ក្រុមប្រឆាំងអាវក្រហមធ្វើបុណ្យរំលឹកខួបថ្ងៃរដ្ឋប្រហារទំលាក់លោកថាក់ស៊ីន
ថ្ងៃនេះ ត្រូវចំនឹងគម្រប់ពេល៤ឆ្នាំ (ថ្ងៃទី ១៩ កញ្ញា ២០០៦ )ដែលលោកថាក់ស៊ីនត្រូវយោធាធ្វើរដ្ឋប្រហារទំលាក់ចេញពីតំណែងនាយក រដ្ឋមន្រ្តីថៃ។ នៅព្រឹកថ្ងៃអាទិត្យនេះ ក្រុមអាវក្រហមដែលប្រឆាំងនឹងរដ្ឋាភិបាលបានធ្វើពិធីបុណ្យរំលឹកដល់ ថ្ងៃរដ្ឋប្រហារយោធាដែលធ្វើឲ្យលោកថាក់ស៊ីនអស់តំណែងផង និងរំលឹកដល់ថ្ងៃមហាបាតុកម្មដែលនៅបំផុតត្រូវបង្រ្កាបដោយហិង្សា ពីសំណាក់យោធារបស់រដ្ឋាភិបាលដឹកនាំដោយលោកអាភីស៊ីត វីចាជីវ៉ា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
ចាប់តាំងពីថ្ងៃសុក្រ ទី ១៧ កញ្ញា មក ក្រុមអាវក្រហមដែលមានចលនាប្រឆាំងនឹងនយោបាយរបស់រដ្ឋាភិបាលថៃបច្ចុប្បន្នចាប់ផ្តើមនាំគ្នាធ្វើពិធីរំលឹកខួបដល់ព្រឹត្តិការណ៍មហាបាតុកម្មរបស់ខ្លួន កាលពី៤ខែមុន នៅកណ្តាលក្រុងបាងកក។ នៅក្នុងក្រុងបាងកក ប្រជាជនអាវក្រហមដែលគាំទ្រគណបក្សរណសិរ្សរួបរួមដើម្បីប្រជាធិបតេយ្យ និងប្រឆាំងនឹងអំពើផ្តាច់ការ នាំគ្នាទៅដោតផ្កាកុលាបក្រហម នៅមុខពន្ធនាគារដែលនៅទីនោះមេដឹកនាំរបស់ពួកគេកំពុងត្រូវតុលាការថៃចាប់ឃុំខ្លួន និងចោទពីបទរៀបចំអំពើភេរវកម្ម។
ពួកក្រុមអាវក្រហមបានទៅជួបជុំគ្នានៅតំបន់សេដ្ឋកិច្ច Ratchaprason ជាទីដែលពួកគេកាន់កាប់រយៈពេលជិត២ខែមុននឹងត្រូវទាហានវាយបំបែកយកបាន។ ការធ្វើបុណ្យរំលឹកដល់អ្នកដែលស្លាប់ជិត១០០នាក់ ក្នុងអំពើហិង្សារបស់កងយោធាថៃ នៅព្រឹកថ្ងៃអាទិត្យនេះ ធ្វើឡើងក្រោមក្រសែភ្នែកតាមដាន ត្រួតពិនិត្យដ៏តឹងតែងរបស់អាជ្ញាធរថៃ។ ដោយសារខ្លាចមានការឡោមព័ទ្ធកាន់កាប់តំបន់ពាណិជ្ជកម្មពីសំណាក់ក្រុមអាវក្រហមដូចលើកមុន អាជ្ញាធរថៃបានពង្រាយកំលាំងជាងពាន់នាក់ ដើម្បីតាមដានមើលសកម្មភាពរបស់ក្រុមអាវក្រហម។
នៅបាងកក ក្រុមបក្សប្រឆាំងផ្តោតច្រើនទៅលើព្រឹត្តិការណ៍ហិង្សា កាលពីខែមេសា និងឧសភា។ ចំណែកនៅក្រុងឈៀងម៉ៃ ដែលជាទីកំណើតរបស់លោកថាក់ស៊ីន គេរំពឹងថា មានប្រជាជនមួយម៉ឺននាក់ចូលរួមរំលឹកដល់ខួប៤ឆ្នាំ ដែលយោធាថៃធ្វើរដ្ឋប្រហារទំលាក់លោកថាក់ស៊ីនចេញពីតំណែង។
នៅព្រឹកថ្ងៃអាទិត្យនេះ លោកថាក់ស៊ីនដែលកំពុងស្ថិតនៅ ក្នុងប្រទេសលីបង់ បានថ្លែងទៅកាន់អ្នកគាំទ្ររបស់លោកឲ្យឈប់មានគំនិតហិង្សា និងក្រលេកមើលទៅអនាគត ពីព្រោះប្រទេសកំពុងតែបោះជំហានទៅមុខ។ ក្នុងសាររបស់ខ្លួនលើកនេះ លោកថាក់ស៊ីនមិនបានលើកទឹកចិត្តអ្នកគាំទ្រធ្វើការប្រឆាំងនឹងរដ្ឋាភិបាលរបស់លោកអាភីស៊ីតដូចមុនទៀតទេ។ នេះហាក់បញ្ជាក់ឲ្យឃើញពីការបន្ទន់ឥរិយាបថមួយកម្រិតរបស់លោកថាក់ស៊ីន និងការអាចបែររកការផ្សះផ្សារជាមួយនឹងរដ្ឋាភិបាលលោកអាភីស៊ីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ