នៅអេហ្ស៊ីប យន្តហោះដឹកអ្នកដំណើរអង់គ្លេសវិះនឹងរងគ្រោះដោយគ្រាប់មីស៊ីល
យន្តហោះដឹកអ្នកដំណើរអង់គ្លេសមួយ បានគេចចេញយ៉ាងប្រថុចញ៉ុចបំផុត ចេញពីគ្រាប់មីស៊ីល នៅក្នុងតំបន់ស៊ីណៃ។ ព្រឹត្តិការណ៍នេះបានកើតមាន កាលពីខែសីហា កន្លងទៅ ប៉ុន្តែ កាសែតអង់គ្លេស Daily Mail ទើបតែចុះផ្សាយវា កាលពីថ្ងៃសៅរ៍ម្សិលមិញ គឺនៅមួយសប្តាហ៍ក្រោយ យន្តហោះរុស្ស៊ី ទើបបានជួបគ្រោះថ្នាក់ ផ្ទុះធ្លាក់ និងសម្លាប់មនុស្សជាង ២០០នាក់ នៅតំបន់ស៊ីណៃ ដដែលនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
អ្នកបើកបរយន្តហោះអង់គ្លេស ធ្លាប់បានបញ្ជៀសមិនឲ្យមានសោកនាដកម្ម។ កាលពីរដូវក្តៅកន្លងទៅ យន្តហោះអង់គ្លេសរបស់ក្រុមហ៊ុនThomson ដែលដឹកអ្នកទេសចរអង់គ្លេស ប្រមាណ ១៨៩ នាក់ បានគេចផុត ទាន់ពេលវេលា ពីគ្រាប់មីស៊ីល។ ដំណឹងនេះទើបចុះផ្សាយដោយកាសែតអង់គ្លេស Daily Mailដែលបានសរសេរថា អ្នកបើកបរយន្តហោះ ដែលកំពុងត្រៀមចុះចត នៅព្រលានយន្តហោះ នៅ ស្ហាម អ៊ែលស្ហែក បានចាត់វិធានការយ៉ាងទាន់ហន់បំផុត ដើម្បីគេចចេញ ពីគ្រាប់មីស៊ីល ដែលហោះនៅចម្ងាយប្រមាណតែ ៣០០ម៉ែត្រប៉ុណ្ណោះ ពីតួយន្តហោះ។
យន្តហោះអង់គ្លេសអាចចុះចត ដោយគ្មានបញ្ហា ប៉ុន្តែ អ្នកដំណើរអង់គ្លេស ទាំង ១៨៩ នាក់ មិនត្រូវបានគេផ្តល់ព័ត៌មានពីរឿងនេះទេ។ រដ្ឋាភិបាលអង់គ្លេស របស់លោកដាវីដ កាមឺរ៉ូនបានបញ្ជាក់ដំណឹងចុះផ្សាយរបស់កាសែត ប៉ុន្តែ អះអាងថា ឧប្បត្តិហេតុកាលពីខែសីហា គ្មានជាប់ពាក់ព័ន្ធនឹងគ្រោះថ្នាក់យន្តហោះរុស្ស៊ី នៅស្ហាម អ៊ែលស្ហែក កាលពីសប្តាហ៍មុនឡើយ។ តាមសេចក្តីថ្លែងការណ៍របស់រដ្ឋាភិបាលអង់គ្លេស នៅក្រោយឧប្បត្តិហេតុ កាលពីខែសីហា គេបានស៊ើបអង្កេត និងរកឃើញថា យន្តហោះអង់គ្លេសមិនមែនជាផ្ទាំងស៊ីបនៃការវាយប្រហារណាមួយទេ ប៉ុន្តែ មីស៊ីលដែលយន្តហោះដឹកអ្នកដំណើរអង់គ្លេស អាចត្រូវរង គឺជាមីស៊ីលរបស់យោធាអេហ្ស៊ីបដែលធ្វើសមយុទ្ធជាប្រចាំ នៅតំបន់នោះ។ ទីក្រុងឡុងដ៍បានបដិសេធផងដែរ ដំណឹងដែលថា មីស៊ីលហោះនៅចម្ងាយ៣០០ម៉ែត្រពីយន្តហោះដឹកអ្នកដំណើរអង់គ្លេស។
អ្នកនាំពាក្យរបស់ក្រសួងការបរទេសអេហ្ស៊ីបវិញ បានរុញច្រានចោលការចោទប្រកាន់ដ៏រាក់កំភែល ព្រោះថា សមយុទ្ធដែលយោធាអេហ្ស៊ីបបានធ្វើគឺនៅលើដី។ លើសពីនោះ ទាំងរដ្ឋាភិបាលអេហ្ស៊ីប និងអង់គ្លេសត្រូវបានជូនដំណឹងរួចហើយថា យន្តហោះដែលហោះនៅស្ហាម អ៊ែលស្ហែក នឹងគ្មានរងគ្រោះថ្នាក់នៅក្នុងពេលយោធាអេហ្ស៊ីបធ្វើសមយុទ្ធនោះទេ។
ការបកស្រាយរបស់ក្រុងឡុងដ៍ និងក្រុងគែរនៅតែមិនទាន់អាចធ្វើឲ្យ អ្នកជំនាញជឿទុកចិត្តបាន ព្រោះគេឆ្ងល់ថា ហេតុអ្វី បានជាសមយុទ្ធដែលមានបាញ់គ្រាប់កាំភ្លើង ដ៏គ្រោះថ្នាក់ ត្រូវធ្វើនៅក្បែរអាកាសយានដ្ឋាន ដែលសំបូរយន្តហោះ ហោះចេញចូលទៅវិញ? សម្រាប់ក្រុមអ្នកជំនាញ អាជ្ញាធរអេហ្ស៊ីបលើកយកឧប្បត្តិហេតុនៅក្នុងសមយុទ្ធយោធា ក៏ព្រោះតែចង់បិទបាំង មិនចង់ឲ្យគេដឹងពីសកម្មភាពភេរវនិយម ដែលអាចគំរាមកំហែង តំបន់ទេសចរណ៍ ស្ហាម អ៊ែលស្ហែក (ច្រកដង្ហើមសេដ្ឋកិច្ចមួយរបស់អេហ្ស៊ីប)។
លោកនាយករដ្ឋមន្រ្តី អង់គ្លេស នៅសប្តាហ៍នេះបានបញ្ជារឲ្យគេផ្អាកការហោះហើរពីអង់គ្លេស ទៅអេហ្ស៊ីប នៅក្រោយគ្រោះថ្នាក់ធ្លាក់យន្តហោះរុស្ស៊ី ដែលទីភ្នាក់ងារស៊ើបការណ៍សម្ងាត់អង់គ្លេសវាយតម្លៃថា ផ្ទុះធ្លាក់ ដោយសារភេរវកម្មបំផ្ទុះគ្រាប់បែក។ កាលពីថ្ងៃសុក្រ អង់គ្លេសបានបញ្ជូនយន្តហោះ ទៅដឹកជនជាតិរបស់ខ្លួន ប្រមាណ ២ម៉ឺននាក់ ដែលកំពុងមានវត្តមាននៅតំបន់ស៊ីណៃ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ