អ៊ីរ៉ង់ បញ្ជូនយន្តហោះ៥គ្រឿង ដឹកស្បៀងទៅជួយកាតា
មួយសប្តាហ៍ក្រោយពេលដែលអារ៉ាប៊ីសាអូឌីត និងប្រទេសអារ៉ាប់៤ផ្សេងទៀត បាននាំគ្នាផ្តាច់ទំនាក់ទំនងការទូត ជាមួយកាតា ព្រមទាំងបានបិទព្រំដែនទាំងផ្លូវគោក ផ្លូវទឹក និងផ្លូវអាកាសនោះ កាតាកំពុងស្ថិតក្នុងភាពឯកោ និងប្រឈមមុខនឹងការខ្វះខាតទំនិញសព្វសារពើ។ នៅថ្ងៃអាទិត្យទី ១១ មិថុនានេះ អាជ្ញាធរអ៊ីរ៉ង់ បានបញ្ជាក់ថា គេបញ្ជូនយន្តហោះ៥គ្រឿង ដែលមានដឹកស្បៀងរាប់សិបតោន ទៅជួយដល់កាតា។
ចុះផ្សាយនៅថ្ងៃ៖
ស្តាប់ - ០២:២០
អ្នកនាំពាក្យក្រុមហ៊ុនអាកាសចរណ៍ជាតិអ៊ីរ៉ង់ បានបញ្ជាក់ប្រាប់ នៅថ្ងៃទី១១ មិថុនានេះថា រហូតមកត្រឹមពេលនេះ អ៊ីរ៉ង់ បានបញ្ជូនយន្តហោះដឹកស្បៀង មានបន្លែចំណីអាហារ ចំនួន៥គ្រឿងរួចមកហើយ ដែលមួយគ្រឿងៗ មានផ្ទុកទំនិញចំនួន៩០តោន។ យន្តហោះទី៦ និងត្រៀមខ្លួនចេញទៅនៅថ្ងៃអាទិត្យនេះ បន្ថែមទៀត។ អ្នកនាំពាក្យដដែលនេះ បន្តថា អ៊ីរ៉ង់ នឹងបន្តបញ្ជូនទំនិញ និងស្បៀងគ្រប់មុខ ទៅកាតា ដរាបណាកាតា នៅតែសំណូមពរ។ តែយ៉ាងណា មន្ត្រីអ៊ីរ៉ង់រូបនេះ មិនបានបញ្ជាក់ទេថា នេះគឺជាជំនួយរបស់អ៊ីរ៉ង់ ឬក៏ជាទំនិញ ដែលអ៊ីរ៉ង់លក់ទៅឲ្យកាតា។
ក្រៅពីទំនិញបញ្ជូនទៅតាមជើងយន្តហោះ អ៊ីរ៉ង់ ក៏បានបញ្ជូនទំនិញ៣៥០តោន តាមនាវាចំនួន៣ ឆ្ពោះទៅកាន់កាតា ដែលស្ថិតនៅជ្រោយម្ខាងទៀតនៃសមុទ្រ ទល់មុខនឹងអ៊ីរ៉ង់។ នេះបើតាមការផ្សាយរបស់ទីភ្នាក់ងារព័ត៌មាន Tasnim ។ ដោយឡែក អ៊ីរ៉ង់ ក៏បានបើកផ្លូវអាកាសរបស់ខ្លួន អនុញ្ញាតឲ្យជើងយន្តហោះរបស់កាតា អាចហោះកាត់ប្រទេសខ្លួនដែរ។ បើតាមតួលេខ ក្នុងរយៈពេលប៉ុន្មានថ្ងៃចុងក្រោយនេះ ជើងហោះហើរអន្តរជាតិកាត់អ៊ីរ៉ង់ បានកើនឡើងដល់១៧%។
សូមរំលឹកថា កាលពីថ្ងៃចន្ទ ដើមសប្តាហ៍នេះ សង្រ្គាមការទូតបានផ្ទុះឡើង រវាងកាតា ជាមួយនិង ក្រុមប្រទេស៥ មានអារ៉ាប៊ីសាអូឌីត អេហ្ស៊ីប បារ៉ែន យេមែន និងអេមៀរ៉ាត់អារ៉ាប់រួម។ ប្រទេសទាំង៥ ដឹកនាំដោយអារ៉ាប៊ីសាអូឌីត និងមានលោកដូណាល់ ត្រាំ ជាអ្នករុញពីក្រោយនោះ បានចោទកាតា ថាបានទំនុកបំរុងគាំទ្រចលនាភេរវកម្ម មានដូចជាក្រុមជីហាតអង្គការរដ្ឋអ៊ីស្លាម ក្រុមអាល់កៃដា និងក្រុមចលនាបងប្អូនអ៊ីស្លាម ជាដើម។ បន្ថែមពីនេះ គេបាននាំគ្នាចោទកាតា ថាមានទំនោរកាន់ជើងអ៊ីរ៉ង់។ ប្រទេសទាំង៥ ដែលនៅព័ទ្ធជុំវិញកាតានេះ បានបិទព្រំដែនគ្រប់ច្រក ដើម្បីបំបាក់កាតា។ បើទោះបី ប្រទេសទាំង៥ខាងលើបានបណ្តេញមន្ត្រីទូត ក៏ដូចជាប្រជាជនកាតា ចេញពីប្រទេសគេ តែអាជ្ញាធរកាតា បានបញ្ជាក់ថា កាតា នឹងមិនឆ្លើយតបទៅវិញ ដោយការបណ្តេញប្រជាជននៃប្រទេសទាំង៥នោះទេ។
សូមបញ្ជាក់ដែរថា នៅពីក្រោយជំលោះដ៏ធំនេះ គឺមានបំបាំងនូវជម្លោះមួយទៀត រវាងអារ៉ាប៊ីសាអូឌីត និងអ៊ីរ៉ង់។ ប្រទេសតំណាងឲ្យនិកាយអ៊ីស្លាម ពីរខុសគ្នានេះ បានប្រឈមមុខដាក់គ្នា នៅគ្រប់សមរភូមិទាំងអស់ មិនថា នៅស៊ីរី យេមែន ឬអ៊ីរ៉ាក់។ អារ៉ាប៊ីសាអូឌីត ត្រូវការឲ្យកូនចៅក្នុងតំបន់ឈូងសមុទ្រពែក្ស មកនៅក្រោមបង្គាប់ខ្លួន ហើយស្អប់អ៊ីរ៉ង់ដូចខ្លួន។ ទាំងតួកគី ទាំងរុស្ស៊ី ក៏ដូចជាអ៊ីរ៉ង់ បានអំពាវនាវ ឲ្យប្រទេសទាំង៥ រួមគ្នា បន្ទន់ឥរិយាបថ ហើយស្វែងរកការចរចាជាមួយកាតា ដោយសន្តិវិធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ