កងទ័ពស៊ីរី បាញ់ទំលាក់យន្តហោះចម្បាំងអ៊ីស្រាអែល
នៅព្រឹកថ្ងៃសៅរ៍ទី ១០ កុម្ភៈនេះ កងទ័ពអាកាសស៊ីរី បានប្រកាសថា គេបានរុញច្រានការឈ្លានពានរបស់អ៊ីស្រាអែល ដោយបានបាញ់ទំលាក់យន្តហោះចម្បាំងមួយគ្រឿង។ បើតាមការផ្តល់ដំណឺង ពីកងទ័ពអ៊ីស្រាអែល ពិតជាមានយន្តហោះចម្បាំង ប្រភេទF16 របស់អ៊ីស្រាអែល បានធ្លាក់មួយគ្រឿងមែន ដែលយន្តហោះនោះ បំរុងហោះទៅបើកការវាយប្រហារ លើមូលដ្ឋានទ័ពអ៊ីរ៉ង់ ក្នុងទឹកដីស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
ទីភ្នាក់ងារព័ត៌មាន Sana របស់ស៊ីរី បានប្រកាសឲ្យដឹង ដោយយោងតាមប្រភពពីកងទ័ពស៊ីរីថា៖ “ពួកអ៊ីស្រាអែលឈ្លានពាន បានបង្ហោះយន្តហោះចម្បាំង បំរុងនឹងវាយប្រហារលើមូលដ្ឋានទ័ពរបស់យើងជាថ្មីម្តងទៀត ក៏ប៉ុន្តែ ផែនការនេះ ត្រូវបរាជ័យ ដោយសារកងកម្លាំងការពារដែនអាកាសរបស់យើង បានវាយបកទៅវិញ”។
យោងតាមប្រភពដដែលនេះ កងទ័ពស៊ីរីអះអាងថា បានបាញ់ត្រូវយន្តហោះចម្បាំងជាច្រើនគ្រឿង របស់អ៊ីស្រាអែល ហើយមានយ៉ាងហោចមួយគ្រឿង ដែលបានធ្លាក់ផ្ទុះ។ យ៉ាងណាមិញ ប្រភពពីកងទ័ពអ៊ីស្រាអែល ឯណោះ បានឲ្យដឹងថា ពិតជាមានយន្តហោះប្រភេទ F16 បានធ្លាក់ មួយគ្រឿងមែន នៅភាគខាងជើងអ៊ីស្រាអែល។ អ្នកបើកបរទាំង២នាក់ បានចុចប៊ូតុង ហក់ចេញតាមឆ័ត្រយោង ធ្លាក់មកដល់ដី ដោយត្រូវរបួសជាទំងន់។
កងទ័ពអ៊ីស្រាអែល បានចេញលិខិតប្រកាសឲ្យដឹងថា យន្តហោះចម្បាំងអ៊ីស្រាអែល F16 ជាច្រើនគ្រឿង បានចេញប្រតិបត្តិការនៅវេលាទៀបភ្លឺ ថ្ងៃទី១០កុម្ភៈនេះ ដើម្បីវាយសំដៅលើមូលដ្ឋានទ័ពអ៊ីរ៉ង់ នៅក្នុងទឹកដីស៊ីរី។ ប្រតិបត្តិការនេះ គឺជាការឆ្លើយតប បន្ទាប់ពីកងទ័ពអ៊ីស្រាអែល បានចាប់បាននូវយានដ្រូនមួយគ្រឿង របស់អ៊ីរ៉ង់ដែលបង្ហោះចេញពីមូលដ្ឋាននោះ សំដៅមកអ៊ីស្រាអែល។ លោកមេបញ្ជាការ Jonathan Conricus អ្នកនាំពាក្យកងទ័ពអ៊ីស្រាអែល បានសរសេរតាមTwitter ថា អ្នកបង្ករឿងនេះមុន គឺអ៊ីរ៉ង់។ លោកថា អ៊ីស្រាអែល ត្រូវតែរកវិធី ដើម្បីទប់ទល់នឹងការរំលោភដែនអធិបតេយ្យ របស់ខ្លួន។
ដោយឡែក បើតាមប្រសាសន៍លោក Rami Abdel Rahmane អគ្គនាកយកអង្គការឃ្លាំមើលសិទ្ធិមនុស្សនៅស៊ីរី បានឲ្យដឹងថា យន្តហោះអ៊ីស្រាអែលទំនងជាមានបំណង ហោះទៅបើកប្រតិបត្តិការ នៅភាគខាងកើតខេត្ត Homs ក្នុងទឹកដីស៊ីរី ព្រោះទីនោះ មានបន្ទាយធំរបស់កងទ័ពអ៊ីរ៉ង់ និងក្រុមហេសបូឡាលីបង់។
គួរកត់សម្គាល់ថា អ៊ីស្រាអែលថ្វីបើព្យាយាមនៅឆ្ងាយ ពីវិបត្តិសង្រ្គាមនៅស៊ីរី មែនពិត តែអ៊ីស្រាអែល ព្រួយបារម្ភ និងតាមដានយ៉ាងស្អិត ទាក់ទិនទៅនឹងជំនួយយោធារបស់អ៊ីរ៉ង់ ដែលផ្គត់ផ្គង់កងទ័ពរដ្ឋាភិបាលស៊ីរី។ អ៊ីរ៉ង់ ដែលជាសត្រូវធំបំផុតរបស់អ៊ីស្រាអែលនោះ ត្រូវអ៊ីស្រាអែលសង្ស័យថា កំពុងលួចលាក់ ដំឡើង និងផលិតអាវុធសាហាវៗ នៅក្នុងទឹកដីស៊ីរី ព្រមទាំងបានបញ្ជូនអាវុធ ទៅឲ្យក្រុមហេសបូឡាលីបង់ ទៀតផង។ យ៉ាងណាមិញ អ៊ីស្រាអែលបានបាញ់មីស៊ីលជាច្រើនលើក សំដៅកំទេច ទីតាំងស្តុកអាវុធ និងក្បួនដឹកជញ្ជូនអាវុធ នៅក្នុងទឹកដីស៊ីរី។
យ៉ាងណាក៏ដោយ នេះជាលើកទៅមួយហើយ ដែលអ៊ីស្រាអែល ប្រកាសជាផ្លូវការ ថាខ្លួន បានប្រើយន្តហោះចម្បាំង ទៅវាយប្រហារលើមូលដ្ឋានទ័ពរបស់អ៊ីរ៉ង់ ដោយចំៗតែម្តង។ បើទោះបីជាមិនទាន់ចេញរូបរាងជាផ្លូវការមែនពិត តែគ្រប់គ្នាដឹងក្នុងចិត្តយ៉ាងច្បាស់ថា សមរភូមិថ្មីរវាងអ៊ីស្រាអែល និងអ៊ីរ៉ង់ នៅក្នុងទឹកដីស៊ីរី អាចនឹងផ្ទុះឡើង ដោយចៀសមិនរួច បើសិនជាមានករណីផ្ទុះអាវុធ ស្លាប់ប្រជាជនស្លូតត្រង់ នៅភាគីខាងណាមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ