តួកគី៖ មនុស្ស៣៤នាក់ ត្រូវជាប់ទោសមួយជីវិត ក្នុងសំណុំរឿងធ្វើរដ្ឋប្រហារ
យោងតាមការផ្សាយរបស់ទីភ្នាក់ងារព័ត៌មានតួកគី Anadolu បានឲ្យដឹងថា អង្គសវនាការមួយ ត្រូវបានបើកទ្វារ កាលពីថ្ងៃពុធ ទី ៤ តុលា ដើម្បីកាត់ទោសមនុស្សចំនួន៣៤នាក់ ដែលជាប់ចោទ ពីបទរៀបចំធ្វើរដ្ឋប្រហារ ផ្តួលរំលំរដ្ឋាភិបាលលោក អ៊ែរដូហ្កាន់ កាលពីខែកក្កដា ឆ្នាំ២០១៦។ មនុស្សទាំង៣៤នាក់ ត្រូវបានតុលាការតួកគី ផ្តន្ទាទោស ឲ្យជាប់ពន្ធនាគារ មួយជីវិត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
តុលាការក្រុង Mugla នៅភាគនិរតីតួកគី បានបើកសវនាការ កាលពីរសៀលថ្ងៃពុធ ទី ៤តុលា ដើម្បីកាត់ទោស មនុស្ស៣៤នាក់ ពីបទបានរៀបចំដឹកនាំការធ្វើរដ្ឋប្រហារ កាលពីថ្ងៃទី ១៦ កក្កដា ឆ្នាំ២០១៦។ ក្នុងចំណោម ជនជាប់ចោទទាំង៣៤នាក់ មានអតីតមេបញ្ជាការកងទ័ពម្នាក់ ឈ្មោះ Gokhan Sonmezates ដែលត្រូវគេចោទថា ជាមេក្លោងក្រុមធ្វើរដ្ឋប្រហារ ហើយដែលជននេះ មានបេសកកម្ម ត្រូវទៅចាប់យកលោកប្រធានាធិបតីអ៊ែរដូហ្កាន់ មកសំលាប់ឲ្យបាន ក្នុងយប់ធ្វើប្រតិបត្តិការ។ នេះបើតាមការផ្សាយរបស់ បណ្តាញទូរទស្សន៍រដ្ឋតួកគី។
ថ្វីបើមានការស្រែកទាមទារ ពីសំណាក់មនុស្សជាច្រើន នៅខាងក្រៅតុលាការ ថាត្រូវប្រហារជីវិត ជនជាប់ចោទ តុលាការតួកគី បានសម្រេច ផ្តន្ទាទោសជនជាប់ចោទទាំង ៣៤ ដោយទោសជាប់ពន្ធនាគារមួយជីវិត។ ដោយឡែក តុលាការបានសម្រេច បំបែកសំណុំរឿងនេះ ចេញពីសំណុំរឿង១ផ្សេងទៀត ដែលមានជាប់ឈ្មោះមនុស្ស៣នាក់ ផ្សេង ហើយដែលក្នុងនោះ មានឈ្មោះលោក Fathullah Gulen ។ លោក Fathullah Gulen ប្រមុខសាសនា និងនយោបាយតួកគី ដែលត្រូវបានរដ្ឋាភិបាលតួកគី ចោទថាជាមេគំនិតរដ្ឋប្រហារ នេះ ត្រូវបានតុលាការតួកគី កាត់ទោស ដោយកំបាំងមុខរួចហើយ។
សូមបញ្ជាក់ថា រដ្ឋប្រហារមិនបានសម្រេច របស់ក្រុមយោធា មួយក្រុម ដែលប៉ុនប៉ងរំលំរបបដឹកនាំលោក អ៊ែរដូហ្កាន់ បានប្រែក្លាយ ទៅជាឱកាសមាស សម្រាប់លោកអ៊ែរដូហ្កាន់ ទៅវិញ។ ក្រោយរដ្ឋប្រហារ លោកប្រធានាធិបតីតួកគី បានបើកប្រតិបត្តិការបោសសំអាតផ្ទៃក្នុង ក្នុងជួរកងទ័ព នគរបាល និងតាមក្រសួងនានា ដើម្បីកំចាយរាល់ចរន្តនយោបាយ ដែលមានទំនោរគាំទ្រ លោក Fathullah Gulen។
ចាប់តាំងពីខែកក្កដា ឆ្នាំ២០១៦មក មានមនុស្សយ៉ាងហោចណាស់ ៥ម៉ឺននាក់ ដែលត្រូវបានគេចាប់ឃុំខ្លួន ដោយពុំបានឆ្លងកាត់ការជំនុំជំរះ ហើយ និង១៤ម៉ឺននាក់ផ្សេងទៀត ដែលត្រូវគេដកហូតមុខដំណែងការងារ ឬត្រូវព្យួរជើងចោល។ សកម្មភាពបោសសំអាតអ្នកប្រឆាំង ក្នុងទ្រង់ទ្រាយដ៏ធំមហាសាលបែបនេះ បានធ្វើឲ្យគេសង្ស័យថា ការពិត រដ្ឋប្រហារមិនបានសម្រេចកាលពីខែកក្កដា ឆ្នាំ២០១៦ គឺគ្រាន់តែជាឆាកល្ខោន ដើម្បីបានឱកាស ចាប់អ្នកប្រឆាំងមកដាក់ឃុំប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ