ប្រវត្តិរូបិយវត្ថុកម្ពុជានឹងលាតត្រដាងនៅដើមឆ្នាំ២០១៦
«សារមន្ទីរសេដ្ឋកិច្ច និងរូបិយវត្ថុ» នឹងបើកទ្វារទទួលសាធារណជននៅឆ្នាំដើម២០១៦ខាងមុននេះ។ គឺជាគម្រោងសារមន្ទីរដំបូងបំផុតរបស់ប្រទេសកម្ពុជា ដែលផ្តោតលើប្រវត្តិនៃរូបិយវត្ថុរបស់ខ្មែរ តាំងតែសម័យនគរភ្នំ រហូតដល់មកដល់បច្ចុប្បន្ន។ សារមន្ទីរនេះ ត្រូវបានសាងសង់ដោយចំណាយថវិកាផ្ទាល់របស់អាជ្ញាធរកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
«សារមន្ទីរសេដ្ឋកិច្ច និងរូបិយវត្ថុ» ហៅកាត់ថា ស.ស.រ. ត្រូវបានសាងសង់នៅត្រង់អគារមួយ ដែលជាអតីតទីស្នាក់ការរបស់សាលារាជធានីភ្នំពេញ ស្ថិតនៅចុងវិថីលេខ១។ នៅពេលនេះ ការសាងសង់សម្រេចជាងពាក់កណ្តាលហើយ ក្រោមកិច្ចសហការរបស់ក្រសួងសេដ្ឋកិច្ចនិងហេរិញ្ញវត្ថុ រួមជាមួយនឹងធនាគារជាតិនៃកម្ពុជា។
លោក ហ្សង់-ដានីញ៉ែល ហ្គាឌែរ (Jean-Daniel GARDÈRE) អភិបាលទូទៅរបស់សារមន្ទីរសេដ្ឋកិច្ចនិងរូបិយវត្ថុ បានបញ្ជាក់ថា៖ «គេមិនវាយកំទេច ឬរំលាយអគាររបស់ទីស្នាក់ការសាលាក្រុងចាស់ ដើម្បីសង់ថ្មីទេ តែគេជួសជុល តុបតែងកែលម្អ ដើម្បីផ្លាស់មុខមាត់ថ្មី ទៅ ជាសារមន្ទីរវិញ»។
លោកបានប្រាប់វិទ្យុបារាំងអន្តរជាតិបន្តថា៖ «ចំណុចដែលគួរកត់សម្គាល់គឺ សារមន្ទីរនេះ មិនមានជំនួយពីដៃគូអភិវឌ្ឍន៍ ឬអង្គការអន្តរជាតិណា ដើម្បីរៀបចំនោះទេ។ គឺជាគម្រោងថវិកាជាតិដែលចំណាយដោយប្រទេសកម្ពុជាផ្ទាល់តែម្តង»។
សារមន្ទីរនេះ នឹងមានការប្រមូលផ្តុំ និងតាំងបង្ហាញអំពីរូបិយវត្ថុ បណ្ណាសារក្រដាសប្រាក់ និងកាក់សម័យបុរាណ ឯកសាររូបថត និងខ្សែភាពយន្តខ្នាតខ្លី 3D ដើម្បីឲ្យសាធារណជនជាតិនិងអន្តរជាតិ ជាពិសេសគឺយុវជនខ្មែរជំនាន់ក្រោយ បានស្គាល់ពីប្រវត្តិសាស្ត្រនិងបេតិកភណ្ឌជាតិរបស់ខ្លួន។
តាមរយៈវីដេអូខ្លី 3D ដែលបានបង្ហោះក្នុងគេហទំព័រសារមន្ទីរ បង្ហាញថា គេបានជីកកកាយប៉ះកំណប់២០គីឡូក្រាម នៅអង្គរបុរី ខេត្តតាកែវ ហើយមានកាក់មាសនិងប្រាក់ជាង២លាន។ សម្បត្តិទាំងនោះ ក៏នឹងត្រូវយកទៅតាំងបង្ហាញក្នុងសារមន្ទីរនេះផងដែរ។
ចែកជា១២បន្ទប់ធំៗ ប្រដាប់ដោយម៉ាស៊ីនត្រជាក់ «សារមន្ទីរសេដ្ឋកិច្ចនិងរូបិយវត្ថុ»នឹងត្រូវបានរៀបចំតាមស្តង់ដារអន្តរជាតិ អនុលោមតាមសម័យកាលប្រវត្តិសាស្ត្ររបស់ខ្មែរ តាំងពីសម័យនគរភ្នំ ឬហ្វូណន សម័យចេនឡា សម័យអាណាចក្រអង្គរ សម័យអាណាព្យាបាលបារាំង និងសង្គមរាស្ត្រនិយម ហើយបន្តរហូតដល់បច្ចុប្បន្ន។
សូមជម្រាបថា «សារមន្ទីរសេដ្ឋកិច្ចនិងរូបិយវត្ថុ» ដែលផ្តោលលើប្រវត្តិរូបិយវត្ថុ លុយកាក់ប្រាក់ខ្មែរ នឹងបើកទ្វារទទួលសាធារណជនគឺដើមឆ្នាំ២០១៦។ បច្ចុប្បន្ន គេអាចទស្សនាឯកសារចំនួនរបស់សារមន្ទីរនេះ នៅក្នុងគេហទំព័រ www.musee-phnompenh.com ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ