ប្រតិបត្តិការស្រង់តួយន្តហោះAirAsia បរាជ័យជាលើកទីបី
ជាលើកទីពីរ ជាលើកទីបី ការសាកល្បងស្រង់លើកតួយន្តហោះAirAsiaពីបាតសមុទ្ទ ជ្វា ត្រូវជួបបរាជ័យជាថ្មីទៀត នៅថ្ងៃអាទិត្យនេះ។ ដោយហេតុបញ្ហាអាកាសធាតុប្រែប្រួលខ្លាំងនិងតែមួយប៉ប្រិចភ្នែកពេក ខ្សែកាបដែលចងទាញបំណែកយន្តហោះត្រូវដាច់កណ្តាលទី រួចធ្លាក់ទៅបាតសមុទ្ទវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
តាំងពីពីរថ្ងៃមកហើយដែលក្រុមការងារឥណ្ឌូណេស៊ីបានសាកល្បងស្រង់តួយន្តហោះ ដោយប្រើពោងយក្សនិងខ្សែកាបអូស ឱ្យអណ្តែតឡើង ប៉ុន្តែដោយអាកាសធាតុមិនអំណោយផល តួយន្តហោះទើបតែអណ្តែតឡើងបានបន្តិចនិង មិនទាន់បានអូសសណ្តោងផងស្រាប់ខ្សែកាបបានដាច់ បំណែកយន្តហោះក៏ធ្លាក់ចុះទៅក្នុងបាតសមុទ្ទវិញ។
បំណែកយន្តហោះនេះ ជាចំណែកដ៏សំខាន់ ព្រោះមានសាកសពអ្នកដំណើរ ជាប់កុននៅខាងក្នុងច្រើន។ ក្នុងប្រតិបត្តិការថ្ងៃអាទិត្យនេះ គេស្រង់បានតែសាកសពម្នាក់គត់ដែលអណ្តែតចេញពីតួយន្តហោះ ដោយខ្លួនឯង។ យន្តហោះអ៊ែរអាស៊ីយ៉ា ដែលធ្លាក់កាលពីថ្ងៃទី២៨ធ្នូ មានផ្ទុកអ្នកដំណើរសរុប ១៦២នាក់ ក្នុងនោះមានតែ៧០ប៉ុណ្ណោះទើបស្រង់បាន។
នៅថ្ងៃសៅរ៍ ក្រុមសង្គ្រោះឥណ្ឌូណេស៊ី បានសាកល្បងដល់ទៅពីរសា ស្រង់តួយន្តហោះនេះ ប៉ុន្តែត្រូវបរាជ័យដាច់ខ្សែកាបរាល់លើក និងប្រមូលសពបានតែបួននាក់ប៉ុណ្ណោះ។ ក្រុមអ្នកមុជទឹកក៏មិនអាចមុជចូលទៅខាងក្នុងតួយន្តហោះបាន ដោយហេតុភាពងងឹតស្លុបពេក មានខ្សែកាបប្រទាក់ក្រឡាពេញ បំណែកតូចៗដូចជាកៅអីអណ្តែតពេញតួយន្តហោះបាំងផ្លូវជិត។ កាលពីសប្តាហ៍មុន នៅពេលនាវាចម្បាំងឥណ្ឌូណេស៊ីរកឃើញទីតាំងតួយន្តហោះនេះភ្លាម ក្រុមអ្នករុករកមិនអាចធ្វើការកើត ដោយបញ្ហាអាកាសធាតុអាក្រក់ពេក។
សូមបញ្ជាក់ប្រអប់ខ្មៅថតសំឡេងទាំងពីររបស់យន្តហោះ ស្រង់បានហើយ និងកំពុងតែធ្វើវិភាគ ដែលរបាយការណ៍បឋមនឹងត្រូវប្រកាសនៅថ្ងៃពុធទី ២៨មករាខាងមុខនេះ។ រដ្ឋមន្ត្រីក្រសួងដឹកជញ្ជូនឥណ្ឌូណេស៊ី បានព្រលយពាក្យកាលពីថ្ងៃអង្គារមុនថាយន្តហោះបើកក្នុងល្បឿនលឿនជ្រុលមុននឹងធ្លាក់។
ទន្ទឹមគ្នានេះគេបានទទួលព័ត៌មានថា រកឃើញ បំណែកសំខាន់មួយដុំទៀត ដែលទំនងជាក្បាលយន្តហោះ នៅមិនឆ្ងាយប៉ុន្មានពីតួកំពុងស្រង់ពេលនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ