រុស្ស៊ីប្រកាសថា កិច្ចព្រមព្រៀងនាំចេញគ្រាប់ធញ្ញជាតិជាមួយអ៊ុយក្រែន បានដល់ថ្ងៃអវសានហើយ
វិមានក្រេមឡាំង បានប្រកាសឲ្យដឹង កាលពីថ្ងៃចន្ទទី១៧កក្កដាថា កិច្ចព្រមព្រៀងនាំចេញគ្រាប់ធញ្ញជាតិ ដែលរុស្ស៊ីបានចុះជាមួយអ៊ុយក្រែន ត្រូវបានចប់ហើយ។ ភាគីរុស្ស៊ី អាចនឹងត្រលប់មកចរចា ធ្វើកិច្ចព្រមព្រៀងនេះម្តងទៀត នៅពេលណាភាគីគេ គិតថាវាមានប្រយោជន៍។
ចុះផ្សាយនៅថ្ងៃ៖
ស្តាប់ - ០២:៣៥
លោក ឌីមីទ្រី ប៉េសកូវ អ្នកនាំពាក្យវិមានក្រេមឡាំង បានបញ្ជាក់ឲ្យដឹងថា កិច្ចព្រមព្រៀងនាំចេញគ្រាប់ធញ្ញជាតិតាមច្រកសមុទ្រខ្មៅ គឺត្រូវចប់ជាស្ថាពរហើយ នៅថ្ងៃចន្ទ ទី១៧កក្កដា។ លោកបន្ថែមថា រុស្ស៊ីអាចនឹងត្រលប់មកក្នុងកិច្ចព្រមព្រៀងនេះវិញ ល្គឹកណារុស្ស៊ីគិតឃើញថា វាមានប្រយោជន៍ ហើយបំពេញតាមលក្ខខណ្ឌរបស់រុស្ស៊ី។
គួរកត់សំគាល់ថា លោកពូទីន ប្រធានាធិបតីរុស្ស៊ី បានលើកឡើងជាច្រើនដង ថាធាតុពិតកិច្ចព្រមព្រៀងនាំចេញគ្រាប់ធញ្ញជាតិអ៊ុយក្រែននេះ គឺរុស្ស៊ីមិនបានទទួលផលអ្វីទេ ព្រោះផលិតផលចំណីអាហារ និងជីកសិកម្មរបស់រុស្ស៊ី នៅតែត្រូវបានគេរារាំង មិនឲ្យនាំចេញដដែលជាដដែល។ កាលពីថ្ងៃសៅរ៍កន្លងទៅ លោកពូទីន បានលើកឡើងថា កម្មវត្ថុដែលកំណត់ដោយកិច្ចព្រមព្រៀងនេះ ថាដើម្បីជួយប្រទេសក្រីក្រនៅអាហ្វ្រិក ឲ្យទទួលបានគ្រាប់ធញ្ញជាតិស្បៀងអាហារនោះ គឺវាគ្មានលក្ខណៈប្រាកដនិយមទេ។
សូមបញ្ជាក់ថា ការប្រកាសរបស់វិមានក្រេមឡាំង ស្តីពីការបិទបញ្ចប់កិច្ចព្រមព្រៀងនាំចេញគ្រាប់ធញ្ញជាតិអ៊ុយក្រែន គឺត្រូវបានធ្វើឡើងប៉ុន្មានម៉ោង មុនពេលដែលកិច្ចព្រមព្រៀងនេះអស់សុពលភាព។ គួររំលឹកថា កិច្ចព្រមព្រៀងនេះ ត្រូវបានចុះហត្ថលេខាដោយភាគីជម្លោះទាំង២ កាលពីខែកក្កដា ឆ្នាំ២០២២ ដោយមានការជ្រោមជ្រែងសម្របសម្រួល ពីតួកគី និងអង្គការសហប្រជាជាតិ។ ប្រមាណមួយឆ្នាំមកនេះ កិច្ចព្រមព្រៀងនេះបានអនុញ្ញាតិឲ្យអ៊ុយក្រែន អាចនាំចេញគ្រាប់ធញ្ញជាតិ មានដូចជាស្រូវសាឡី និងគ្រាប់ពោត ចំនួនសរុបប្រមាណ៣៣លានតោន ឆ្ពោះទៅកាន់ប្រទេសជាច្រើននៅអាហ្វ្រិក ដែលប្រឈមខ្លាំងបំផុតនឹងគ្រោះទុរ្ភឹក្ស។
ថ្វីត្បិតតែក្រេមឡាំងបានប្រកាសថា កិច្ចព្រមព្រៀងនេះត្រូវចូលជាអវសានហើយក្តី លោកប្រធានាធិបតីតួកគី អ៊ែរដូហ្កាន់ បានអះអាងថា លោកមានជំនឿចិត្តថា លោកពូទីនដែលមិត្តស្និទស្នាលរបស់លោក មានចេតនាបន្តកិច្ចព្រមព្រៀងនេះទៅមុខទៀត។
ដោយឡែក លោកស្រីវុនឌឺឡេយែន ប្រធានគណកម្មការអឺរ៉ុប បានសរសេរលើបណ្តាញ Twitter ដោយបរិហារភាគីរុស្ស៊ីថា គ្មានចិត្តធម៌មេត្តា មិនខ្វល់ចំពោះការប្រឹងប្រែងរបស់តួកគី និងអង្គការសហប្រជាជាតិ ក្នុងការបើកផ្លូវដឹកគ្រាប់ធញ្ញជាតិអ៊ុយក្រែនចេញទៅប្រទេសក្រីក្រ។ លោកស្រីបានបន្តថា សហភាពអឺរ៉ុបនឹងបន្តប្រឹងប្រែង ដើម្បីធានាការពារសន្តិសុខស្បៀងអាហារ របស់ប្រជាជននៅតាមបណ្តាប្រទេសក្រីក្រ។ ដូចគ្នាដែរ អង់គ្លេសនិងហូឡង់ បានបរិហារថាការសម្រេចរបស់ភាគីរុស្ស៊ី មិនបន្តកិច្ចព្រមព្រៀងនេះ គឺជាការសម្រេចដ៏អមនុស្សធម៌ ព្រោះវានឹងបង្អត់អាហារមនុស្សជាច្រើនលាននាក់នៅទូទាំងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ