ប្រទេសតួកគី និងសហភាពអឺរ៉ុបមិនទាន់និយាយចុះសម្រុងគ្នាក្នុងការដោះស្រាយវិបត្តិអន្តោប្រវេសន៍
នៅយប់ថ្ងៃចន្ទ ទី៩ មីនា ប្រធានាធិបតីតួកគីលោកអ៊ែរដូហ្កានបានចាកចេញពីទីស្នាក់ការអឺរ៉ុបក្នុងទីក្រុងព្រុចសែល ប្រទេសបែលហ្ស៊ិកដោយគ្មានបានលទ្ធផលអ្វីទាំងអស់។ គួររម្លឹកថា លោកអ៊ែរដូហ្កានបានធ្វើដំណើរទៅជួបថ្នាក់ដឹកនាំអឺរ៉ុបដើម្បីជជែកពីបញ្ហាជនអន្តោប្រវេសន៍ដែលតួកគីបានទទួលឲ្យជ្រកកោណជាង ៣លាននាក់នៅលើទឹកដីខ្លួន។ តែខណៈនេះ លោកអ៊ែរដូហ្កានបានបើកទ្វារឲ្យជនអន្តោប្រវេសន៍ចាកចេញពីជំរំទៅកាន់ព្រំដែននៃប្រទេសក្រិច និងប៊ុលហ្ការី។ យ៉ាងណាក៏ដោយ តួកគីតាមរយៈប្រមុខការទូតបានបញ្ជាក់ក្នុងថ្ងៃអង្គារ ទី១០ មីនាថា តួកគីសង្ឃឹមទទួលបានកិច្ចព្រមព្រៀងមួយជាមួយអឺរ៉ុបពីពេលនេះដល់ថ្ងៃទី២៦ មីនាខាងមុខ។
ចុះផ្សាយនៅថ្ងៃ៖
ស្តាប់ - ០២:២១
ជម្រើសសង្ឃឹមទទួលបានកិច្ចព្រមព្រៀងមួយជាមួយអឺរ៉ុបដើម្បីដោះស្រាយវិបត្តិអន្តោប្រវេសន៍ពីពេលនេះដល់ថ្ងៃទី ២៦ មីនាខាងមុខមិនមែនជាជម្រើសចៃដន្យឡើយ។ មិនចែដន្យព្រោះថ្ងៃទី២៦ មីនាជាថ្ងៃបើកជំនួបកំពូលក្រុមប្រឹក្សាអឺរ៉ុប។ « ប្រសិនបើយើងមិនអាចរកបានកិច្ចព្រមព្រៀងមួយពីពេលនេះទៅថ្ងៃទី២៦ មីនាទេ យើងនឹងដាក់ប្រធានបទមួយនេះនៅលើតុនាជំនួបកំពូលថ្នាក់ដឹកនាំអឺរ៉ុប » នេះជាការថ្លែងរបស់ប្រមុខការទូតតួកគីលោក Mevlüt Cavusoglu នៅក្នុងកិច្ចសន្ទនាមួយជាមួយទីភ្នាក់ងារសារព័ត៌មានរដ្ឋឈ្មោះ Anadolu។ ការថ្លែងរបស់លោក Cavusoglu ពេលនេះបានធ្វើឡើង មួយថ្ងៃក្រោយពីប្រធានាធិបតីតួកគីលោកអ៊ែរដូហ្កានបានជួបសន្ទនាជាមួយប្រធានគណៈកម្មការអឺរ៉ុបលោកស្រី Ursula von der Leyen និងប្រធានក្រុមប្រឹក្សាអឺរ៉ុបលោក Charles Michel។
នៅក្នុងជំនួប ថ្នាក់ដឹកនាំអឺរ៉ុប និងលោកអ៊ែរដូហ្កាននិយាយមិនចុះសម្រុងគ្នា តែបានសន្យាបន្តកិច្ចចរចាដើម្បីដោះស្រាយវិបត្តិជនអន្តោប្រវេសន៍។ នៅក្នុងន័យនេះ ប្រមុខការទូតតួកគីលោក Cavusoglu បានបញ្ជាក់ថា លោកនឹងជួបសន្ទនាជាមួយប្រមុខការទូតអឺរ៉ុបលោក Josepp Borrell។ ទន្ទឹមនឹងសន្យាបន្តកិច្ចចរចា ថ្នាក់ដឹកនាំអឺរ៉ុបក៏បានអំពាវនាវឲ្យតួកគីបន្តគោរពកិច្ចព្រមព្រៀងដែលបានចុះហត្ថលេខាជាមួយអឺរ៉ុបកាលពីខែមីនា ឆ្នាំ ២០១៦។ ផ្អែកតាមកិច្ចព្រមព្រៀងកាលណោះ តួកគីទទួលជនអន្តោប្រវេសន៍ទាំងអស់ឲ្យជ្រកកោណលើទឹកដីខ្លួនជាថ្នូរនឹងជំនួយហិរញ្ញវត្ថុរបស់អឺរ៉ុប។ តែលោក Cavusoglu បានបង្ហើបឲ្យដឹងថា កិច្ចព្រមព្រៀងឆ្នាំ ២០១៦ នឹងត្រូវសើរើមើលឡើងវិញដោយផ្អែកលើស្ថានការណ៍វិវឌ្ឍចុងក្រោយនៅស៊ីរី ពិសេសក្នុងខេត្តអ៊ីដឡិប។
គួររម្លឹកថានៅ ២សប្តាហ៍មុននេះ លោកអ៊ែរដូហ្កានបានបើកទ្វារឲ្យជនអន្តោប្រវេសន៍ចាកចេញពីជំរំទៅកាន់ព្រំដែននៃប្រទេសក្រិច និងប៊ុលហ្ការី។ មូលហេតុពិតប្រាកដ គឺលោកអ៊ែរដូហ្កានខឹងអឺរ៉ុបដែលមិនជួយឈឺឆ្អាលនឹងរឿងស៊ីរីដែលតួកគីកំពុងប្រឈមមុខទល់នឹងរុស្ស៊ី។ តែអឺរ៉ុបធ្លាប់បានចោទលោកអ៊ែរដូហ្កាពីបទយកជនអន្តោប្រវេសន៍ជាចំណាប់ខ្មាំងដើម្បីកេងចំណេញនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ