តុលាការម៉ាឡេស៊ីចោទប្រកាន់ជាផ្លូវការស្ត្រីពីរនាក់ពីបទធ្វើឃាតគីមជុងណាម
តុលាការម៉ាឡេស៊ី បានធ្វើការចោទប្រកាន់ នៅថ្ងៃពុធទី ១ មីនា ២០១៧នេះ ស្ត្រីជាប់សង្ស័យពីរនាក់ ជនជាតិឥណ្ឌូណេស៊ីម្នាក់ និងជនជាតិវៀតណាមម្នាក់ ជាពីបទធ្វើឃាតលើរូប គីម ជុងណាម បងប្រុសម្តាយទីទៃរបស់ប្រមុខដឹកនាំកូរ៉េខាងជើង គីម ជុងអ៊ុន កាលពីថ្ងៃទី ១៣ កុម្ភៈ។
ចុះផ្សាយនៅថ្ងៃ៖
ស្តាប់ - ០២:០១
ស៊ីទី អៃស៊ីយ៉ះ Siti Aisyah អាយុ២៥ឆ្នាំ ជាតិឥណ្ឌូណេស៊ី និងនាង ដ័ន ធី ហួង Doan Thi Huong ជាតិវៀតណាម អាយុ ២៨ឆ្នាំ ត្រូវជាប់ចោទថាបានធ្វើឃាតលោក គីម ជុងណាម ដោយប្រើអាវុធគីមី VX ជាសារធាតុគីមីពុលខ្លាំងបំផុត និងហាមឃាត់ដោយអង្គការសហប្រជាជាតិ ទៅជះលើមុខជនរងគ្រោះបំពុលឱ្យស្លាប់។
ដៃទាំងពីរជាប់ខ្នោះ ពាក់អាវយឺត ជនសង្ស័យទាំងពីរ បាននាំចូលតុលាការ ដែលស្ថិតនៅជាយក្រុងគូឡាឡាំពួ ដោយមានការការពារយ៉ាងហ្មត់ចត់។ ប៉ូលិសជាងមួយរយនាក់ បំពាក់ដោយអាវុធពេញខ្លួន ពាក់មុខជិត បានឈរយាម នៅច្រកចូលតុលាការ។
នៅក្នុងដំណើរការសវនការថ្ងៃនេះ ដែល បានប្រព្រឹត្តទៅប្រមាណជា២០នាទី តុលាការមិនបានចោទសួរជនសង្ស័យណាម្នាក់ ឱ្យចេញស្តី ទាមទារអ្វីទាំងអស់។ ស្ត្រីជាប់ចោទទាំងពីរ ស្ថិតនៅស្ងៀមស្ងាត់រហូត នៅពេលតុលាការប្រកាសធ្វើការចោទប្រកាន់ជាផ្លូវការ។ ជនជាប់ចោទទាំងពីរអាចនឹងត្រូវកាត់ទោសប្រហារជីវិត ដោយព្យួរក។
ប៉ុន្តែសវនការកាត់ទោស អាចនឹងប្រើពេលវេលាយូរ និងអាចចាប់ផ្តើមបើកនៅជាច្រើនខែខាងមុខទៀត។ មេធាវីរបស់ជនជាប់ចោទវៀតណាម បានប្រកាសថាកូនក្តីរបស់លោក បានអះអាងជាភាសាវៀតណាម ថាខ្លួនគ្មានកំហុសទេ។ ចំណែកឯកអគ្គរដ្ឋទូតឥណ្ឌូណេស៊ី ស្តីទី វិញបានពន្យល់ថា ជនជាប់ចោទ ស៊ីទី ស្ងប់ស្ងៀម ព្រោះទូតបានណែនាំនាងឱ្យរក្សាសុខភាព ដោយដំណើរការក្តីប្រើពេលយូរ។
ពលរដ្ឋកូរ៉េខាងជើងម្នាក់ ក៏កំពុងជាប់ឃុំឃាំងបណ្តោះអាសន្នក្នុងសំណុំរឿងឃាតកម្មនេះដែរ។ ប៉ូលិសម៉ាឡេស៊ី ចង់សាកសួរចម្លើយជនកូរ៉េខាងជើង៧នាក់ផ្សេងទៀត ក្នុងនោះម្នាក់ជាមន្ត្រីការទូតផង ប៉ុន្តែបួននាក់បានរត់គេចផុតពីម៉ាឡេស៊ី ក្នុងថ្ងៃកើតហេតុភ្លាមបាត់ទៅហើយ។
សម្រាប់កូរ៉េខាងត្បូង ឃាតកម្មនេះជាស្នាដៃរបស់ព្យុងយ៉ាង ដោយមានបញ្ជាពីគីមជុងអ៊ុន ឱ្យកម្ចាត់បងប្រុស ព្រោះហ៊ានរិះគន់របបដឹកនាំប្រទេសដ៏ឯកាបំផុតលើលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ