ជីវប្រវត្តិរបស់វេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផា ដែលទទួលមរណភាព ក្នុងវ័យ៧១ឆ្នាំ
លោកវេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផាបានទទួលមរណភាព ក្នុងវ័យ៧១ឆ្នាំ ដោយរោគាពាធ។ នេះបើតាមសេចក្ដីប្រកាសព័ត៌មានរបស់មូលនិធិគន្ធបុប្ផា ដែលចុះផ្សាយនៅលើគេហទំព័រផ្លូវការ នៅថ្ងៃទី៩កញ្ញាម្សិលមិញ។ លោកវេជ្ជបណ្ឌិតជាជនជាតិស្វីសរូបនេះ បានចំណាយពេលស្ទើរពេញមួយជីវិតរបស់លោក ដើម្បីជួយសង្រ្គោះជីវិតកុមារកម្ពុជា តាមរយៈការបង្កើតមូលនិធិទ្រទ្រង់មន្ទីរពេទ្យគន្ធបុប្ផាជិត៣០ឆ្នាំមកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
លោកវេជ្ជបណ្ឌិត Beat Richner ដែលទទួលមរណៈភាពក្នុងវ័យ៧១ឆ្នាំគាត់គឺជាជនជាតិស្វីស។លោកទទួលសញ្ញាបត្រវេជ្ជសាស្ត្រឯកទេសថែទាំកុមារនៅមន្ទីរពេទ្យ នៅឆ្នាំ១៩៧៣។ លោកត្រូវបានបញ្ជូនមកធ្វើការនៅកម្ពុជាចន្លោះឆ្នាំ ១៩៧៤ដល់ឆ្នាំ ១៩៧៥ ក្នុងតួនាទីជាមន្រ្តីរបស់កាកបាទក្រហមប្រទេសស្វីស។ តែក្រោយមក លោកត្រូវបង្ខំចិត្តវិលទៅប្រទេសកំណើតវិញ នៅគ្រាដែលពួកខ្មែរក្រហមបានចូលមកកាន់កាប់ប្រទេសកម្ពុជា។
លុះដល់ឆ្នាំ១៩៩២ពេលដែលប្រទេសក្រីក្រមួយនេះមានកិច្ចព្រមព្រៀងសន្តិភាពទីក្រុងប៉ារីសនោះ លោក Beat Richnerក៏បានត្រឡប់មកកាន់កម្ពុជាវិញ តាមការអញ្ជើញរបស់សម្តេចឪ នរោត្តម សីហនុ ដែលស្នើឲ្យវេជ្ជបណ្ឌិតរូបនេះជួយសាងសង់ឡើងវិញមន្ទីរពេទ្យគន្ធបុប្ផា បន្ទាប់ពីមន្ទីរពេទ្យដែលព្យាបាលកុមារមួយនេះរងការបំផ្លិចបំផ្លាញដោយរបបខ្មែរក្រហម។
មន្ទីរពេទ្យគន្ធបុប្ផាដែលព្យាបាលកុមារខ្មែររាប់ម៉ឺននាក់ក្នុងមួយឆ្នាំៗឥតថ្លៃនោះ គិតរហូតមកដល់ពេលនេះ មានអាយុកាល ២៦ឆ្នាំហើយ បន្ទាប់ពីដាក់ឲ្យដំណើរការក្នុងឆ្នាំ ១៩៩២។ លោកវេជ្ជបណ្ឌិត Beat Richner គឺជាអ្នកសម្ដែងសិល្បៈតាមរយៈការលេងសូរឡូ ឬកូដវីយូឡុង ដើម្បីប្រមែប្រមូលថវិកាជួយទ្រទ្រង់មន្ទីរពេទ្យគន្ធបុប្ឆា។ មន្ទីរពេទ្យគន្ធបុប្ផា បច្ចុប្បន្នមាន៥ទីតាំងគឺ៤ទីតាំងនៅភ្នំពេញនិង១ទីតាំងនៅខេត្តសៀមរាម។ ក្នុងមួយថ្ងៃ មន្ទីរពេទ្យនេះទទួលព្យាបាលជំងឺទូទៅដល់កុមារចន្លោះពី ២៥០០ទៅ៣០០០នាក់។
ថវិកាទ្រទ្រង់មន្ទីរពេទ្យគន្ធបុប្ផា គឺបានមកពីសប្បុរសជន រដ្ឋាភិបាលស្វីស និងរដ្ឋាភិបាលកម្ពុជា។ មានកុមារចំនួនជាង ១៦លាននាក់ហើយ ត្រូវបានព្យាបាលដោយមន្ទីរពេទ្យគន្ធបុប្ផាក្នុងរយៈពេល២៦ឆ្នាំមកនេះ។
ក្រោយពីចំណាយពេលស្ទើរមួយជីវិតដើម្បីកុមារកម្ពុជា លោកវេជ្ជបណ្ឌិត Beat Richner បានប្រកាសលាលែងពីតំណែងជាប្រធានមន្ទីរពេទ្យនេះ នៅថ្ងៃទី ២៨មីនា ឆ្នាំ២០១៧ ដោយសារលោកធ្លាក់ខ្លួនឈឺធ្ងន់ និងត្រូវសម្រាកព្យាបាលនៅប្រទេសស្វីសជាទីកន្លែងកំណើត។ ក្រោយពីអវត្តមានរបស់លោកបណ្ឌិត Beat Richner រដ្ឋាភិបាលកម្ពុជាបានសម្រេចបង្កើតមួលនិធិគន្ធបុប្ផា ដើម្បីផ្គត់ផ្គង់ការចំណាយនៃមន្ទីរពេទ្យនេះដោយខ្លួនឯង តែនៅរក្សាមូលនិធិចាស់ឲ្យនៅដដែល ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ