កម្ពុជាប្រកាសអាសន្នពីទឹកជំនន់ទន្លេមេគង្គ
ក្រសួងធនធានទឹក និងឧតុនិយម បានប្រកាសអាសន្នពីកម្រិតទឹកទន្លេមេគង្គនៅខេត្តស្ទឹងត្រែង ក្រចេះ កំពង់ចាម និងនៅទន្លេបាសាក់ ក្នុងខេត្តកណ្តាល។ កម្រិតទឹកនៅតាមស្ថានីយ៍ជលសាស្ត្រទាំងនោះ បានឡើងលើសពីកម្រិតកម្ពស់ ដែលត្រូវ ប្រកាសអោយមហាជនប្រុងប្រយ័ត្នហើយ។
ចុះផ្សាយនៅថ្ងៃ៖
ស្តាប់ - ០២:១៨
ក្នុងសេចក្តីជូនដំណឹងបន្ថែម នៅថ្ងៃ១០សីហា ឆ្នាំ២០១១ ក្រសួងធនធានទឹក និងឧតុនិយម បានលើកឡើងថា ជំនន់ទឹកទន្លេមេគង្គនៅភាគខាងលើក្នុងខេត្តស្ទឹងត្រែង ក្រចេះ កំពង់ចាម និងនៅទន្លេបាសាក់ក្នុងខេត្តកណ្តាល នៅតែបន្តជន់ឡើងក្នុងរយៈពេលប៉ុន្មានថ្ងៃនេះ។ ចំណែកនៅតំបន់អាងទន្លេមេគង្គ ក៏មានភ្លៀងធ្លាក់ច្រើនថែមទៀត ដោយសារឥទ្ធិពលប្រព័ន្ធសម្ពាធទាបមួយ ដែលកំពុងស្ថិតនៅពីលើអាងទន្លេមេគង្គ។ ក្រសួងធនធានទឹក បានប្រកាសឲ្យប្រជាពលរដ្ឋរស់នៅខេត្តស្ទឹងត្រែង ក្រចេះ កំពង់ចាម និងនៅស្រុកស្អាងខេត្តកណ្តាល ត្រូវបង្កើនការប្រុងប្រយ័ត្នខ្ពស់បំផុតអំពីគ្រោះទឹកជំនន់។
សេចក្តីជូនដំណឹងដដែលក៏បានបង្ហាញថា ប្រព័ន្ធសម្ពាធទាបថ្មីមួយ នឹងធ្វើអោយមានភ្លៀងធ្លាក់ច្រើនបន្ថែមទៀត នៅអាងទន្លេមេគង្គលើក្នុងប្រទេសឡាវ និងប្រទេសថៃ។ ស្ថានភាពនេះ នឹងបណ្តាលអោយទឹកជំនន់ទន្លេមេគង្គក្នុងប្រទេសកកម្ពុជា ទន្លេសាប និងទន្លេបាសាក់ បន្តកើនឡើង។ តាមការព្យាករណ៍កម្ពស់ទឹកនៅតាមស្ថានីយ៍ជលសាស្ត្រមួយចំនួនគិតត្រឹមថ្ងៃទី១០សីហា ឆ្នាំ២០១១ គឺនៅស្ថាននីយ៍ខេត្តស្ទឹងត្រែង ក្រចេះ កំពង់ចាម និងកម្ពស់ទឹកទន្លេបាសាក់ នៅកោះខែល កម្ពស់ទឹកទន្លេ បានកើនឡើងហួសពីកម្ពស់ ដែលត្រូវប្រកាសអាសន្នហើយ។
សេចក្តីជូនដំណឹង ក៏បានគូសបញ្ជាក់ថា ស្ថានភាពទឹកទន្លេបាសាក់ នៅកោះខែល ក្នុងខេត្តកណ្តាល អាចធ្វើអោយមានទឹកជំនន់ ហូរចេញពីទន្លេបាសាក់នៅត្រើយខាងកើត ហូរកាត់លើផ្លូវជាតិលេខ១១០ ផងដែរ។ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានអំពាវនាវក្នុងសេចក្តីជូនដំណឹង ដើម្បីឲ្យអាជ្ញាធរដែនដី និងប្រជាពលរដ្ឋដែលរស់នៅតាមដងទន្លេមេគង្គ ទន្លេបាសាក់ និងទន្លេសាប បង្កើនការយកចិត្តទុកដាក់ប្រុងប្រយ័ត្នខ្ពស់បំផុត ចំពោះស្ថានភាពទឹកជំនន់នៅឆ្នាំនេះ។
ក្នុងកិច្ចប្រជុំគណៈរដ្ឋមន្ត្រី កាលពីថ្ងៃសុក្រចុងសប្តាហ៍មុន លោកនាយករដ្ឋមន្ត្រី ហ៊ុន សែន ក៏បានណែនាំផ្ទាល់មាត់ឲ្យអាជ្ញាធរដែនដី ស្ថិតនៅតាមបណ្តោយទន្លេមេគង្គ និងក្រសួងស្ថាប័នពាក់ព័ន្ធ ត្រូវតាមដានពិនិត្យស្ថានភាពនៃការវិវត្តន៍នៃទឹកទន្លេ ដើម្បីផ្សព្វផ្សាយព័ត៌មានជូន និងជួយសង្គ្រោះប្រជាពលរដ្ឋណា ដែលមានលំនៅដ្ឋាន ដែលងាយនឹងរងគ្រោះដោយសារទឹកជំនន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ