អឺរ៉ុប នឹងជួបអាកាសធាតុក្តៅខ្លាំងញឹកញយ បើមិនទប់ស្កាត់ការបញ្ចេញឧស្មូ័នផ្ទះកញ្ចក់
នៅរដូវក្តៅឆ្នាំ២០១៧នេះ សីតុណ្ហភាពបានឡើងដល់កំរិតខ្ពស់បំផុតមិនធ្លាប់មាន នៅតាម បណ្តាប្រទេស និងភូមិឃុំនាភាគខាងត្បូងនៃទ្វីបអឺរ៉ុប។ បើតាមរបាយការណ៍ របស់អង្គការក្រៅរដ្ឋាភិបាល “មជ្ឈមណ្ឌលវិទ្យាសាស្ត្រអាកាសធាតុ” រលកកម្តៅ និងរយៈពេលនៃការរងអាកាសធាតុក្តៅខ្លាំង នៅអឺរ៉ុបឆ្នាំនេះ គឺជាសញ្ញាបញ្ជាក់អំពីការប្រែប្រួលអាកាសធាតុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
នេះជារបាយការណ៍ ដែលអ្នកស្រាវជ្រាវធ្វើឡើងក្នុងគម្រោងនិងក្របខ័ណ្ឌវិទ្យាសាស្ត្រអន្តរជាតិ Worldwide Weather Attribution ដើម្បីកំណត់ថាតើរលកកម្តៅនិងអាកាសធាតុក្តៅ ជ្រុលហួសហេតុមានពាក់ព័ន្ធនឹងការឡើងកម្តៅនៃភពផែនដីឬអត់។
ជាលទ្ធផល ដោយមានគំរូប្រព័ន្ធព័ត៌មានវិទ្យាជាសំអាង ការប្រែប្រួលអាកាសធាតុ បង្កឡើងដោយសា្នដៃមនុស្ស ងាយនឹងធ្វើសីតុណ្ហភាព នៅរដូវក្តៅឡើងខ្ពស់និងក្តៅខ្លាំងដូចឆ្នាំ ២០១៧ កើតឡើងជាថ្មីទៀតដល់១០ដង។ មានន័យថា ប្រសិនបើមនុស្សលោកពុំព្រមនាំគ្នាកាត់បន្ថយការបញ្ចេញឧស្ម័នផ្ទះកញ្ចក់ ក្នុងបរិយាកាសទេ នោះភាគខាងត្បូងអឺរ៉ុបនឹងមានអាកាសធាតុក្តៅខ្លាំងដូចរដូវក្តៅឆ្នាំ២០១៧ នៅឆ្នាំ២០៥០។ បើតាមការអះអាងរបស់ក្រុមអ្នកស្រាវជ្រាវដដែល ដែលបញ្ជាក់ថា បានរកឃើញភស្តុតាងជាក់ស្តែងបញ្ជាក់អំពីឥទ្ធិពលរបស់មនុស្សចំពោះការឡើងកម្តៅអាកាសធាតុជ្រុល ទៅលើសីតុណ្ហភាពបើនិយាយជាទូទៅ និងពិសេសទៅលើរលកកម្តៅខ្លាំងកាលពីដើមខែសីហា ២០១៧ តែម្តង។
សូមបញ្ជាក់ថា នារដូវក្តៅឆ្នាំ២០១៧នេះ ភាគខាងត្បូងអឺរ៉ុប មានជាអាទិ៍ ប្រទេសអ៊ីតាលី ក្រូអាស៊ី បារាំង បានជួបប្រទះបាតុភូតធម្មជាតិក្តៅហែងខ្លាំង ដែលគេប្រសិទ្ធិនាមថា Lucifer។ បាតុភូតនេះ កម្រកើតមានឡើងខ្លាំងណាស់កាលពីដើមសតវត្សរ៍ទី២០ តែបច្ចុប្បន្ននេះ អឺរ៉ុបងាយនឹងជួបបាតុភូតនេះ ដល់ទៅបួនដងច្រើន បើប្រៀបទៅនឹងឆ្នាំ១៩០០។
ភូមិឋានអឺរ៉ុបនៅប៉ែកខាងត្បូងជាច្រើន ត្រូវត្រៀមខ្លួនរស់ប្រឈមនឹងអាកាសធាតុក្តៅខ្លាំង ដូចឆ្នាំនេះ ជារៀងរាល់ឆ្នាំ។ ហេតុដូច្នេះហើយបានជាអ្នកស្រាវជ្រាវ សុំអំពាវនាវឱ្យក្រុងនីមួយៗសហការជាមួយអ្នកវិទ្យាសាស្ត្រនិងអ្នកជំនាញសុខភាពសាធារណៈ ដើម្បីអភិវឌ្ឍផែនការសកម្ម ព្រោះកម្តៅសីតុណ្ហភាពក្តៅខ្លាំង នឹងក្លាយជាប្រភេទអាកាសធាតុថ្មីរបស់អឺរ៉ុប នៅពាក់កណ្តាលសតវត្សរ៍ទី២១នេះហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ