កងទ័ពអ៊ីស្រាអែល និងពួកជ្រុលនិយមប៉ាឡែស្ទីន Hamasប្រយុទ្ធគ្នាជាថ្មី
កងទ័ពអ៊ីស្រាអែលនិងពួកជ្រុលនិយមប៉ាឡែស្ទីនHamasប្រយុទ្ធគ្នាជា ថ្មី តាំងពីថ្ងៃព្រហស្បតិ៍ទី១៨សីហាម្សិលមិញមក អំពើហិង្សាបានផ្តើមឡើងវិញរវាងអ៊ីស្រាអែលនិងពួកជ្រុលនិយម ប៉ាឡែស្ទីនHamas នៃតំបន់Gaza។ អ្វីៗក៏ប្រព្រឹត្តទៅដូចពេលមុនៗដែរ។ ភេរវជនប៉ាឡែស្ទីនវាយប្រហារមកលើអ៊ីស្រាអែល រួចហើយអ៊ីស្រាអែលឆ្លើយតបតវិញ តាមរយៈការទម្លាក់គ្រាប់បែកឬការប្រើកាំភ្លើងធំទៅលើពួកជ្រុល និយមប៉ាឡែស្ទីននៃចលនាHamas។
ចុះផ្សាយនៅថ្ងៃ៖
ស្តាប់ - ០១:០៤
ថ្ងៃព្រហស្បតិ៍ទី១៨សីហាម្សិលមិញ ពួកភេរវជនប៉ាឡែស្ទីនជាច្រើនក្រុមបានបើកការវាយប្រហារចំនួនបីដំណាលគ្នាទៅលើប្រជាជនស៊ីវិល ប៉ូលីស និងទាហានអ៊ីស្រាអែល នៅEilat ប៉ែកខាងត្បូងនៃប្រទេស។ អំពើភេរវកម្មទាំងនេះបានបណ្តាលឲ្យមានស្លាប់ប្រាំមួយនាក់និងរបួសម្ភៃប្លាយនាក់ នៅខាងអ៊ីស្រាអែល។
ភ្លាមៗនោះ រដ្ឋមន្ត្រីក្រសួងការពារជាតិអ៊ីស្រាអែលចោទថា ពួកភេរវជនបានចេញមកពីGaza ដែលជាដែនដីប៉ាឡែស្ទីន កាន់កាប់ដោយពួកជ្រុលនិយម Hamas។ ពួកHamasបានច្រានចោលការចោទប្រកាន់នេះ។ យ៉ាងណាក៏ដោយ កាលពីយប់មិញ ឧទ្ធម្ភាគចក្ររបស់អ៊ីស្រាអែលបានធ្វើការវាយប្រហារទៅលើតំបន់Gaza ជាអាទិ៍ទៅលើRafah ដែលនៅជាប់នឹងព្រំដែនប្រទេសអេហ្ស៊ីប និងទៅលើជំរំហ្វឹកហាត់យោធារបស់ពួកHamasចំនួនពីរកន្លែង។ ការវាយប្រហារតបតវិញរបស់អ៊ីស្រាអែល បានបណ្តាលឲ្យមានស្លាប់ជិតដប់នាក់និងរបួសប្រមាណជិតម្ភៃនាក់ នៅថ្ងៃសុក្រទី១៩សីហានេះ។
តាំងពីព្រឹកមិញមក គ្រាប់កាំភ្លើងធំជាច្រើនគ្រាប់បាញ់ចេញពីតំបន់Gaza បានធ្លាក់ទៅលើប៉ែកខាងត្បូងនៃប្រទេសអ៊ីស្រាអែល។ តាមមើលទៅ អំពើហិង្សាលើកនេះរវាងអ៊ីស្រាអែលនិងប៉ាឡែស្ទីន អាចនឹងបន្តជាច្រើនថ្ងៃទៅមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ