ក្រុមបះបោរស៊ីរីក្តោបក្តាប់ប៉ុស្តឹ៍ព្រំដែន ប៉ុន្តែដកខ្លួនថយនៅទីក្រុងដាម៉ាស
កងកម្លាំងយោធាស៊ីរី ដោយមានជំនួយរថក្រោះជាច្រើនគ្រឿងផង បានធ្វើការវាយលុកនៅថ្ងៃអាទិត្យទី២២កក្កដានេះដើម្បីដណ្តើមយកមកវិញ នូវសង្កាត់ជាច្រើននៃទីក្រុងដាម៉ាសនិងទីក្រុងអាឡេប ក្រោយពីកងកម្លាំងយោធាស៊ីរីសេរីបានទទួលជោគជ័យកាលពីសប្តាហ៍មុន។ សង្គ្រាមនៅស៊ីរីដែលបានបណ្តាលឲ្យមានមនុស្សស្លាប់ប្រមាណ១៩ ០០០នាក់ក្នុងរយៈកាល១៦ខែ នេះបើយោងតាមតួលេខរបស់អង្គការក្រៅរដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
នៅថ្ងៃអាទិត្យទី២២កក្កដាឆ្នាំ២០១២នេះ ប្រទេសកាតារត្រូវរៀបចំទទួលជំនួបប្រជុំថ្នាក់រដ្ឋមន្ត្រីនៃគណៈកម្មាធិការអារ៉ាប់ដែលតាមត្រួតពិនិត្យស្ថានការណ៍នៅប្រទេសស៊ីរី។ អំណាចក្តោបក្តាប់ដោយប្រធានាធិបតីផ្តាច់ការបាស្ហារអាល-អាស្សាដបានស្គាល់ការរង្គោះរង្គើ ក្រោយពីមានការវាយប្រហារដ៏ហិង្សារបស់ពួកបះបោរប្រឆាំងនៅទីក្រុងដាម៉ាស ដែលបានបណ្តាលឲ្យសហការីជំនិតបួនរូបរបស់បាស្ហារអាល-អាស្សាដបាត់បង់ជីវិត។
នៅក្នុងរដ្ឋធានីដាម៉ាសវិញ កងកម្លាំងយោធាស៊ីរីកំពុងធ្វើការវាយលុកនិងបោសសម្អាតសង្កាត់មួយចំនួនដូចជា សង្កាត់ Qaboune ឋិតនៅប៉ែកខាងកើត នេះបើយោងតាមទីភ្នាក់ងារផ្លូវការសាណា។ នៅសង្កាត់បារហ្សេឯណោះ ទាហានរបស់ បាស្ហារអាល-អាស្សាដ ដោយមានជំនួយទម្លាក់គ្រាប់បែកពីឧទ្ធម្ភាគចគ្រផង បានធ្វើការវាយលុកយ៉ាងហិង្សានៅព្រឹកថ្ងៃអាទិត្យនេះ។
ការវាយលុករបស់កងកម្លាំងយោធាស៊ីរីនៅទីក្រុងដាម៉ាសនិងនៅទីក្រុងអាឡេបដែលជាទីក្រុងសំខាន់ទីពីររបស់ប្រទេសស៊ីរីក្នុងរយៈពេលពីរថ្ងៃចុងក្រោយនេះ បានបណ្តាលឲ្យមានមនុស្សស្លាប់ប្រមាណ១៣០នាក់។
កងកម្លាំងយោធាស៊ីរីនៅបន្តធ្វើការបោសសម្អាតនៅតាមសង្កាត់ជាច្រើននៃរដ្ឋធានីដាម៉ាស ដែលជីវភាពរស់នៅជួបនឹងការលំបាកកាន់តែខ្លាំងឡើងៗ។ ហាងលក់ទំនិញគ្មានទំនិញលក់ នំប៉័ងក៏មានកង្វះខាត ប្រជាជននាំគ្នាពួនសម្ងំក្នុងផ្ទះ។
នៅពេលដែលការទម្លាក់គ្រាប់បែកមានភាពធូរស្បើយ ប្រជាជននាំគ្នាចេញមករកទិញចំណីអាហារ នៅតាមហាងលក់ទំនិញខ្លះៗដែលនៅបើកទ្វារ។ ជាពិសេសនៅពេលនេះដែលជាពិធីតមអាហារ “រ៉ាម៉ាដង់” ដ៏សក្ការៈរបស់អ្នកកាន់សាសនាអ៊ីស្លាម។
នៅឯព្រំដែនជាប់នឹងប្រទេសលីបង់ អ៊ីរ៉ាក់ ហ្សរដានីឯណោះ គេឃើញមានប្រជាជនស៊ីរីរាប់ម៉ឺននាក់បាននាំគ្នារត់ភៀសខ្លួនគេចចៀសពីសង្គ្រាម។ បើយោងតាមតួលេខរបស់ទីស្នងការជាន់ខ្ពស់របស់អ.ស.ប.ទទួលបន្ទុកជនភៀសខ្លួន ក្នុងរយៈពេលតែពីរថ្ងៃមានអ្នកភៀសខ្លួនរហូតដល់ទៅប្រមាន៣០ ០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ