របាយការណ៍អ.ស.ប. ៖ ចំនួនកុមារធ្វើការកើនឡើងជាលើកទីមួយ គិតចាប់ពីឆ្នាំ២០០០មក
ពិភពលោកកំពុងទន់ដៃក្នុងការប្រយុទ្ធប្រឆាំងនឹងពលកម្មកុមារហើយ ពិភពលោកកំពុងឆ្លងកាត់វិបត្តិរាតត្បាតសាកលទៀត។ ដោយហេតុកូវីដ១៩ កុមាររាប់លាននាក់ ត្រូវបង្ខំចិត្តចេញធ្វើការ។ នេះបើតាមរបាយការណ៍របស់អង្គការពលកម្មអន្តរជាតិ និងអង្គការយូនីសេហ្វ ចេញផ្សាយនៅថ្ងៃព្រហស្បតិ៍ទី ១០មិថុនា ២០២១។ ភ្នាក់ងាររបស់អង្គការសហប្រជាជាតិបានព្រមានទៀតថា នេះជាលើកមួយ គិតចាប់ពីពីរទសវត្សរ៍កន្លងមក ដែលពលកម្មកុមារ នៅលើពិភពលោកបានកើនឡើង។
ចុះផ្សាយនៅថ្ងៃ៖
ស្តាប់ - ០២:២១
នៅដើមឆ្នាំ២០២០ មានកុមារចំនួនប្រមាណ ១៦០លាននាក់ ក្នុងនោះ៩៧លាននាក់ជាក្មេងប្រុស បានបង្ខំចិត្តចេញធ្វើការ ពោលគឺច្រើនជាងកាលពីបួនឆ្នាំមុនដល់ទៅ ៨,៤លាននាក់។ ហើយពីពេលនេះដល់ដំណាច់ឆ្នាំ ភាពក្រីក្រនៅលើពិភពលោកដែលបង្កឡើងវិបត្តិកូវីដ១៩ នឹងជំរុញឱ្យកុមារប្រមាណជាង៩លាននាក់បន្ថែមទៀត ត្រូវប្រឹងបញ្ចេញពលកម្មដើម្បីចិញ្ចឹមជីវិត។ នេះបើតាមរបាយការណ៍រួមរបស់អង្គការពលកម្មអន្តរជាតិ និងអង្គការយូនីសេហ្វដែលជាភ្នាក់ងាររបស់អង្គការសហប្រជាជាតិទទួលបន្ទុកសុខមាលភាពកុមារ។
ប៉ុន្តែ ចំនួនពលកម្មកុមារពិតជាក់ស្តែងអាចនឹងច្រើនជាងតួលេខខាងលើដល់ទៅ៥ដង បើយោងទៅតាមគំរូស្ថិតិ។ ម្ចាស់របាយការណ៍បានពន្យល់ថា ប្រសិនបើការការពារ/ជំនួយសង្គមធ្លាក់ចុះ ជាងពេលបច្ចុប្បន្ននេះ ដោយហេតុតែរដ្ឋាភិបាលត្រូវប្រឹងរឹតត្បិតថវិកា និងដោយកត្តាផ្សេង នោះចំនួនកុមារបង្ខំត្រូវធ្វើការដើម្បីរស់ នឹងកើនឡើងដល់៤៦លាននាក់ពីពេលនេះដល់ចុងឆ្នាំ២០២២។
របាយការណ៍ស្តីពីពលកម្មកុមារ ដែលតែងចេញផ្សាយជារៀងរាល់បួនឆ្នាំម្តងនេះ បានបង្ហាញឱ្យឃើញទៀតថាពលករកុមារចំនួនពាក់កណ្តាលមានអាយុចន្លោះពី ៥ទៅ ១១ឆ្នាំ។ ៧០% ទៅធ្វើការក្នុងផ្នែកកសិកម្ម ២០%ក្នុងផ្នែកសេវាកម្ម និង១០%ជាការងារឧស្សាហកម្ម។ តែអ្វីដែលគួរឱ្យព្រួយបារម្ភខ្លាំង គឺកំណើនការងារគ្រោះថ្នាក់ដែលប៉ះពាល់ដល់ការលូតលាស់ ដល់ការសិក្សា និងដល់សុខភាព សម្រាប់កុមារអាយុពី ៥ទៅ១៧ឆ្នាំ បានឡើងឥតឈប់។ ការងារគ្រោះថ្នាក់ មានដូចជាការងារអណ្តូងរ៉ែ នេសាទ និង រយៈពេលធ្វើការលើសពី៤៣ម៉ោងក្នុងមួយសប្តាហ៍។ តំបន់អាហ្វ្រិកជាទ្វីបដែលមានកំណើនអត្រាពលកម្មកុមារស្ទុះឡើងខ្លាំងជាងគេ។
មានសញ្ញាកើនឡើងស្រាប់ផង បូកផ្សំនឹងពិភពលោកជួបវិបត្តិកូវីដ១៩ទៀត ស្ថានភាពកុមារនឹងកាន់តែអាក្រក់ខ្លាំង ប្រសិនបើគ្មាននយោបាយជួយគ្រួសារដែលធ្លាក់ខ្លួនក្រីក្រទេ។ នេះបើតាមការព្រមានរបស់អង្គការសហប្រជាជាតិ ដែលបញ្ជាក់ថា ក្នុងពេលកំពុងមានការរាតត្បាតកូវីដ នៅលើពិភពលោក មានកុមារម្នាក់ក្នុងចំណោម១០នាក់ ត្រូវធ្វើការ។ ពីឆ្នាំ២០០០-២០១៦ ទម្លាក់ចំនួនពលករកុមារឱ្យទាបបំផុត ត្រឹម៩៤លាននាក់ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ