ប៉ូលិសឥណ្ឌារឹបអូសកាសែតច្រើនច្បាប់ ដើម្បីកាត់បន្ថយភាពតានតឹងនៅតំបន់កាស្មៀរ
នៅថ្ងៃសៅរ៍១៦កក្កដានេះ ប៉ូលិសឥណ្ឌាបានរឹបអូសកាសែតរាប់សែនច្បាប់ និងចាប់ខ្លួនបុគ្គលិកបោះពុម្ពផ្សាយច្រើននាក់ ដើម្បីហាមឃាត់មិនអោយព័ត៌មានចុះផ្សាយ បន្ថែមភាពតានតឹងដល់តំបន់កាស្មៀរឥណ្ឌា។ ជាព័ត៌មានទាក់ទងការប្រឈមហិង្សារវាងក្រុមបាតុករនិងកងកម្លាំង រដ្ឋាភិបាលសប្តាហ៍មុន។ ការប្រឈមបានធ្វើអោយមនុស្សស្លាប់៣៩នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
នៅតំបន់កាស្មៀរឥណ្ឌា ប៉ូលិសឥណ្ឌាបានចុះទៅទីកន្លែងបោះពុម្ពផ្សាយកាសែតច្រើនកន្លែង រឹបអូសយកកាសែត មិនអោយចុះផ្សាយព័ត៌មាន ស្តីពីការប្រឈមហិង្សារវាងក្រុមបាតុករនិងទាហានឥណ្ឌា ក្នុងពេលកន្លងមក។ អាជ្ញាធរឥណ្ឌាបានព្យូរការផ្សាយតាមអ៊ីនថឺនែត និងបណ្តាញសង្គម ព្រមទាំងតាមទូរទស្សន៍ខ្សែកាបរួចដែរហើយ។
មូលហេតុគឺអាជ្ញាធរខ្លាចព័ត៌មានទាក់ទងហិង្សារវាងបាតុករនិងទាហាន សប្តាហ៍មុន អាចធ្វើអោយភាពតានតឹងតំបន់កាស្មៀរកាន់តែមិនអាចដោះស្រាយបាន។ តំបន់កាស្មៀបានធ្លាក់ក្នុងភាពតានតឹង តាំងពីថ្ងៃ៨កក្កដា ក្រោយពេលកងទ័ពរដ្ឋាភិបាលបានសម្លាប់មេដឹកនាំឧទ្ទាមអ៊ីស្លាមដ៏មានប្រជាប្រិយភាពមួយរូប ឈ្មោះថា បៀហាន វ៉ានី។
ក្រុមបាតុករខឹងសម្បារខ្លាំង បាននាំគ្នាដុតប៉ុស្តិ៍ប៉ូលិស និងគប់ដុំថ្មទៅលើទីតាំងទាហានតំបន់កាស្មៀរ។ ការប្រឈមហិង្សាបានធ្វើអោយមនុស្សរបួសជាង៣០០០នាក់ ក្នុងនោះមានប៉ូលិស២០០នាក់។ នេះជាហិង្សាធ្ងន់ធ្ងរបំផុត គិតពីឆ្នាំ២០១០មក។ អាជ្ញាធរបានដាក់ចេញបំរាមគោចរអនុវត្ត៨ថ្ងៃហើយ គិតដល់ថ្ងៃសៅរ៍នេះ។
ថ្ងៃសៅរ៍នេះដែរ ទាហានឥណ្ឌាប្រាប់ថា បានសម្លាប់ភេរវជន៣នាក់ ដែលចង់ឆ្លងពីប៉ាគីស្ថាន ចូលក្នុងទីតាំងព្រំដែនមិនផ្លូវការ ដែលបែងចែកតំបន់កាស្មៀរ រវាងឥណ្ឌានិងប៉ាគីស្ថាន។ ប្រទេសទាំង២ដណ្តើមបូរណភាពកាស្មៀរ តាំងពិឆ្នាំ១៩៤៧ម្ល៉េះ។
នៅកាស្មៀរ មានក្រុមឧទ្ទាមច្រើនក្រុមប្រយុទ្ធប្រឆាំងកងទ័ពឥណ្ឌា ដើម្បីទាមទារឯករាជ្យតំបន់កាស្មៀរ រឺក៏ដើម្បីចូលអោយជិតស្និទ្ធជាមួយប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ