ប៉ាគីស្ថានបង្ហាញឈ្មោះតាលីបង់ដែលព្រមចូលចរចាជាមួយអាហ្វហ្កានីស្ថាន
ប៉ាគីស្ថាន នឹងបង្ហាញបញ្ជីឈ្មោះ តាលីបង់ ដែលត្រៀមខ្លួនចូលតុចរចាសន្តិភាពជាថ្មីជាមួយអាហ្វហ្កានីស្ថាន នាឱកាសជំនួបប្រជុំចតុភាគី ប៉ាគីស្ថាន អាហ្វហ្កានីស្ថាន ចិន និងអាមេរិក នៅទីក្រុងអ៊ីស្លាម៉ាបាដ ថ្ងៃចន្ទទី ១១មករា។ នេះបើតាមប្រភពព័ត៌មានផ្លូវការផ្តល់ដោយអ្នកទទួលខុសត្រូវអាហ្វហ្កានីស្ថាននិងប៉ាគីស្ថាន។
ចុះផ្សាយនៅថ្ងៃ៖
ស្តាប់ - ០១:២៧
ជាជំនួបប្រជុំដ៏សំខាន់ សម្រាប់ផ្តល់សន្ទុះឡើងវិញ ដល់ដំណើរការចរចាសន្តិភាពឱ្យអាហ្វហ្កានីស្ថាន ក្រោយការដួលរលំទៅនៃរបបតាលីបង់ឆ្នាំ២០០១ និងដែលកំពុងរងការវាយប្រហារភេរវកម្មកាន់តែខ្លាំងឡើងៗ។ ប៉ុន្តែគ្មានតំណាងជាន់ខ្ពស់តាលីបង់ណាម្នាក់ មានវត្តមាននៅក្នុងជំនួបប្រជុំនៅថ្ងៃចន្ទទេ ព្រោះកម្មវត្ថុចំបងនៃការជួបពិភាក្សាគ្នានេះ គឺរៀបចំផែនទីចង្អុលផ្លូវមួយ ដើម្បីរុញច្រានធ្វើយ៉ាងណាឱ្យរដ្ឋាភិបាលអាហ្វហ្កានីស្ថាននិងពួកឧទ្ទាមតាលីបង់អាចធ្វើការចរចាគ្នាដោយផ្ទាល់។
ប៉ាគីស្ថាន ដែលជាប់ចោទថាអ្នកការពារនិងផ្គត់ផ្គង់ផ្តល់ជម្រកឱ្យពួកតាលីបង់ បានសន្យាថានឹងបញ្ឈប់ការផ្តល់ហិរញ្ញវត្ថុដល់ពួកតាលីបង់ នៅក្រុង កេតា និងប៉េស្ហាវ៉ា ព្រមទាំងបង្ហាញបញ្ជីឈ្មោះតំណាងតាលីបង់ណាដែលសុខចិត្តចូលខ្លួនមកអង្គុយក្នុងតុចរចា និងឈ្មោះជនប្រឆាំង។ បើតាមអ្នកនាំពាក្យរដ្ឋាភិបាលអាហ្វហ្កានីស្ថាន កាប៊ូលនឹងចរចាជាមួយអ្នកចង់ចរចា និង ប្រើកម្លាំងយោធាផងលើក្រុមអ្នកមិនចង់។
ជំនួបចរចាដោយផ្ទាល់រវាងរដ្ឋាភិបាលអាហ្វហ្កានីស្ថាន និងតាលីបង់ ប្រព្រឹត្តជាលើកទីមួយ កាលពីខែកក្កដាកន្លងទៅនៅទីក្រុងអ៊ីស្លាម៉ាបាដ។ ជុំទីពីរ មិនទាន់អាចចាប់ផ្តើមបាន ជាពិសេសតាំងពីមេកើយចលនាតាលីបង់ ម៉ូឡា អូម៉ា ស្លាប់មក។ ការជ្រើសរើសមេដឹកនាំតាលីបង់ថ្មី កំពុងក្លាយជាសង្គ្រាមផ្ទៃក្នុងដណ្តើមអំណាចគ្នា ជាហេតុធ្វើឱ្យដំណើរការចរចារអាក់រអួលខ្លាំង តែមិនបានរំខានសកម្មភាពវាយប្រហារភេរវកម្មនៅអាហ្វហ្កានីស្ថានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ