តួកគី ភ្លើងឆេះព្រៃកំពុងគំរាមកំហែងមជ្ឈមណ្ឌលអគ្គីសនី
តាំងពីមួយសប្តាហ៍មកហើយ ដែលតំបន់ភាគខាងត្បូងអឺរ៉ុប និងជាពិសេសតួកគី រងគ្រោះភ្លើងឆេះព្រៃ។ បន្ទាប់ពីបានលេបត្របាក់ ព្រៃ ដីស្រែកសិកម្មអស់រាប់សិបហិចតារ ភូមិឋានរស់នៅរបស់ប្រជាពលរដ្ឋ និងជម្លៀសទេសចរ ទាំងហ្វូងៗចេញពីឆ្នេរមេឌីទែរ៉ាណេ នៅថ្ងៃព្រហស្បតិ៍ក្រុមអ្នកសង្គ្រោះ បានចាប់ផ្តើមប្រតិបត្តិការជម្លៀសប្រជាជនរាប់រយភូមិទៀត ចេញតាមផ្លូវសមុទ្ទ ព្រោះភ្លើងឆេះព្រៃបានរំកិល មកកាន់តែកៀក ខ្លាំងមែនទែន រោងចក្រអគ្គីសនី ដែលមានស្តុកធ្យូងរាប់ពាន់តោន។
ចុះផ្សាយនៅថ្ងៃ៖
ស្តាប់ - ០១:៥៥
ស្នូរស៊ីរ៉ែនបានរោទិ៍ឡើង ប្រជាពលរដ្ឋស្រវាបានវត្ថុបន្តិចបន្តួចពីផ្ទះ រត់ឡើងអូប័រ ដែលឆ្មាំសមុទ្ទបានប្រមូលកម្លាំងមកចាំនៅកំពង់ផែ ដើម្បីជម្លៀសប្រជាជនចេញ ពីការគំរាមកំហែងភ្លើងឆេះព្រៃ និងឆេះរោងចក្រអគ្គីសនី។
អាជ្ញាធរមូលដ្ឋាន ដែលកំពុងចាប់ផ្តើមជម្លៀសរោងចក្រទាំងស្រុង បានធានាអះអាងថា ដើម្បីត្រៀមការពារ អាងស្តុកបំរុងអ៊ីដ្រូសែន ដែលប្រើសម្រាប់បញ្ចុះកម្តៅម៉ាស៊ីនផលិតអគ្គីសនីបានចាក់ចេញអស់ និងចាក់ទឹកបំពេញជំនួសវិញហើយ។ ប៉ុន្តែអាជ្ញាធរនៅតែព្រួយបារម្ភខ្លាំង។ បើភ្លើងមកដល់ នឹងមានការឆេះការរាលដាលខ្លាំង ព្រោះរោងចក្រអគ្គីសនីនេះ ដើរដោយធ្យូង និងប្រេងម៉ាហ្សូត ដែលមានទុកនៅផ្នែកខាងក្នុងជាច្រើនពាន់តោន។
បើតាមរូបភាពវីដេអូ ថតបង្ហោះដោយអភិបាលស្រុក ភ្លើងព្រៃកំពុងរំកិលមកយ៉ាងលឿន ដល់មាត់ច្រក និងព័ទ្ធជុំជិតរោងចក្រអគ្គីសនីហើយ។ លោកអភិបាលបានអង្វរសុំរដ្ឋាភិបាលបញ្ជូនជំនួយជាយន្តហោះពន្លត់អគ្គីភ័យឱ្យបានបន្ទាន់បំផុត។
រងការរិះគន់ថាមានចំណាត់ការមិនល្អប្រឆាំងនឹងភ្លើងឆេះព្រៃ ដោយពុំរួសរាន់សុំនិងទទួលយកជំនួយពីអន្តរជាតិ លោកប្រធានាធិបតីតួកគី អែរដូហ្កាន បានថ្លែង ក្នុងបទសម្ភាសន៍ដោយផ្ទាល់តាមកញ្ចក់ទូរទស្សន៍ទទួលស្គាល់ថា រោងចក្រអគ្គីសនីនៅក្រុងមីឡាសMilasនេះ ទំនងជានឹងអាចត្រូវឆេះអស់សង្គោះមិនទាន់។
នេះជាមហន្តរាយឆេះព្រៃដ៏ធំកំណាចពុំធ្លាប់ជួបប្រទះទេនៅតួកគី។ បើតាមរូបភាពផ្កាយរណបរបស់សហភាពអឺរ៉ុប អំណាចភ្លើងឆេះព្រៃដែលចាប់ឆេះតាំងពីសប្តាហ៍មុនមក មានកម្លាំងរាលដាលយ៉ាងលឿនស្លេវ មិនធ្លាប់មានទេគិតចាប់តាំងពីឆ្នាំ២០០៣មក។ សម្រាប់អ្នកជំនាញ មហន្តរាយនេះបណ្តាលមកពីសីតុណ្ហភាពឡើងក្តៅខ្លាំង (៤៥អង្សាកន្លះ នៅសប្តាហ៍នេះ) ដែលមានពាក់ព័ន្ធនឹងការឡើងកម្តៅនៃភពផែនដី។ ការប្រែប្រួលអាកាសធាតុ នឹងបង្កើនគ្រោះភ្លើងឆេះព្រៃកាន់តែញយនិងកាន់តែសាហាវនៅក្នុងប្រទេសដូចយ៉ាងតួកគី។ នេះបើតាមអ្នកជំនាញអាកាសធាតុដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ