ការងារកម្មករអាស៊ីអាគ្នេយ៍ពាក់កណ្តាលអាចបាត់បង់ ដោយសារម៉ាស៊ីនធ្វើការជំនួស
ការដាក់ដំណើរការម៉ាស៊ីន អោយធ្វើការងារជំនួសមនុស្ស នៅតាមវិស័យវាយនភណ្ឌ អាចនឹងធ្វើអោយកម្មករជាងពាក់កណ្តាលនៅអាស៊ីអាគ្នេយ៍៥ប្រទេស បាត់បង់ការងារធ្វើ នៅ២០ឆ្នាំបន្ទាប់ទៅនេះ។ នេះបើយោងតាមរបាយការណ៍របស់អង្គការពលកម្មអន្តរជាតិ OIT ចេញផ្សាយថ្មីៗនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:០៩
យោងតាមរបាយការណ៍របស់អង្គការពលកម្មអន្តរជាតិ កម្មករនៅតាម៥ប្រទេស អាស៊ីអាគ្នេយ៍ មានកម្ពុជា ឥណ្ឌូណេស៊ី ហ្វីលីពីន ថៃ និងវៀតណាម អាចនឹងបាត់បង់ការងារធ្វើ ក្នុងរយៈពេល២០ឆ្នាំទៅមុខនេះ ដោយសារតែគេដាក់អោយគ្រឿងចក្រ និងម៉ាស៊ីនផ្សេងៗ ចូលមកធ្វើការជំនួសមនុស្ស។
ការដាក់អោយម៉ាស៊ីនធ្វើការស្វ័យប្រវត្តិជំនួសមនុស្ស ជួយអោយកាត់បន្ថយការងារច្រើន ដែលអាចអោយសហគ្រាសកាត់ដេរផ្សេងៗ កាត់បន្ថយកម្មករ រឺរុះរើទីតាំងទៅកន្លែង ផ្សេងទៀត។ បញ្ហានេះប៉ះពាល់កម្មករ៥៦ភាគរយ ក្នុងចំណោមកម្មករ១៣៧លាននាក់ នៅតាមប្រទេសអាស៊ីអាគ្នេយ៍ទាំង៥ ពិសេសកម្មករផ្នែកកាត់ដេរ និងផលិតស្បែកជើង នៅកម្ពុជា វៀតណាម និងឥណ្ឌូណេស៊ី។
ការដាក់អោយម៉ាស៊ីនធ្វើការជំនួសមនុស្សនេះ ក៏គំរាមកំហែងការងារកម្មករសហគ្រាសរថយន្ត នៅថៃ និងឥណ្ឌូណេស៊ី ក្នុងកម្រិតខ្ពស់ដែរ។ ផ្នែកផលិតរថយន្តអាស៊ីអាគ្នេយ៍ ជាប់លំដាប់ទី៧ ក្នុងពិភពលោក ក្នុងឆ្នាំ២០១៥។ វិស័យនេះ មានមនុស្សបម្រើការជាង៨00 000នាក់។
អង្គការពលកម្មអន្តរជាតិលើកឡើងថា ប្រទេសដែលមានកម្រៃពលកម្មទាប ត្រូវតែមើល ឡើងវិញ នូវជំហររបស់ខ្លួន ព្រោះថា ផលចំណេញបានមកពីកម្រៃពលកម្មទាបនេះ មិនគ្រប់គ្រាន់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ