ហាម៉ាសព្រមឱ្យប៉ាឡេស្ទីនចូលតុលាការព្រហ្មទណ្ឌអន្តរជាតិដើម្បីបានប្តឹងអ៊ីស្រាអែល
នាវានិងយន្តហោះចម្បាំងអ៊ីស្រាអែលបានបញ្ចេញសកម្មភាព ផ្លោងនិងទម្លាក់គ្រាប់ លើចំណុចដៅសំខាន់ក្នុងតំបន់ហ្កាហ្សា យ៉ាងខ្លាំងនៅព្រឹកថ្ងៃសៅរ៍នេះ ! មានស្លាប់ជាច្រើននាក់ ខ្លះជាគ្រួសារទាំងមូលតែម្តង ! ហាម៉ាសត្រូវបង់ខាតនូវអ្វីដែលបានធ្វើការពីយប់ ! នេះជាប្រសាសន៍ព្រមានរបស់លោកនេតាន់យ៉ាហ៊ូ នាយករដ្ឋមន្ត្រីអ៊ីស្រាអែល ពេលឃើញគ្រាប់រ៉ុកកែតហាម៉ាសសម្លាប់កុមារអ៊ីស្រាអែល។ អ៊ីស្រាអែល-ប៉ាឡេស្ទីន វិលវល់ដោយការសងសឹក និងចោទប្រកាន់ទម្លាក់កំហុសដាក់គ្នាទៅវិញទៅមក។ សំណុំរឿងដែលនឹងអាចឈានដល់តុលាការព្រហ្មទណ្ឌអន្តរជាតិនាពេលខាងមុខ ព្រោះចលនាហាម៉ាសទើបបានចុះហត្ថលេខាព្រមព្រៀងឱ្យប៉ាឡេស្ទីនភ្ជាប់ខ្លួននឹងតុលាការព្រហ្មទណ្ឌក្រុងឡាអេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ការព្រមព្រៀងចុះហត្ថលេខារបស់ចលនាហាម៉ាសលើសំណើរបស់ប្រធានរដ្ឋអំណាចប៉ាឡេស្ទីន ម៉ាមូត អាបាស គឺជាការបើកផ្លូវឱ្យប៉ាឡេស្ទីនអាចសុំចុះឈ្មោះចូលជារដ្ឋសមាជិកតុលាការព្រហ្មទណ្ឌអន្តរជាតិ ដែលមានទីស្នាក់ការនៅទីក្រុងឡាអេ ស្របតាមអនុសញ្ញាក្រុងរ៉ូមបាន។
សេចក្តីជូនដំណឹងរបស់ប៉ាឡេស្ទីននេះធ្វើឡើង ពីរថ្ងៃក្រោយជំនួបនៅប្រទេសកាតា រវាងលោកប្រមុខដឹកនាំដែនដីប៉ាឡេស្ទីនម៉ាមូត អាប៉ាស និងប្រមុខដឹកនាំចលនាហាម៉ាស Khaled Mechaal។ សម្រាប់លោកម៉ាមូត អាប៉ាស វាគឺជាចាំបាច់តែគ្រប់ភាគី គ្រប់ចលនានៅប៉ាឡេស្ទីនទាំងអស់ ត្រូវព្រមព្រៀងគ្នាចុះហត្ថលេខាទទួលស្គាល់សន្ធិសញ្ញាក្រុងរ៉ូម ព្រោះជាលទ្ធភាពតែមួយគត់ដែលអាចនាំប៉ាឡេស្ទីនឱ្យភ្ជាប់ខ្លួនជាសមាជិកតុលាការព្រហ្មទណ្ឌអន្តរជាតិCPI បាន។ បើតាមអន្តរការី នៅសល់តែចលនាជីហាតអ៊ីស្លាម ចលនាធំទីពីរនៅតំបន់ហ្កាហ្សាមួយគត់ ដែលកំពុងស្ថិតក្នុងដំណាក់កាលពិចារណានៅឡើយ ពុំទាន់ចុះហត្ថលេខាទទួលយកសំណើរបស់លោកអាប៉ាស។
សូមអាន ៖ តើបុគ្គលឯកជនអាចប្តឹងទៅតុលាការព្រហ្មទណ្ឌអន្តរជាតិក្រុងឡាអេដែរឬទេ ?
តាំងពីថ្ងៃទី ៨ កក្កដាមក សង្គ្រាមរវាងអ៊ីស្រាអែល និងហាម៉ាសបានផ្ទុះឡើងជាថ្មីនៅតំបន់ហ្កាហ្សា។ ភាគីបក្ខដិបក្ខទាំងពីរ ចោទនិងទម្លាក់កំហុសដាក់គ្នាទៅវិញមកថាបានប្រព្រឹត្តឧក្រិដ្ឋកម្មសង្គ្រាម។ ដូច្នេះប្រសិនបើប៉ាឡេស្ទីនបានក្លាយជារដ្ឋសមាជិក នៃតុលាការព្រហ្មទណ្ឌអន្តរជាតិមែន ចលនានៅប៉ាឡេស្ទីនទាំងអម្បាលម៉ាន មានជាអាទិ៍ចលនាហាម៉ាស ក៏អាចនឹងត្រូវប្រឈមមុខនឹងការចោទប្រកាន់ពីតុលាការវិញដែរ។ ហេតុដូច្នេះហើយបានជានៅក្នុងឯកសារព្រមព្រៀងរបស់លោកមាម៉ូតអាប៉ាស មានបញ្ជាក់យ៉ាងច្បាស់ថាគ្រប់ភាគីហត្ថលេខី ត្រូវទទួលខុសត្រូវចំពោះការចូលជាសមាជិកអនុសញ្ញាក្រុងរ៉ូម។
ហេតុអ្វីបានជាប៉ាឡេស្ទីនចង់ចូលជាសមាជិកតុលាការ ?! អាជ្ញាធរប៉ាឡេស្ទីនធា្លប់បានដាក់ពាក្យបណ្តឹងម្តងជាពីរដង ទៅតុលាការក្រុងឡាអេ ប្រឆាំងនឹងអ៊ីស្រាអែលពីបទប្រព្រឹត្តឧក្រិដ្ឋកម្មសង្គ្រាម ប៉ុន្តែរដ្ឋអាជ្ញាបានច្រានចោលមិនទទួលពាក្យបណ្តឹង ដោយសំអាងថាប៉ាឡេស្ទីនមិនមែនជារដ្ឋសមាជិក ឬជារដ្ឋទទួលសមត្ថកិច្ចរបស់តុលាការ។ ដូច្នេះជាមួយនឹងការទទួលបានឋានៈជារដ្ឋសង្កេតការណ៍នៅអង្គការសហប្រជាជាតិ កាលពីខែវិច្ឆិកា ២០១២ ប៉ាឡេស្ទីនពេលនេះក៏ មានសិទ្ធិចូលជាសមាជិកអង្គការ ឬអនុសញ្ញាអន្តរជាតិផ្សេងៗបាន។ ចំណែកអ៊ីស្រាអែលវិញ បានចុះហត្ថលេខាទទួលស្គាល់អនុសញ្ញាក្រុងរ៉ូមហើយ ប៉ុន្តែមិនទាន់ផ្តល់សច្ចាប័ននៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ