ថៃ៖លោកស្រីអតីតនាយករដ្ឋមន្រ្តីយីងឡាក់ស្នើឲ្យរបបសឹកបំភ្លឺជុំវិញរឿងបោះឆ្នោតឆ្នាំ ២០១៧
នៅថ្ងៃសុក្រ ទី១ មេសា លោកស្រីអតីតនាយករដ្ឋមន្រ្តីថៃយីងឡាក់បានចេញមុខទាមទារឲ្យរបបសឹកបំភ្លឺឲ្យបានច្បាស់ជុំវិញផែនការរៀបចំបោះឆ្នោតដែលរបបសឹកបានសន្យារៀបចំនៅពាក់កណ្តាលឆ្នាំ ២០១៧។ តែមុននឹងការរៀបចំបោះឆ្នោតឈានមកដល់ របបសឹកត្រូវរៀបចំបោះឆ្នោតប្រជាមតិស្តីពីច្បាប់រដ្ឋធម្មនុញ្ញថ្មីនៅប៉ុន្មានខែខាងមុខក្នុងឆ្នាំ ២០១៦។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ការទាមទាររបស់លោកស្រីអតីតនាយករដ្ឋមន្រ្តីថៃយីងឡាក់ត្រូវបានធ្វើឡើងតាមរយៈទំព័របណ្តាញសង្គម Tweeter របស់លោកស្រី។ នៅក្នុងទំព័រ Tweeter លោកស្រីយីងឡាក់ដែលត្រូវបានរបបសឹកហាមមិនឲ្យធ្វើនយោបាយរយៈពេល ៥ឆ្នាំបានទាមទារឲ្យរបបសឹកបំភ្លឺឲ្យបានច្បាស់ថា បើប្រជារាស្រ្តថៃបោះឆ្នោតមិនទទួលយកច្បាប់រដ្ឋធម្មនុញ្ញថ្មីនៅប៉ុន្មានខែខាងមុខក្នុងឆ្នាំនេះ តើរបបសឹកគិតយ៉ាងម៉េចរឿងបោះឆ្នោតដែលបានសន្យារៀបចំនៅពាក់កណ្តាលឆ្នាំក្រោយហឹ្នង?។
សូមជម្រាបជូនថា តាំងពីរដ្ឋប្រហារយោធាក្នុងខែឧសភា ឆ្នាំ ២០១៤ មក របបសឹកបានប្រកាសឲ្យដឹងពីការរៀបចំបោះឆ្នោតប្រជាមតិស្តីពីច្បាប់រដ្ឋធម្មនុញ្ញថ្មីនៅខែសីហាខាងមុខ។ អស់រយៈពេលជាច្រើនខែកន្លងមកហើយដែលក្រុមអ្នកច្បាប់សំរាំងដោយក្រុមឧត្តមសេនីយបាន និងកំពុងរៀបចំតាក់តែងរដ្ឋធម្មនុញ្ញមួយថ្មីស្រឡាង តែត្រូវបានក្រុមប្រឆាំង ពិសេសពួកអាវក្រហមបរិហាររួចជាស្រេចថាជាទង្វើផ្ទុយនឹងលទ្ធិប្រជាធិបតេយ្យ។
រហូតមកដល់ពេលនេះ របបសឹកមិនបានបញ្ជាក់ទេថា បើច្បាប់រដ្ឋធម្មនុញ្ញថ្មីនឹងត្រូវប្រជារាស្រ្តបោះឆ្នោតប្រឆាំង តើនឹងមានរឿងអ្វីកើតឡើងនាពេលខាងមុខ?។ ក្រៅពីចង់បានចម្លើយពិតប្រាកដចំពោះសំណួរនេះ លោកស្រីយីងឡាក់ក៏ចង់បានចម្លើយនឹងសំណួរដែលថា តើរបបសឹកនឹងរៀបចំបោះឆ្នោតសភានៅពាក់កណ្តាលឆ្នាំ ២០១៧ ដូចដែលបានសន្យាឬទេ។
គួរបញ្ជាក់ជូនថា តាំងពីឡើងកាន់កាប់ប្រទេសដោយរដ្ឋប្រហារមក របបសឹកបានលើកពេលរៀបចំបោះឆ្នោតម្តងជាពីរដងនៅក្នុងសង្គមមួយដែលកំពុងបែកបាក់ខ្លាំងរវាងក្រុមសកម្មជនអាវក្រហមគាំទ្រលោកអតីតនាយករដ្ឋមន្រ្តីធ្លាក់ពីអំណាចថាក់ស៊ីន និងក្រុមសកម្មជនអាវលឿងគាំទ្រដោយពួកបញ្ញាវន្ត និងកងទ័ព។ អ្វីដែលរបបសឹកចង់បាននៅក្នុងច្បាប់រដ្ឋធម្មនុញ្ញថ្មី គឺព្យាយាមកំចាត់ត្រកូលថាក់ស៊ីនចេញពីឆាកនយោបាយថៃដែលបន្តឈ្នះឆ្នោតនៅរាល់ការបោះឆ្នោត។
គិតតាំងពីឆ្នាំ ១៩៣២ មក ច្បាប់រដ្ឋធម្មនុញ្ញថៃត្រូវបានធ្វើការតាក់តែងថ្មីប្រមាណជា ១០ដង។ នៅលើកនេះ និងបើតាមមេរដ្ឋប្រហារលោកប្រាយុទ្ធ ចាន់អូចាឲ្យដឹងថា ច្បាប់រដ្ឋធម្មនុញ្ញថ្មីនឹងអនុញ្ញាតបិទបញ្ចប់ការហែកហួរគ្នាដែលរាជាណាចក្រថៃបានឆ្លងកាត់អស់ជាច្រើនឆ្នាំកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ