លោកអ៊ែរដូហ្កាន៖តួកគីនឹងមិនរង់ចាំការអនុញ្ញាតពីអាមេរិកដើម្បីបើកប្រតិបត្តិថ្មីនៅស៊ីរីទេ
ប្រធានាធិបតីតួកគីលោកអ៊ែរដូហ្កានបានថ្លែងថា តួកគីនឹងមិនរង់ចាំការអនុញ្ញាតពីអាមេរិកដើម្បីបើកប្រតិបត្តិការថ្មីនៅក្នុងប្រទេសស៊ីរីទេ។ ប្រតិបត្តិការថ្មីដែលលោកអ៊ែរដូហ្កានចង់និយាយនេះ គឺគម្រោងវាយប្រហារផ្លូវយោធាទៅលើក្រុមប្រដាប់អាវុធគួដឌីស្ថាននៅប៉ែកខាងជើងស៊ីរីដែលលោកបានប្រកាសក្នុងថ្ងៃចន្ទ ទី២៣ ឧសភា និងដែលអាមេរិកបានសម្តែងក្តីបារម្ភជាពន់ពេកក្នុងថ្ងៃអង្គារ ទី២៤ ឧសភា។ ដោយឡែក លោកអ៊ែរដូហ្កានបានចោទជាថ្មីលើប្រទេសហ្វាំងឡង់ និងស៊ុយអែតពីបទគាំទ្រ និងផ្តល់ជម្រកឲ្យសកម្មជនគួដឌីស្ថានរបស់គណបក្ស PKK។
ចុះផ្សាយនៅថ្ងៃ៖
ស្តាប់ - ០២:១៨
« គេមិនអាចបើកយុទ្ធនាការប្រឆាំងភេរវនិយមដោយរង់ការអនុញ្ញាតពីអ្នកណាម្នាក់ទេ » នេះជាការលើកឡើងរបស់ប្រធានាធិបតីតួកគីលោកអ៊ែរដូហ្កានទៅកាន់ក្រុមអ្នកកាសែតនៅពេលលោកត្រឡប់ពីទស្សនកិច្ចនៅក្នុងប្រទេសអាស៊ែបៃហ្សង់។ លោកអ៊ែរដូហ្កានបានចោទជាសំណួរ និងផ្តល់ចម្លើយខ្លួនឯងថា « តើយើងនឹងធ្វើអ្វី បើអាមេរិកមិនចូលរួមនៅក្នុងយុទ្ធនាការប្រឆាំងភេរវនិយម?។ យើងនឹងចាត់ការដោយខ្លួនឯង »។ ប្រតិកម្មរបស់មនុស្សខ្លាំងតួកគីរូបនេះជាការឆ្លើយតបនឹងក្តីបារម្ភរបស់អាមេរិកក្នុងថ្ងៃអង្គារ ទី២៤ ឧសភា។ តាមពិត ក្តីបារម្ភរបស់អាមេរិកបានធ្វើឡើង ក្រោយពីលោកអ៊ែរដូហ្កានបានប្រកាសក្នុងថ្ងៃចន្ទ ទី២៣ ឧសភាថា តួកគីនឹងបើកការវាយប្រហារជាថ្មីនៅប៉ែកខាងជើងស៊ីរី។
គួររម្លឹកថាគិតតាំងពីឆ្នាំ ២០១៦ តួកគីធ្លាប់បានបើកការវាយប្រហារនៅប៉ែកខាងជើងស៊ីរីចំនួន ៣ដងទៅលើក្រុមប្រដាប់អាវុធគួដឌីស្ថានដែលតួកគីចាត់ទុកជាក្រុមភេរវជន។ តែក្រោមភ្នែក ច្រមុះរបស់អាមេរិក ក្រុមប្រដាប់អាវុធគួដឌីស្ថាននៅប៉ែកខាងជើងស៊ីរីនេះបានចូលរួមប្រយុទ្ធប្រឆាំងនឹងពួកជីហាតអង្គការរដ្ឋអ៊ីស្លាម។ ដោយឡែក លោកអ៊ែរដូហ្កានក៏ត្រូវបានអ្នកកាសែតចោទសួរពីរឿងសុំចូលអង្គការអូតង់របស់ប្រទេសហ្វាំងឡង់ និងស៊ុយអែតដែលតួកគីកំពុងជំទាស់នៅពេលនេះ។ តាមលោកអ៊ែរដូហ្កាន កិច្ចចរចាក្នុងទីក្រុងអង់ការ៉ាកាលពីថ្ងៃពុធ ទី២៥ ឧសភារវាងគណៈប្រតិភូតួកគី ហ្វាំងឡង់ និងស៊ុយអែតមិនបានហុចលទ្ធផលដូចដែលតួកគីបានរង់ចាំទេ។
ជាថ្មីម្តងទៀត លោកអ៊ែរដូហ្កានបានចោទហ្វាំងឡង់ និងស៊ុយអែតពីបទបានគាំទ្រភេរវនិយម ពិសេសចង្អុលមុខស៊ុយអែតដែលបានផ្តល់ជម្រកឲ្យក្រុមសកម្មជនគួដឌីស្ថាន PKK ដែលតួកគីចាត់ទុកដូចជាអង្គការភេរវនិយមមួយ។ លោកអ៊ែរដូហ្កានយល់ថា ស៊ុយអែតមិនទៀងត្រង់ និងស្មោះមិនពិត។ ទាក់ទងនឹងសង្រ្គាមរុស្ស៊ីឈ្លានពានអ៊ុយក្រែនត្រូវបានលោកអ៊ែរដូហ្កានបញ្ជាក់ថា លោកចង់ឃើញសង្រ្គាមមួយនេះចប់ឆាប់ៗដែលអាចធ្វើបាន និងថា លោកនឹងបន្តលើកទឹកចិត្តឲ្យភាគីទាំងអស់ងាកទៅរកដំណោះស្រាយបញ្ហាតាមកាណាល់កិច្ចសន្ទនា និងកាណាល់ការទូត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ