ចំនួនអ្នករងគ្រោះពីការវាយប្រហារអ៊ីនធ័រនែតដោយកម្មវិធីជំរិត អាចកើនខ្លាំងនៅថ្ងៃចន្ទ
តើអ្នកនរណាជាអ្នកនៅពីក្រោយខ្នងនៃការវាយប្រហារអ៊ីនធ័រនែតតាមកម្មវិធីចាប់ជំរិត ? ពុំទាន់មានចម្លើយទេ ប៉ុន្តែអ្នកជំនាញជឿថាជាស្នាដៃរបស់ពួកឧក្រិដ្ឋជនអ៊ីនធ័រនែត។ ក្រុមអ្នកអង្កេតនិងក្រុមអ្នកឯកទេស កំពុងប្រញឹកស្វែងរកប្រភពដើមរបស់ពួកចោរ ដែលបានវាយប្រហារ ធ្វើមានជនរងគ្រោះជាង២០ម៉ឺននាក់ ក្នុងយ៉ាងហោច១៥០ប្រទេស។ ជាងនេះទៅទៀត ប៉ូលិសអឺរ៉ុប Europol កំពុងព្រួយបារម្ភថាចំនួនអ្នករងគ្រោះអាចនឹងកើនឡើងនៅថ្ងៃចន្ទ នៅពេលក្រុមហ៊ុនសហគ្រាបចាប់ចូលធ្វើការវិញ ក្រោយបានសម្រាកថ្ងៃចុងសប្តាហ៍។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងរយៈពេលតែ២៤ម៉ោង ចំនួនជនរងគ្រោះក្នុងការវាយប្រហារអ៊ីនធ័រនែតដោយកម្មវិធីចាប់ជំរិតកុំព្យូទ័រ មានមិនតិចជាង២០ម៉ឺននាក់ទេ ! ពួកគេភាគច្រើនជាក្រុមហ៊ុនសហគ្រាស នៅក្នុងប្រទេសចំនួនប្រមាណ១៥០ផ្សេងគ្នា។ គឺពិតជាពុំធ្លាប់មានឡើយការវាយប្រហារទ្រង់ទ្រាយធំកំរិតពិភពលោកយ៉ាងដូច្នេះ ព្រោះធម្មតាការវាយប្រហារអ៊ីនធ័រនែតមានកំរិតត្រឹម ២០០ ក្នុងមូួយឆ្នាំ ! នេះបើតាមសេចក្តីប្រកាសរបស់នាយកទីភ្នាក់ងារEuropol ដែលព្យាករថាចំនួនអ្នករងគ្រោះអាចនឹងកើនឡើងខ្លាំង នៅថ្ងៃចន្ទ នៅពេលគ្រប់សេវា ស្ថាប័ន បើកកុំព្យូទ័រធ្វើការ ព្រោះការវាយប្រហារដោយមិនរើសមុខ និងរាតត្បាតយ៉ាងលឿនបំផុត។
រដ្ឋមន្ត្រីក្រសួងមហាផ្ទៃអង់គ្លេស ក៏បានថ្លែងទៅកាន់សារព័ត៌មាននៅថ្ងៃអាទិត្យនេះ ដូចគ្នា ថាការវាយប្រហារនឹងមានកើតឡើងជាបន្តបន្ទាប់ទៀត ហើយគេទំនងជាមិនអាចវែករកមុខចោរអ៊ីនធ័រនែតឃើញរហូតផងក៏ថាបាន។
សូមបញ្ជាក់ថា ការវាយប្រហារអ៊ីនធ័រនែត ដោយកម្មវិធីជំរិតកុំព្យូទ័រ បង្កឡើងដោយវីរ៉ុស Wannacry បានផ្ទុះឡើងនៅយប់ថ្ងៃសុក្រទី ១២ឧសភា ក្នុងប្រមាណជិត១០០ រាប់តាំងរុស្ស៊ីឆ្លងដល់អេស្ប៉ាញ ធ្លាយដល់ម៉ិចស៊ិក ឬវៀតណាម ឥណ្ឌា ចិន ជប៉ុន កូរ៉េខាងត្បូង ... និងធ្ងន់ធ្ងរខ្លាំងនៅអង់គ្លេស ដោយកុំព្យូទ័ររាប់សិបពាន់គ្រឿង ត្រូវគាំង។ សារទារប្រាក់ថ្នូរ មានតម្លៃ ៣០០ដុល្លារ និងគុណជាពីរបើយឺតយ៉ាវលើសបីថ្ងៃ។ ដើម្បីប្រឈមនឹងការវាយប្រហារដ៏ធំធេងនេះ ក្រុមហ៊ុនMicrosoft បានសម្រេចធ្វើបច្ចុប្បន្នភាពកម្មវិធីWindowsខ្លះ។ ការវាយប្រហារប៉ះពាល់ខ្លាំងលើកុំព្យូទ័រណាដែលបំពាក់Windows XP។ Windows១០មានសំណាងជាងគេ បានគេចរួចពីការវាយប្រហារនេះ។
រហូតមកទល់ពេលនេះអឺរ៉ុប៉ូល ក៏ដូចជាភ្នាក់ងារអង់គ្លេស បានបង្កើតក្រុមការងារពិសេសមួយសម្រាប់ជួយអង្កេត។ ប៉ុន្តែថ្វីបើខាងអង់គ្លេស បានអះអាងបង្អាក់ការចម្លងវីរ៉ុសទៅវាយប្រហារអ៊ីនធ័រនែតបាន ដោយសារជំនួយរបស់យុវជនក្មេងវ័យ២២ឆ្នាំម្នាក់មែន តែពួកចោរអាចប្តូរលេខកូដ ហើយបកមកធ្វើការវាយប្រហារជាថ្មីទៀតបានគ្រប់ពេល ហើយពេលនោះគឺគេពិតជាមិនអាចបញ្ឈប់សកម្មភាពពួកចោរអ៊ីនធ័រនែតបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ