លោកប្រធានាធិបតីអ៊ែរដូហ្កាន៖ តួកគី និងរុស្ស៊ី អាចចាប់ដៃគ្នា ក្នុងវិស័យឧស្សាហកម្មផលិតយន្តហោះចម្បាំង
នៅក្រោយជំនួបជាមួយប្រមុខរដ្ឋរុស្ស៊ី លោកវ្លាឌីមៀរ ពូទីន លោកប្រធានាធិបតីតួកគី អ៊ែរដូហ្កាន បានមានប្រសាសន៍ថា រុស្ស៊ី និងតួកគីអាចចាប់ដៃ សហការគ្នា ផលិតយន្តហោះចម្បាំង និងនាវាមុជទឹក។ នេះបើតាមការចុះផ្សាយរបស់ទីភ្នាក់ងារព័ត៌មានរដ្ឋតួកគី កាលពីថ្ងៃព្រហស្បតិ៍ ទី ៣០កញ្ញា។ ដំណឹងនេះប្រាកដជានឹងធ្វើឲ្យអាមេរិក សម្ព័ន្ធមិត្តរបស់តួកគី ក្នុងអង្គការអូតង់ អាក់អន់ មិនសប្បាយចិត្ត។
ចុះផ្សាយនៅថ្ងៃ៖
ស្តាប់ - ០២:៥៧
នៅក្នុងដំណើរវិលត្រលប់ពីទីក្រុងSutchi ជាទីដែលលោកបានជួបពិភាក្សាទ្វេភាគីជាមួយ ប្រធានាធិបតីរុស្ស៊ី មេដឹកនាំតួកគី លោកអ៊ែរដូហ្កានបាននិយាយប្រាប់អ្នកកាសែតពីគម្រោងសហប្រតិបត្តិការយោធា រុស្ស៊ី-តួកគី។
តាមប្រធានាធិបតីតួកគី ដែលស្រង់សំដីដោយទីភ្នាក់ងារព័ត៌មានផ្លូវរដ្ឋតួកគី Anadolu លោកនិងប្រធានាធិបតីរុស្ស៊ីបានពិភាក្សាគ្នាពីរឿងជាច្រើនដែលប្រទេសទាំងពីរអាចធ្វើរួមគ្នា ដែលមាន តាំងពីការសាងសង់ម៉ាស៊ីនយន្តហោះ យន្តហោះចម្បាំង និងនាវាចម្បាំង ហើយបើសិនអាចទៅរួច ប្រទេសទាំងពីរអាចសហការគ្នាដើម្បីផលិតនាវាមុជទឹកទៀត។
ទាក់ទងនឹងសហប្រតិបត្តិការយោធារុស្ស៊ី-តួកគី ប្រមុខដឹកនាំតួកគីបានបញ្ជាក់ថា តួកគីមិនអាចដើរថយក្រោយ ប្តូរចិត្ត ក្នុងសំណុំរឿងទិញ ប្រព័ន្ធខែលមីស៊ីលប្រភេទ S-400 ពី ប្រទេសរុស្ស៊ី នោះទេ។ ការអះអាង បញ្ជាក់របស់ប្រធានាធិបតីតួកគីនឹងអាចធ្វើឲ្យទំនាក់ទំនងតួកគី ជាមួយ អាមេរិកកាន់តែ តានតឹងមួយកំរិតទៀត។ ដោយសារតែ តួកគីបញ្ជាទិញប្រព័ន្ធខែលមីស៊ីលរបស់រុស្ស៊ី វ៉ាស៊ីនតោនបានសម្រេចដាក់ទណ្ឌកម្មអង់ការ៉ា កាលពីឆ្នាំមុន ដោយបានដកអង់ការ៉ា ចេញពីកម្មវិធីផលិតយន្តហោះចម្បាំង ទំនើបរបស់អាមេរិក ប្រភេទF -35។ អាមេរិកធ្លាប់បានលើកហេតុផលថា ការណ៍ដែលតួកគី សមាជិករបស់សម្ព័ន្ធអូតង់ ទិញប្រព័ន្ធខែលមីស៊ីលរុស្ស៊ីមកបំពាក់ឲ្យកងទ័ពរបស់ខ្លួន គឺជារឿងមិនសមស្របនឹងគោលនយោបាយរបស់អូតង់ទាល់តែសោះ។ ម្យ៉ាង អាមេរិកខ្លាចថា រុស្ស៊ីអាចប្រើប្រព័ន្ធខែលមីស៊ីល តាំងទីនៅទឹកដីតួកគី ដើម្បីចូលលួចយក បច្ចេកវិទ្យាសម្ងាត់របស់អាមេរិក។
ថ្លែងទៅកាន់ក្រុមអ្នកកាសែត ដែលមានវត្តមានក្នុងយន្តហោះ កាលពីថ្ងៃព្រហស្បតិ៍ លោកប្រធានាធិបតីតួកគី បានអំពាវនាវឲ្យសម្ព័ន្ធមិត្តអាមេរិក ត្រូវសម្រេចបញ្ជូន យន្តហោះចម្បាំង ឬត្រូវសងលុយជាង ១,៤ពាន់លានដុល្លារ ដែលតួកគីបានផ្តល់ទៅឲ្យភាគីអាមេរិកសម្រាប់កិច្ចសន្យាទិញយន្តហោះចម្បាំង ប្រភេទ F-35។
អាមេរិក និងតួកគី ដែលជាសមាជិកដូចគ្នា ក្នុងសម្ព័ន្ធអូតង់ មានទំនាក់ទំនង មិនរលូនល្អ ចាប់តាំងពីតួកគី សម្រេចទិញប្រព័ន្ធខែលមីស៊ីលរុស្ស៊ី។ នៅសប្តាហ៍មុន លោកប្រធានាធិបតីតួកគី បានបញ្ជាក់ថា ទំនាក់ទំនាក់ជាមួយ រដ្ឋបាលលោកចូ បៃដិន ក៏មិនបានល្អប្រសើរជាងមុនដែរ។
តានតឹងជាមួយសមាជិកអូតង់ ដូចជាអាមេរិក ក្រិក បារាំង តួកគីបានងាកទៅត្រូវរ៉ូវជាមួយ រុស្ស៊ី ដែលតាមពិតជាគូប្រជែង របស់តួកគី ក្នុងសង្រ្គាមស៊ីវិល ស៊ីរី និងលីប៊ី។ នៅពេល តួកគី និងរុស្ស៊ី ជាគូប្រជែងក្នុងតំបន់ ដោយ ម្ខាងៗ គាំទ្រភាគី ជម្លោះរៀងៗខ្លួន តួកគី និងរុស្ស៊ី នៅតែរក្សាទំនាក់ទំនងល្អ សម្រាប់ផលប្រយោជន៍សេដ្ឋកិច្ច និងយុទ្ធសាស្រ្តរួមគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ