ស៊ីប៖មានស្លាប់យ៉ាងតិច ៤នាក់នៅក្នុងគ្រោះថ្នាក់ភ្លើងឆេះព្រៃត្រូដូសស្ថិតប៉ែកខាងត្បូង
នៅក្នុងប្រទេសស៊ីប ព្រៃត្រូដូសស្ថិតប៉ែកខាងត្បូងប្រទេសបានរងការឆាបឆេះតាំងពីថ្ងៃសៅរ៍ ទី៣ កក្កដា។ រដ្ឋអំណាចបានប្រកាសក្នុងថ្ងៃអាទិត្យ ទី៤ កក្កដាពីការស្លាប់មនុស្សចំនួន ៤នាក់ជាជនជាតិអេហ្ស៊ីបនៅក្នុងព្រឹត្តិការណ៍នោះ។ ចំណែកប្រធានាធិបតីលោកនីកូស អាណាស្តាស៊ីយ៉ាដបានចាត់ទុកភ្លើងឆេះព្រៃពេលនេះជាសោកនាដកម្មមួយដ៏អាក្រក់ និងដ៏ធំតាំងពីស៊ីបត្រូវបានពុះចែកជាពីរក្នុងឆ្នាំ ១៩៧៤។
ចុះផ្សាយនៅថ្ងៃ៖
ស្តាប់ - ០២:២៥
អណ្តាតភ្លើងបានចាប់ផ្តើមពីប៉ែកខាងជើងនៃស្រុកកំពង់ផែលីម៉ាសុលនាថ្ងៃសៅរ៍ ទី៣ កក្កដា មុននឹងឆ្លងទៅឆាបឆេះដល់ប៉ែកខាងត្បូងនៃព្រៃត្រូដូសដែលត្រូវបានស៊ីបចាត់ទុកជាបេះដូងបៃតងដ៏សំខាន់។ « ជាសោកនាដកម្មមួយដ៏ធំគិតតាំងពីឆ្នាំ ១៩៧៤ » នេះជាឃ្លារបស់ប្រធានាធិបតីលោកនីកូស អាណាស្តាស៊ីយ៉ាដនៅក្នុងទំព័របណ្តាញសង្គម Twitter។ ការលើកឡើងនូវឆ្នាំ ១៩៧៤ ព្រោះជាឆ្នាំដែលស៊ីបត្រូវបានពុះចែកជាពីរ។ លោកអាណាស្តាស៊ីយ៉ាដបានបន្ថែមថា មានការបាត់បង់ជីវិតមនុស្ស កម្មសិទ្ធិ ដីធ្លី និងព្រៃឈើនៅក្នុងព្រឹត្តិការណ៍ឆេះព្រៃពេលនេះ។ តែលោកអាណាស្តាស៊ីយ៉ាដមិនភ្លេចបញ្ជាក់ទេថា រដ្ឋាភិបាលនឹងជួយជនរងគ្រោះ និងសាច់ញាតិរបស់ជនរងគ្រោះភ្លាមៗ។
បើតាមលោកនីកូស អាណាស្តាស៊ីយ៉ាដ មានផ្ទៃព្រៃជាង ៥៥គីឡូម៉ែត្រការ៉េត្រូវបានអណ្តាតភ្លើងលេបយក និងថា ស្ថានការណ៍បានស្ថិតក្នុងការគ្រប់គ្រងមួយផ្នែក។ តែលោកបានព្រមានពីសន្ទុះនៃការឆាបឆេះដោយសារកំណើនឥទ្ធិពលខ្យល់។ ចំណែករដ្ឋមន្រ្តីក្រសួងមហាផ្ទៃលោកនីកូស នូរីសបានប្រកាសថា មានសាកសពខ្លោចដោយភ្លើងឆេះចំនួន ៤នាក់ជាជនជាតិអេហ្ស៊ីបត្រូវបានរកឃើញនៅក្បែរស្រុកអូដូសស្ថិតក្នុងតំបន់ឡារណាកា។ អត្តសញ្ញាណសាកសពទាំង ៤នាក់នេះក៏ត្រូវបានបញ្ជាក់ពីក្រសួងការបរទេសអេហ្ស៊ីបក្នុងថ្ងៃអាទិត្យ ទី៤ កក្កដាដោយបន្ថែមថា ជនជាតិអេហ្ស៊ីបស្លាប់ទាំង ៤នាក់ជាពលករធ្វើការក្នុងប្រទេសស៊ីប។
ជាកូនប្រទេសតូចមួយស្ថិតក្នុងសហភាពអឺរ៉ុប ស៊ីបឧស្សាហ៍ស្គាល់ភ្លើងឆេះព្រៃនៅក្នុងរដូវក្តៅដែលមានរយៈពេលពីខែមិថុនាដល់ខែតុលាដោយមានសីតុណ្ហភាពក្តៅខ្លាំង។ ក្នុងរយៈពេលប៉ុន្មានថ្ងៃចុងក្រោយនេះ ស៊ីបបានស្គាល់សីតុណ្ហភាពលើសពី ៤០អង្សារ។ ប្រឈមនឹងមហាសោកនាដកម្មភ្លើងឆេះព្រៃពេលនេះ រដ្ឋាភិបាលក្រុងនីកូស៊ីបានអំពាវនាវរកជំនួយអន្តរជាតិតាំងពីយប់ថ្ងៃសៅរ៍ ទី៣ កក្កដា។ ប្រទេសក្រិក និងអ៊ីតាលីបានឆ្លើយតបនឹងការអំពាវនាវរបស់ស៊ីបនៅក្នុងក្របខណ្ឌនៃយន្តការអឺរ៉ុបដោយបានបញ្ជូនយន្តហោះពន្លត់អគ្កីភ័យ។ ចំណែកអ៊ីស្រាអែលជាប្រទេសជិតខាងបានបញ្ជូនយន្តហោះពន្លត់អគ្កីភ័យចំនួនពីរគ្រឿង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ