បាតុករអ៊ីរ៉ាក់ ប្រកាសផ្តួលរំលំរដ្ឋាភិបាល
នៅអ៊ីរ៉ាក់ ហ្វូងបាតុករប្រកាសផ្តួលរំលំរដ្ឋាភិបាល។ បាតុកម្មដែលអូសបន្លាយជាងមួយខែមកនេះ សម្លាប់មនុស្សចំនួន២៥៨នាក់។ ពេលនេះ សាលារៀន សហជីពនិស្សិត និងស្ថាប័នរដ្ឋភាគច្រើន ប្រកាសបិទទ្វារ ឈប់រៀន និងឈប់ធ្វើការ«តាមបញ្ជារបស់ប្រជាជនបាតុករ»។ នាយករដ្ឋមន្ត្រីអ៊ីរ៉ាក់ អាចទំនងជាត្រូវលាចុះពីតំណែង ហើយប្រធានាធិបតីក៏បានប្រកាសសន្យារៀបចំការបោះឆ្នោតជាថ្មី នៅក្នុងពេលឆាប់ៗនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
បាតុកម្មតាមដងផ្លូវនៅអ៊ីរ៉ាក់ ផ្ទុះឡើងនិងបានបន្តធ្វើការតវ៉ាជាប់ឥតដាច់រយៈ តាំងតែពីថ្ងៃទី១តុលារហូតមក។ ហ្វូងបាតុករ នៅក្នុងចុងសប្តាហ៍នេះ បានប្រមូលផ្តុំគ្នាបិទផ្លូវ បិទស្ពានពីរសំខាន់ៗ ដែលច្រកធ្វើដំណើរដ៏ចាំបាច់សម្រាប់ចូលរដ្ឋធានី Bagdad។ ចំពោះបាតុករ ការបិទច្រកផ្លូវនេះ ជាការផ្តល់សារដ៏ចាំបាច់ទៅកាន់រដ្ឋាភិបាលអ៊ីរ៉ាក់។
ប្រភពពីអាជ្ញាធរថា ក្នុងការប៉ះទង្គិចគ្នា នៅយប់ថ្ងៃសុក្រចូលថ្ងៃសៅរ៍ មានមនុស្សស្លាប់ម្នាក់, ក្នុងរាត្រីថ្ងៃសៅរ៍ឈានចូលថ្ងៃអាទិត្យ ស្លាប់ម្នាក់ទៀត ហើយជាសរុបរួម តាំងពីពេលផ្ទុះបាតុកម្មជាងមួយខែមកនេះ មានមនុស្សស្លាប់ ចំនួន២៥៨នាក់។ ក៏ប៉ុន្តែបើតាមប្រភពផ្សេងៗនិងបុគ្គលិកមន្ទីរពេទ្យ បង្ហើបថាមានស្លាប់ច្រើនជាងនេះ។
នៅថ្ងៃចុងសប្តាហ៍នេះ បណ្តាសាលារៀន និងស្ថាប័នរដ្ឋភាគច្រើន ប្រកាសបិទទ្វារ ឈប់រៀន និងឈប់ធ្វើការ«តាមបញ្ជារបស់ប្រជាជនបាតុករ» ហើយសហជីពនិស្សិត ចូលរួមសកម្មក្នុងការដឹកនាំការតវ៉ាធ្វើបាតុកម្ម។ សូម្បីតែជនពិការ ក៏បានចូលរួមធ្វើបាតុកម្មដែរ។ នៅក្នុងការប្រមូលផ្តុំគ្នាពីថ្ងៃសៅរ៍ ជនពិការជាង២០០នាក់ បានប្រកាសចូលរួមជាមួយចលនាបាតុកម្ម។
នៅអ៊ីរ៉ាក់ មនុស្សមានពិការភាព មានជាង៤លាននាក់ ដែលរងគ្រោះដោយសង្គ្រាម។ ពលរដ្ឋរស់នៅឈឺចុកចាប់ទាំងផ្លូវការផ្លូវចិត្ត ដ្បិតខ្លួនឬសមាជិករបស់ខ្លួន មានពិភារភាព ព្រោះតែប្រទេសជាតិទទួលរងជម្លោះរ៉ាំរ៉ៃជាច្រើនឆ្នាំ។ ដូចជាសង្គ្រាមអ៊ីរ៉ាក់និងអ៊ីរ៉ង់ ក្នុងទសវត្សរ៍១៩៨០ និងការវាយប្រហារយោធាពីសំណាក់កងទ័ពអាមេរិក នៅអ៊ីរ៉ាក់ ឆ្នាំ២០០៣ ហើយបន្តមកទៀត ប្រទេសអ៊ីរាក់ត្រូវញ៉ាំញីដោយអំពើហិង្សាបង្ហូរឈាមនិងឃាតកម្ម ព្រមទាំងត្រូវដឹកនាំដោយប្រព័ន្ធនយោបាយមួយដែលពុករលួយស៊ីរូង។ កត្តាទាំងអស់នេះហើយដែលធ្វើឱ្យពលរដ្ឋអ៊ីរ៉ាក់អួលណែនឆ្អែតឆ្អន់ចិត្ត ហើយពួកចង់ក្រោកឈរងើបរើបម្រះពីប្រព័ន្ធដឹកនាំដែលពុករលួយ និងអយុត្តិធម៌។
ប្រឈមមុខនឹងវិបត្តិធំនៃបាតុកម្មកាន់តែច្រើន! ប្រធានាធិបតីអ៊ីរ៉ាក់ ប្រកាសសន្យារៀបចំការបោះឆ្នោតជាថ្មីនៅពេលឆាប់ៗ។ ក៏ប៉ុន្តែ បាតុករខ្លះ បានប្រាប់អ្នកសារព័ត៌មានបារាំងAFP ដែលឈរជើងនៅក្រុងបាកដាដថា «បើទោះបីជារៀបចំការឆ្នោតជាថ្មីក៏ដោយ ក៏គេទំនងជាមិនសូវជឿ ថាអាចបណ្តេញពួកជនពុករលួយក្នុងជួររដ្ឋាភិបាលនិងក្នុងជួររដ្ឋអំណាច ចេញពីកៅអីបានដែរ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ