សេចក្តីស្នើច្បាប់ស្តីពីវិសោធនកម្មច្បាប់បោះឆ្នោតជ្រើសតាំងតំណាងរាស្ត្ររំកិលដល់គណៈកម្មការជំនាញ
សេចក្តីស្នើច្បាប់ស្តីពី វិសោធនកម្មច្បាប់ស្តីពីការបោះឆ្នោតជ្រើសតំាងតំណាងរាស្រ្ត ដែលស្នើឡើងដោយតំណាងរាស្រ្តគណបក្សសង្គ្រោះជាតិ នៅព្រឹកថ្ងៃទី២១ ខែសីហា ឆ្នាំ២០១៧ នេះ ត្រូវបានគណៈកម្មាធិការអចិន្រ្តៃយ៍រដ្ឋសភា សម្រេចប្រគល់ជូនគណៈកម្មការនីតិកម្ម ដើម្បីពិនិត្យ និងសិក្សា ហើយធ្វើរបាយការណ៍ ជូនគណៈកម្មាធិការអចិន្រ្តៃយ៍រដ្ឋសភាវិញ។ ក៏ប៉ុន្តែគេមិនទាន់ដឹងទេថា គណៈកម្មការជំនាញនឹងបើកការជជែកនៅពេលណាជាក់លាក់នៅឡើយ។
ចុះផ្សាយនៅថ្ងៃ៖
ស្តាប់ - ០២:១៨
លោក សុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិ បានស្វាគមន៍ដល់គណៈកម្មាធិការអចិន្ត្រៃយ៍រដ្ឋសភា ដែលបានសម្រេចបញ្ជូនសេចក្តីស្នើវិសោធនកម្មស្តីពីច្បាប់បោះឆ្នោតជ្រើសតាំងតំណាងរាស្ត្រ ទៅកាន់គណៈកម្មការជំនាញគឺគណៈកម្មការនីតិកម្ម និងយុត្តិធម៌នៃរដ្ឋសភា។ លោក សុន ឆ័យ បញ្ជាក់ថា គឺជានីតិវិធីត្រឹមត្រូវ ដែលគណៈកម្មាធិការអចិន្ត្រៃយ៍ មានតួនាទីបញ្ជូនសេចក្តីស្នើច្បាប់ឬសេចក្តីព្រាងច្បាប់ទៅគណៈកម្មការជំនាញ។
ការសម្រេចនេះបានធ្វើឡើង បន្ទាប់ពីអ្នកតំណាងរាស្ត្រគណបក្សសង្គ្រោះជាតិប្រមាណជាង៣០រូប កាលពីថ្ងៃទី១១ខែសីហា កន្លងទៅបានដាក់លិខិត ទៅកាន់ប្រធានរដ្ឋសភាលោក ហេង សំរិន ក្នុងគោលបំណងចង់ឲ្យមានការកែប្រែមាត្រាចំនួន៣ធំៗនៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដើម្បីឲ្យប្រជាពលរដ្ឋខ្មែរនៅក្រៅប្រទេសអាចចូលរួមបោះឆ្នោតបាន។
ក៏ប៉ុន្តែទាំងអគ្គលេខាធិការដ្ឋានរដ្ឋសភា ទាំងគណបក្សប្រឆាំងនៅមិនទាន់ដឹងថា សេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រនេះ នឹងត្រូវគណៈកម្មការជំនាញបើកកិច្ចប្រជុំនៅពេលណានៅឡើយ។
ទោះយ៉ាងណា លោក សុន ឆ័យ តំណាងឲ្យអ្នកតំណាងរាស្ត្រហត្ថលេខី នៃគណបក្សសង្រ្គោះជាតិឲ្យដឹងថា អ្វីដែលជាការកត់សម្គាល់ ថាតើសំណើរបស់លោក ត្រូវបានគណៈកម្មការពាក់ព័ន្ធយកទៅពិចារណាឬក៏ទាត់ចោលនោះ លោកសុន ឆ័យ សង្ឃឹមថារដ្ឋសភានឹង ធ្វើទៅតាមនីតិវិធី ពោលគឺគណៈកម្មការពាក់ព័ន្ធរួមមានគណៈកម្មការ ជំនាញត្រូវអញ្ជើញអ្នកស្នើវិសោធនកម្មច្បាប់ទៅពិភាក្សាគ្នា ដោយមិនត្រូវសម្រេចទាត់ចោលមិនបន្តនីតិវិធីនោះទេ។
សូមរំលឹកថា កាលពីដើមខែសីហា តំណាងរាស្ត្រគណបក្សសង្គ្រោះជាតិចំនួន៣៣រូប បានចុះហត្ថលេខាលើលិខិតមួយផ្ញើជូនលោក ហេង សំរិន ប្រធានរដ្ឋសភា ដោយយោងទៅលើប្រវត្តិនៃការបោះឆ្នោតនៅកម្ពុជាចាប់តាំងពីឆ្នាំ ១៩៩៣ យោងទៅលើរដ្ឋធម្មនុញ្ញមាត្រា៣៣ មាត្រា៣៤ថ្មី មាត្រា៣៥ ដែលក្នុងន័យថា ប្រជាពលរដ្ឋខ្មែរ ដែលកំពុងធ្វើការឬរស់នៅឯបរទេសត្រូវតែទទួលបានសិទ្ធិបោះឆ្នោត តាមរយៈការធ្វើវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដែលប្រកាសដោយព្រះរាជក្រមចុះថ្ងៃទី២៦ខែមីនាឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ