ហ្វីលីពីនបានប្រកាសបិទបញ្ចប់កិច្ចចរចាជាមួយពួកឧទ្ទាមកុម្មុយនិស្ត
ប្រធានាធិបតីហ្វីលីពីន លោក ឌុយទែរតេ បានសម្រេចចិត្តនៅថ្ងៃសៅរ៍ម្សិលមិញនេះ បោះបង់ចោលការចរចាសន្តិភាពជាមួយពួកឧទ្ទាមកុម្មុយនិស្ត និងប្រកាសត្រៀមខ្លួនធ្វើសង្គ្រាមប្រដាប់អាវុធ រយៈពេលវែងជាមួយនឹងពួកឧទ្ទាមនេះ។ ទាំងភាគីរដ្ឋាភិបាល និងពួកឧទ្ទាមសុទ្ធបានបរិហារបទឈប់បាញ់ ចូលជាធរមានកាលពី៥ខែមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
កាលពីសប្តាហ៍មុន ពួកឧទ្ទាមកុម្មុយនិស្ត បានប្រកាស មិនគោរពបទឈប់បាញ់ ដែលភាគីបក្ខដិបក្ខ បានប្រកាន់យកជាឯកតោភាគី តាំងពីខែសីហាមក ដើម្បីចរចាសន្តិភាព នៅក្រុងអូស្លូ។ ពីរថ្ងៃក្រោយ កងកម្លាំងរដ្ឋាភិបាលហ្វីលីពីន ក៏បានបរិហារដូចគ្នាបទឈប់បាញ់នោះ។
លោក ឌុយទែរតេ ដែលបានដោះលែងមេឧទ្ទាម ដើម្បីផ្តល់សន្ទុះដល់ការចរចា នៅពេលឡើងកាន់តំណែងភ្លាម បានបញ្ចេញប្រតិកម្មក្រេវក្រោធយ៉ាងខ្លាំង ចំពោះទង្វើរបស់ពួកឧទ្ទាមកុម្មុយនិស្ត ដោយបានព្រមានថា មិនខ្លាចនឹងធ្វើសង្គ្រាម ទោះត្រូវប្រើពេលយូរក៏ដោយ។
ក្រុមអ្នកចរចាបានទទួលបញ្ជាឱ្យវិលត្រលប់មកផ្ទះវិញ ! លោកប្រធានាធិបតីមិនចាប់អារម្មណ៍នឹងចរចាទៀតទេ ហើយបដិសេធមិនទទួលនិយាយជាមួយក្រុមនេះឡើយ។ នេះជាសំដីបញ្ជាក់បន្ថែមរបស់លោកឌុយទែរតេ ដោយបានឆ្លៀតថ្កោលទោស ក្រុមយោធាប្រជាជនថ្មី ដែលជាកម្លាំងទ័ពរបស់ពួកឧទ្ទាមកុម្មុយនិស្ត មានគ្នាប្រមាណបួនពាន់នាក់ ពីបទមនុស្សឃាតលើទាហានហ្វីលីពីនចំនួនបួននាក់កាលពីសប្តាហ៍មុន។
ប៉ុន្តែសម្រាប់ពួកឧទ្ទាម ការបិទបញ្ចប់បទឈប់បាញ់ ក៏ព្រោះតែកងកម្លាំងរដ្ឋាភិបាលក្បត់ និងរំលោភសិទ្ធិមនុស្ស។
សូមបញ្ជាក់ថា ជម្លោះប្រដាប់អាវុធជាមួយទ័ពព្រៃហ្វីលីពីនមានចំណាស់ជាងគេមួយនៅអាស៊ី។ ពួកឧទ្ទាមកុម្មុយនិស្ត ចង់ផ្តួលរំលំរបបមូលធននិយមនៅលើកោះដែលបានធ្វើឱ្យសង្គមមានគម្លាតខ្លាំងរវាងអ្នកមាននិងអ្នកក្រ តាំងពីឆ្នាំ១៩៦៨។ ជម្លោះនេះបានសម្លាប់ជីវិតមនុស្សអស់ប្រមាណ៣ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ