអាណត្តិចូកូវីដូដូ ហៅចូកូវី នៅវិមានប្រធានាធិបតី ដោយប្រកាសគាំទ្រតួនាទីឥណ្ឌូណេស៊ីក្នុងនាមជាប្រទេសដ៏ធំមួយ ដើម្បីពង្រឹងកិច្ចសហប្រតិបត្តិការនិងសម្របសម្រួលទំនាក់ទំនងទល់រាល់គ្រប់សកម្មភាពនាំឱ្យមានភាពប្រេះឆា ឬភាពប្រឈមនៅក្នុងតំបន់។ នេះបើតាមការចុះផ្សាយរបស់សារព័ត៌មានផ្លូវការចិន។ លោកចូកូវីដូដូ និងលោកវ៉ាងយី ក៏បានប្រកាសឆន្ទៈចង់បានសន្តិភាពនិងស្ថិរភាពតំបន់ ហើយអំពាវនាវឱ្យភាគីជម្លោះអ៊ីស្រាអែលនិងហាម៉ាសបទឈប់បាញ់នៅតំបន់ហ្កាហ្សា។ នេះបើតាមប្រសាសន៍របស់លោកស្រីប្រមុខការទូតឥណ្ឌូណេស៊ី។
ស្តីពីជំនួបរវាងលោកវ៉ាងយីជាមួយប្រធានាធិបតីទើបជាប់ឆ្នោតថ្មី លោកប្រាបូវ៉ូ ស៊ូប្រីយ៉ាតូ ដែលបច្ចុប្បន្នជារដ្ឋមន្ត្រីក្រសួងការពារជាតិ និងដែលមានជំហរគាំទ្រការអភិវឌ្ឍទំនាក់ទំនងស្អិតល្មួតជាមួយចិន ភ្នាក់ងារសារព័ត៌មានរបស់លោកប្រាបូវ៉ូ បានផ្សព្វផ្សាយថាមេដឹកនាំទាំងពីរបានជជែកគ្នាអំពីលទ្ធភាពរៀបចំសមយុទ្ធរួម តែគ្មានសរសេរក្នុងថ្លែងការណ៍ចុងក្រោយទេ។ នៅក្នុងសេចក្តីថ្លែងការណ៍ដាច់ដោយឡែកមួយទៀត ក្រសួងការពារជាតិឥណ្ឌូណេស៊ីបានគូសបញ្ជាក់ដោយមិនលម្អិតថាភាគីចិននិងឥណ្ឌូណេស៊ី បានពិភាក្សាគ្នាអំពីកិច្ចសហប្រតិបត្តិការផ្នែកហ្វឹកហ្វឺននិងធ្វើលំហាត់រួម។
ឥណ្ឌូណេស៊ីមាននយោបាយការបរទេសអព្យាក្រិត្យ ប៉ុន្តែហ្សាការតា កំពុងស្ថិតក្នុងស្ថានភាពការទូតដ៏លំបាក នៅចំពោះមុខចិននិងសហរដ្ឋអាមេរិកដែលប្រឆាំងគ្នាលើស្ទើរគ្រប់វិស័យ ៖ ពាណិជ្ជកម្ម អ៊ុយក្រែន ដើមបូព៌ា តៃវ៉ាន់ ឬសមុទ្ទចិនខាងត្បូង។ ប៉ុន្មានឆ្នាំចុងក្រោយមកនេះ ចិនបានក្លាយជាប្រភពវិនិយោគបរទេសដ៏ចម្បងមួយរបស់ឥណ្ឌូណេស៊ី។ ក្រុមហ៊ុនចិនបានចាក់លុយរាប់ពាន់លានក្នុងផលិតកម្មរ៉ែធម្មជាតិនីកែល។ រថភ្លើងល្បឿនលឿនទីមួយប្រចាំតំបន់អាស៊ីអាគ្នេយ៍ទើបត្រូវបានឥណ្ឌូណេស៊ីសម្ពោធកាលពីឆ្នាំ២០២៣ ក៏ជាគម្រោងវិនិយោគគាំទ្រដោយចិនដែរ។
លោកវ៉ាងយី បញ្ចប់ទស្សនកិច្ចដោយត្រូវដឹកនាំជំនួបប្រជុំបច្ចេកទេសស្តីពីកិច្ចសហប្រតិបត្តិការជាន់ខ្ពស់ចិន-ឥណ្ឌូណេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ