អ៊ីស្រាអែលចង់ចាប់បង្អកអាហារដោយបង្ខំ ដល់អ្នកទោសប៉ាឡេស្ទីន ដែលធ្វើកូដកម្មអត់អាហារ
ច្បាប់ថ្មីរបស់អ៊ីស្រាអែល ដែលអនុញ្ញាតឲ្យអាជ្ញាធរអាចធ្វើការបង្ខំ បញ្ចុកចំណី ដល់អ្នកទោសណា ដែលធ្វើកូដកម្មអត់អាហារ អាចនឹងត្រូវអនុវត្តជាលើកដំបូង ទៅលើអ្នកទោសប៉ាឡេស្ទីនម្នាក់ ដែលបានធ្វើកូដកម្ម អត់អាហារអស់រយៈពេល ៥៥ថ្ងៃមកហើយ។ អ្នកទោសប៉ាឡេស្ទីន ដែលជាមេធាវីរូបនេះ ត្រូវបានតុលាការអ៊ីស្រាអែល សម្រេចឲ្យជាប់ឃុំឃាំងរដ្ឋបាល ដើម្បីរងចាំការជំនំជំរះក្តី តាំងតែពីខែវិច្ឆិកា ឆ្នាំ២០១៤ម្លេះ។ ការអត់អាហារ រយៈពេល៥៥ថ្ងៃ កំពុងតែធ្វើឲ្យជននេះ ប្រឈមមុខនឹងការស្លាប់ ក្នុងពេលដ៏ខ្លីខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
បុរសជនជាតិប៉ាឡេស្ទីន អាយុ៣០ឆ្នាំ ឈ្មោះ ម៉ូហាមេដ អាឡាន ជាមេធាវី ត្រូវបានតុលាការអ៊ីស្រាអែល ចោទពីបទថាជាប់ពាក់ព័ន្ធ នឹងក្រុមភេរវកម្មជីហាដរដ្ឋអ៊ីស្លាម។ បុរសនេះត្រូវបានអាជ្ញាធរអ៊ីស្រាអែល ចាប់ដាក់ឃុំ កាលពីខែវិច្ឆិកា ឆ្នាំ២០១៤ ដែលជាការឃុំឃាំងរដ្ឋបាល ដើម្បីរងចាំការជុំនំជំរះក្តី។ ដើម្បីបរិហារពីការឃុំឃាំងដ៏យូរអន្លាយ ដោយគ្មានសាលដីកាច្បាស់លាស់ ពីតុលាការ បុរសនេះ បានធ្វើកូដកម្មបង្អត់អាហារខ្លួនឯង អស់រយៈពេល ៥៥ថ្ងៃមកហើយ។
មន្ត្រីកាកបាទក្រហម និងមន្ត្រីអង្គការសិទ្ធិមនុស្ស ដែលបានចូលទៅពិនិត្យនៅក្នុងមន្ទីរឃុំឃាំង បានធ្វើការអំពាវនាវ ឲ្យគេអនុញ្ញាត ឲ្យក្រុមគ្រួសារបុរសនេះ បានចូលជួបសួរសុខទុក្ខ ព្រោះស្ថានភាពសុខភាពគាត់ កាន់តែដុនដាប អាចនឹងប្រឈមមុខ នឹងការស្លាប់ក្នុងពេលដ៏ខ្លីខាងមុខ។ បុរសជាប់ឃុំរូបនេះ ត្រូវបានបញ្ជូនទៅកាន់មន្ទីរពេទ្យ ដើម្បីទទួលការថែរក្សា តែទោះជាយ៉ាងណា សរីរាង្គទាំងស្រុង លែងទទួលជាតិទឹកទៅហើយ។
តុលាការអ៊ីស្រាអែល ដែលជាអ្នកទទួលខុសត្រូវលើការឃុំឃាំងនេះ បានប្រកាសពីចេតនារបស់ខ្លួន ថានឹងធ្វើការផ្តល់ចំណីដោយបង្ខំ ទៅដល់អ្នកជាប់ឃុំ ដើម្បីបញ្ចៀសកុំឲ្យស្លាប់។ បើសិនជាការពិតមែន នេះនឹងជាលើកដំបូងហើយ ដែលអាជ្ញាធរអ៊ីស្រាអែលធ្វើបែបនេះ ដោយអនុវត្តតាមច្បាប់ថ្មី ដែលទើបតែអនុម័តដោយសភាអ៊ីស្រាអែល។
ក្រុមគ្រូពេទ្យអ៊ីស្រាអែល ក៏ដូចជាសកម្មជនការពារសិទ្ធិមនុស្ស ទាំងអ៊ីស្រាអែល ទាំងប៉ាឡេស្ទីន បានធ្វើការបរិហារច្បាប់នេះ ដោយថាវាពុំមានលក្ខណៈមនុស្សធម៌ទាល់តែសោះ ព្រោះការបង្អកអាហារដោយបង្ខំ អាចបង្កជាគ្រោះថ្នាក់ ដល់ជីវិត ហើយការបង្ខំបង្អកចំណី ទៅលើអ្នកទោស គឺវាមិនខុស ពីការធ្វើទារុណកម្មនោះទេ។ ដោយឡែក សមាគមន៍អ្នកទោសប៉ាឡេស្ទីន បានធ្វើការបរិហារថា នេះមិនមែនជាលើកទីមួយទេ ដែលអ៊ីស្រាអែល បង្ខំបង្អកចំណីអ្នកទោសប៉ាឡេស្ទីន ដែលធ្វើកូដកម្មអត់អាហារ។ កន្លងមកមានអ្នកទោសប៉ាឡេស្ទីន បានស្លាប់ ៣នាក់រួចមកហើយ ដោយសារតែ ការចាប់បង្អកអាហារដោយបង្ខំ។
គួរបញ្ជាក់ថា ការឃុំឃាំងតាមបែបរដ្ឋបាល ត្រូវបានច្បាប់អ៊ីស្រាអែលអនុញ្ញាត ឲ្យធ្វើក្នុងរយៈពេល ៦ខែ ហើយអាចបន្តធ្វើរហូត ដ៏រាបណាមិនទាន់មានការសម្រេចពីតុលាការ ថាឲ្យដោះលែង។ នេះគឺជាមូលហេតុ ដែលបណ្តាលឲ្យអ្នកជាប់ឃុំប៉ាឡេស្ទីន ជាច្រើននាក់ ធ្វើកូដកម្មអត់អាហារ ដើម្បីបរិហារពីភាពអយុត្តិធម៌ និងអមនុស្សធម៌ នៅក្នុងប្រព័ន្ធតុលាការអ៊ីស្រាអែល។ បច្ចុប្បន្ននេះ មាន ជនជាតិប៉ាឡេស្ទីនចំនួន ៥៧០០នាក់ ដែលត្រូវអ៊ីស្រាអែល ចាប់ដាក់ឃុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ