អ៊ីរ៉ង់ចោទអារ៉ាប៊ីសាអ៊ូឌីតនិងអាមេរិកថាជាអ្នកនៅពីក្រោយភេរវកម្មនៅតេហេរ៉ង់
ភេរវកម្មពីរកន្លែងផ្ទួនៗគ្នា នៅក្នុងទីក្រុងតេហេរ៉ង់ ប្រទេសអ៊ីរ៉ង់ កាលពីថ្ងៃពុធម្សិលមិញ បានបណ្តាលឲ្យមានអ្នកស្លាប់ ១៣នាក់ និងរបួសយ៉ាងតិច ៤៦នាក់។ អាជ្ញាធរអ៊ីរ៉ង់បានទទួលស្គាល់ថា ភេរវជនគឺជាពលរដ្ឋអ៊ីរ៉ង់ តែធ្វើការឲ្យក្រុមជីហាតរដ្ឋអ៊ីស្លាម។ អ៊ីរ៉ង់ក៏បានធ្វើការចោទប្រកាន់ផងដែរថា អារ៉ាប៊ីសាអ៊ូឌីត និងសហរដ្ឋអាមេរិក គឺជាអ្នកនៅពីក្រោយការវាយប្រហារភេរវកម្មនេះ។
ចុះផ្សាយនៅថ្ងៃ៖
ការចោទប្រកាន់ពីការជាប់ពាក់ព័ន្ធរបស់អារ៉ាប៊ីសាអ៊ូឌីត និងសហរដ្ឋអាមេរិក នៅក្នុងការវាយប្រហារភេរវកម្មកាលពីថ្ងៃពុធ ត្រូវបានធ្វើឡើងដោយ “ឆ្មាំបដិវត្តន៍” ដែលជាកងកម្លាំងប្រដាប់អាវុធដ៏មានឥទ្ធិពល និងដែលស្និទ្ធនឹងប្រមុខដឹកនាំកំពូលអ៊ីរ៉ង់។ នៅក្នុងសេចក្តីប្រកាសព័ត៌មានចេញផ្សាយ កាលពីថ្ងៃពុធ “ឆ្មាំបដិវត្តន៍” បានធ្វើការកត់សម្គាល់ជាពិសេសថា ការវាយប្រហារភេរវកម្មនៅអ៊ីរ៉ង់នេះបានកើតឡើងតែប៉ុន្មានថ្ងៃប៉ុណ្ណោះ ក្រោយពីជំនួប រវាងលោកដូណាល់ត្រាំ និងប្រមុខដឹកនាំប្រទេសអារ៉ាប់នៅឈូងសមុទ្រពែក្ស។
ពីខាងសហរដ្ឋអាមេរិកវិញ ក្រសួងការបរទេស ក៏ដូចជាលោកដូណាល់ត្រាំផ្ទាល់បានថ្លែងចូលរួមមរណទុក្ខជាមួយអ៊ីរ៉ង់ ក៏ប៉ុន្តែ ព្រមជាមួយនឹងការចូលរួមមរណទុក្ខ លោកដូណាល់ត្រាំក៏បានថ្លែងបែបព្រមានចំពោះអ៊ីរ៉ង់ផងដែរថា “ប្រទេសដែលគាំទ្រភេរវកម្ម គឺអាចនឹងក្លាយជាអ្នករងគ្រោះដោយភេរវកម្មវិញដោយខ្លួនឯង”។ ឆ្លើយតបមកវិញ រដ្ឋមន្រ្តីការបរទេសអ៊ីរ៉ង់បានចាត់ទុកការចូលរួមមរណទុក្ខដែលធ្វើឡើងដោយលោកដូណាល់ត្រាំថាជារឿង “ដ៏គួរឲ្យឆ្អើម”។
គួរបញ្ជាក់ថា នេះគឺជាលើកទី១ហើយ ដែលការវាយប្រហារភេរវកម្មដោយក្រុមជីហាតរដ្ឋអ៊ីស្លាម បានកើតមានឡើង នៅក្នុងប្រទេសអ៊ីរ៉ង់។ អ៊ីរ៉ង់គឺជាប្រទេសអ៊ីស្លាមនិកាយស្ហ៊ីអ៊ីត ចំណែកឯក្រុមជីហាតរដ្ឋអ៊ីស្លាម គឺជាក្រុមស៊ុននីតជ្រុលនិយម ដែលអ៊ីរ៉ង់តែងតែចោទថាជាកូនអុក ដែលអារ៉ាប៊ីសាអ៊ូឌីតយកមកប្រើ ដើម្បីកម្ចាត់អ៊ីរ៉ង់។ ចំណែកអារ៉ាប៊ីសាអ៊ូឌីត និងសហរដ្ឋអាមេរិកវិញ តែងតែចោទប្រកាន់អ៊ីរ៉ង់ថាជាប្រទេសគាំទ្រភេរវកម្មនៅក្នុងតំបន់ ជាពិសេស គឺគាំទ្រក្រុមហាម៉ាស់នៅប៉ាឡេស្ទីន និងក្រុមហេសបូឡានៅលីបង់។
គេសង្កេតឃើញថា ប្រទេសជាច្រើនបានធ្វើការថ្កោលទោសការវាយប្រហារភេរវកម្មនៅតេហេរ៉ង់ កាលពីថ្ងៃពុធម្សិលមិញ។ ក្រៅពីស៊ីរី អ៊ីរ៉ាក់ និងរុស្ស៊ី ដែលជាសម្ព័ន្ធមិត្តអ៊ីរ៉ង់ បណ្តាប្រទេសលោកខាងលិចខ្លះ រួមមានដូចជា បារាំង និងអាល្លឺម៉ង់ ជាដើម សុទ្ធតែបានថ្កោលទោសភេរវកម្មនេះ។ សូម្បីតែប្រទេសអារ៉ាប់រួម ដែលជាសម្ព័ន្ធមិត្តរបស់អារ៉ាប៊ីសាអ៊ូឌីត ហើយដែលបច្ចុប្បន្នកំពុងប្រឈមមុខយ៉ាងតានតឹងជាមួយអ៊ីរ៉ង់ ក៏បានចេញមុខថ្កោលទោសការវាយប្រហារភេរវកម្មលើអ៊ីរ៉ង់នេះដែរ។
គួររំឭកឡើងវិញថា អារ៉ាប់រួមស្ថិតក្នុងចំណោមបណ្តាប្រទេសអារ៉ាប់ នាំមុខដោយអារ៉ាប៊ីសាអ៊ូឌីត ដែលបានកាត់ផ្តាច់ទំនាក់ទំនងជាមួយកាតារ ដោយចោទកាតារថាផ្តល់លុយកាក់ជួយក្រុមភេរវជនផង និងកំពុងតែព្យាយាមបង្កើនទំនាក់ទំនងជាមួយនឹងអ៊ីរ៉ង់ ដែលជាគូសត្រូវរបស់អារ៉ាប៊ីសាអ៊ូឌីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ