អ៊ីស្រាអែលក្លាយជាប្រធានគណៈកម្មការច្បាប់របស់អង្គការសហប្រជាជាតិ
គិតចាប់ពីចូលជាសមាជិកអង្គការសហប្រជាជាតិមក នេះជាលើកទីមួយហើយដែលអ៊ីស្រាអែល បានក្លាយជាប្រធានគណៈកម្មការមួយ ក្នុងចំណោមគណៈកម្មការឯកទេសទាំង៦របស់អង្គការសហប្រជាជាតិ។ អ៊ីស្រាអែលដែលធ្លាប់ចង្អុលមុខនៅអង្គការសហប្រជាជាតិ ក្នុងសំណុំរឿងអាណានិគមកិច្ចលើប៉ាឡេស្ទីន និងនៅហ្កាហ្សា បានចារជោគជ័យថ្ងៃនេះក្នុងទំព័រប្រវត្តិសាស្ត្រជាតិ និងមានមោទនភាពចំពោះតួនាទីថ្មី តែបណ្តាប្រទេសអារ៉ាបនិងពិសេសប៉ាឡេស្ទីន កំពុងខកចិត្តយ៉ាងខ្លាំង។
ចុះផ្សាយនៅថ្ងៃ៖
ជាធម្មតាតួនាទីប្រធានគណៈកម្មការឯកទេសអង្គការសហប្រជាជាតិ ត្រូវបានជ្រើសតាំងប្តូរវេនជារៀងរាល់ឆ្នាំ តាមរយៈការស្រុះស្រួលគ្នាទេ ហើយប្រទេសណាក៏អាចដាក់បេក្ខភាពបានដែរ។ តែនៅលើកនេះ ឯកអគ្គរដ្ឋទូតអ៊ីស្រាអែល ប្រចាំអ.ស.ប. លោក ដានី ដានុន អាចក្លាយជាប្រធានគណៈកម្មការទី៦សម្រាប់មហាសន្និបាតលើកទី៧១បាន តាមរយៈការបោះឆ្នោតដោយសំងាត់ ជាមួយនឹងសំឡេងគាំទ្រ១០៩សំឡេងលើ១៩៣។
គណៈកម្មការទី៦ របស់អង្គការសហប្រជាជាតិនេះ បន្ទុកគ្រប់គ្រងផ្នែកច្បាប់ ជាស្ថាប័នពិគ្រោះ និងមានភារៈរៀបចំគម្រោងសេចក្តីសម្រេចចិត្តផ្សេងៗ មុននឹងដាក់ប្រគល់ទៅអង្គមហាសន្និបាតអង្គការសហប្រជាជាតិបោះឆ្នោតអនុម័ត។
ក្រៅអំពីបានសម្តែងមោទនភាពក្នុងនាមជាឥស្សរជនដំបូងរបស់អ៊ីស្រាអែលដែលបានក្លាយជាប្រធានគណៈកម្មការអចិន្ត្រៃយ៍មួយរបស់អង្គការសហប្រជាជាតិមក លោក ដានី ដានុន បានសន្យាធ្វើការជាមួយគ្រប់ប្រទេសជាសមាជិកដោយមិនរើសអើងអ្វីឡើយ និងបានសន្យាប្រើតួនាទីនេះ សម្រាប់ទៅពង្រឹងច្បាប់ភេរវកម្មរបស់អ.ស.ប. ព្រោះអ៊ីស្រាអែលបទពិសោធន៍ខ្លាំងបំផុតក្នុងផ្នែកនេះ។
ប៉ុន្តែតំណាងប៉ាឡេស្ទីន និងតំណាងក្រុមប្រទេសអារ៉ាបនៅអង្គការសហប្រជាជាតិមិនសុខចិត្តទេ ដោយយល់ថាតួនាទីរបស់អ៊ីស្រាអែលជាប្រភពនៃការប្រេះឆា និងជាសញ្ញាអវិជ្ជមាន។ អ៊ីស្រាអែលដែលមាននយោបាយធ្វើអាណានិគមកិច្ច រំលោភច្បាប់អន្តរជាតិ ប្រើកម្លាំងយោធាលើអ្នកទន់ខ្សោយ តែបែរជាអាចទទួលបានថានៈជាប្រធានគណៈកម្មការទី៦ ជាស្ថាប័នគ្រប់គ្រងច្បាប់ទៅវិញ ?! តំណាងប៉ាឡេស្ទីនបានព្រមានថានឹងបណ្តាក្រុមប្រទេសអារ៉ាបនឹងពិគ្រោះគ្នាបញ្ចេញប្រតិកម្ម និងបានរំលឹកថា នៅក្នុងគណៈកម្មការទី៦ ដែលដឹកនាំដោយអ៊ីស្រាអែលនេះ មានសមាជិកជាច្រើន (ដូចជា ប៉ាគីស្ថាន វ៉េណេស៊ុយអេឡា ហុងគ្រី ហ្សំប៊ី) ជាអ្នកគាំទ្របុព្វហេតុប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ