អ.ស.ប.៖ការកាន់កាប់របស់អ៊ីស្រាអែលគឺជាការទទួលខុសត្រូវលើតម្រូវការមនុស្សធម៍ប៉ាឡេស្ទីន
អ.ស.ប.ទើបចេញផ្សាយរបាយការណ៍មួយជាសាធារណៈនៅថ្ងៃពុធម្សិលមិញ ដែលបានគូសបញ្ជាក់ថា”ការអនុវត្តន៍នយោបាយនិងការកាន់កាប់របស់អ៊ីស្រាអែលនៅលើទឹកដីប៉ាឡេស្ទីនតាំងពីជាង៥០ឆ្នាំកន្លងមកនោះ ជាហេតុផលដ៏ចម្បងនៃតម្រូវការមនុស្សធម៌របស់ប្រជាជននៅក្នុងដែនដីកាន់កាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
យោងតាមការវាយតម្លៃរបស់លោក David Carden ដែលជានាយកការរិយាល័យទទួលបន្ទុកខាងកិច្ចការមនុស្សធម៌របស់អ.ស.ប.នៅក្នុងដែនដីប៉ាឡេស្ទីន ហៅកាត់ ថាOcha “ប្រភពដើមនៃវិបត្តិមនុស្សធម៌នៅក្នុងដែនដីកាន់កាប់គឺស្ថិតនៅលើកង្វះកិច្ចការពារសម្រាប់ប្រជាជនស៊ីវីលប៉ាឡេស្ទីន"។
ឆ្លៀតឱកាសខួប ៥០ឆ្នាំនៃការកាន់កាប់របស់អ៊ីស្រាអែលនៅលើដែនដីប៉ាឡេស្ទីន នាយក”Ocha” បានថ្លែងសង្កត់ទៀតថា”ដោយសារមានការប្រឈមមុខនឹងអំពើហិង្សា ការផ្លាស់ប្តូរទីលំនៅ ការរឹតបន្តឹងលើការទទួលបានសេវានានាឬកង្វះប្រាក់ចំណួលនិងការបំពានលើសិទ្ធិនានានោះហើយដែលជាផលប៉ះពាល់ដ៏ធ្ងន់ធ្ងរទៅលើប្រជាជនប៉ាឡេស្ទីនដែលសុទ្ធស៊ឹងជាអ្នកទន់ខ្សោយជាអាទិ៍កុមារប៉ាឡេស្ទីន។
ដូចកាលពីឆ្នាំ២០១៦ នៅតំបន់ Cisjordanie ចំនួនជនប៉ាឡេស្ទីនដែលបានផ្លាស់ទីលំនៅដោយហេតុតែការបំផ្លិចបំផ្លាញលំនៅឋានប៉ាឡេស្ទីនពីសំណាក់អ៊ីស្រាអែល បានកើនឡើងចំនួនដល់កំពូលចាប់តាំងពីឆ្នាំ២០០៩មក រហូតដល់១៦០១នាក់ក្នុងនោះកុមារ៧៥៩នាក់។ ក្នុងឆ្នាំដដែល អាជ្ញាធរអ៊ីស្រាអែល បានធ្វើការបំផ្លាញឬរិបអូសរចនាសម្ព័ន្ធនានាដែលសុទ្ធស៊ឺងជាជំនួយមនុស្សធម៌ គិតជាទឹកប្រាក់មានតម្លៃប្រមាណជាង៧៣ម៉ឹនដុល្លារ-នេះបើយោងតាមរបាយការណ៍របស់អ.ស.ប.ដដែល។
គួរបញ្ជាក់ថា វិបត្តិមនុស្សធម៌ ក៏ប៉ះពាល់ផងដែរនៅក្នុងតំបន់ហ្កាហ្សា ដោយនៅទីនេះ អត្រានៃភាពអត់ការងារធ្វើ មានកម្រិតខ្ពស់បំផុតនៅលើលោក ជាអាទិដោយសារតែ ការបិទខ្ទប់របស់អ៊ីស្រាអែលនៅក្នុងតំបន់នេះតាំងពីជាង១០ឆ្នាំកន្លងមកហើយ។ ការបិទខ្ទប់របស់អ៊ីស្រាអែលដែលបានបង្កនូវភាពដ៏ស្មុកស្មាញបំផុតដល់ការងាររបស់បុគ្គលិកអង្គការមនុស្សធម៌នានានៅក្នុងការចេញនិងចូលទៅក្នុងតំបន់នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ