ការប្រយុទ្ធគ្នា នៅហ្កាហ្សា សម្លាប់មន្រ្តីយោធាអ៊ីស្រាអែលម្នាក់ និងជនជាតិប៉ាឡេស្ទីន ៦នាក់។
ការផ្ទុះអាវុធដាក់គ្នា កាលពីថ្ងៃអាទិត្យម្សិលមិញ នៅក្នុងទឹកដីហ្កាហ្សា បានសម្លាប់ទាហានអ៊ីស្រាអែលម្នាក់ ហើយនិងជនជាតិប៉ាឡេស្ទីន ៦នាក់ ដែលនៅក្នុងនោះ ម្នាក់ ជាមេបញ្ជាការកងប្រដាប់អាវុធអ៊ីស្លាម ដែលជាគ្នីគ្នារបស់ក្រុមហាម៉ាស ប៉ាឡេស្ទីន។ ស្ថានការណ៍នេះបានធ្វើឲ្យនាយករដ្ឋមន្រ្តី អ៊ីស្រាអែល បិនចាមីន នេតាន់យ៉ាហ៊ូ ដែលត្រូវជួបទ្វេភាគី ជាមួយ ប្រធានាធិបតី បារាំង នៅទីក្រុងប៉ារីស នៅថ្ងៃចន្ទទី ១២ វិច្ឆិកា ត្រូវត្រលប់ចូលប្រទេសវិញ ជាបន្ទាន់។
ចុះផ្សាយនៅថ្ងៃ៖
ស្តាប់ - ០២:៤០
នៅក្នុងសេចក្តីប្រកាសព័ត៌មានពីទីក្រុងហ្ស៊េរុយសាឡិម កងទ័ពអ៊ីស្រាអែលបានបញ្ជាក់ថា ទាហានអ៊ីស្រាអែលម្នាក់ ដែលបានស្លាប់ក្នុងហេតុការណ៍ប្រយុទ្ធគ្នា នៅថ្ងៃអាទិត្យម្សិលមិញ មានឋានន្តរសក្តិជាវីរសេនីយ៍ទោ ក្នុងកងកម្លាំងពិសេសរបស់អ៊ីស្រាអែល។
តាមកងទ័ពអ៊ីស្រាអែល ការប៉ះទង្គិចអាវុធ ជាមួយ សកម្មជនប៉ាឡេស្ទីន បានកើតមានឡើង នៅក្នុងពេលដែលទាហានអ៊ីស្រាអែលបើកប្រតិបត្តិការរបស់ខ្លួន ក្នុងទឹកដីហ្កាហ្សា។ នៅក្នុងសេចក្តីថ្លែងការណ៍ចេញផ្សាយមុនកងទ័ពអ៊ីស្រាអែល ទៅទៀត កងពលEzzedine al Qassam សាខាមួយរបស់ចលនាហាម៉ាស ដែលគ្រប់គ្រងតំបន់ហ្កាហ្សា បានចាត់ទុក ការវាយប្រហាររបស់អ៊ីស្រាអែលថា "កំសាកបំផុត"។ តាមសកម្មជនប្រដាប់អាវុធអ៊ីស្លាមal Qassam កងកម្លាំងទ័ពពិសេសរបស់អ៊ីស្រាអែល បានបន្លំខ្លួន ចូលក្នុងទឹកដីហ្កាហ្សា តាមរយៈរថយន្តស៊ីវិលមួយ កាលពីថ្ងៃអាទិត្យ។ នៅអំឡុងពេលផ្ទុះអាវុធដាក់គ្នា កងកម្លាំងពិសេសអ៊ីស្រាអែលបានទទួលជំនួយបន្ថែមពីយន្តហោះចម្បាំងរបស់អ៊ីស្រាអែល ដែលបានបាញ់បំផ្លាញផ្ទះ និងសម្លាប់ជនជាតិប៉ាឡេស្ទីន ៦នាក់ ដែលនៅក្នុងនោះ ៤នាក់ជាសមាជិករបស់កងពលអ៊ីស្លាម សាខារបស់ក្រុមហាម៉ាស។
ភាគីអ៊ីស្រាអែលវិញមិនបានបញ្ជាក់តបទៅនឹងការចោទប្រកាន់របស់ហាម៉ាសនោះទេ ប៉ុន្តែ គ្រាន់តែអះអាងថា នៅក្រោយការប្រយុទ្ធគ្នា នៅថ្ងៃអាទិត្យ មានគ្រាប់រ៉ុកកែត ១៦គ្រាប់ត្រូវបានបាញ់ចេញពីទឹកដីភាគខាងត្បូងហ្កាហ្សាសំដៅទឹកដីអ៊ីស្រាអែល។ ការប៉ះទង្គិចលើកនេះ កើតមាន នៅកាលៈទេសៈ ដែលការប្រឈមមុខដាក់គ្នាផ្នែកអាវុធរវាងក្រុមហាម៉ាសប៉ាឡេស្ទីន និងអ៊ីស្រាអែលទើបតែបានស្ងាត់ ថមថយចុះ នៅមួយរយៈចុងក្រោយនេះ។ កាលពីថ្ងៃ សៅរ៍ នាយករដ្ឋមន្រ្តីអ៊ីស្រាអែល លោកបិនចាមីន នេតាន់យ៉ាហ៊ូ ទើបតែបានអនុញ្ញាត បើកភ្លើងខៀវ ឲ្យប្រទេសកាតាផ្តល់ជំនួយ ១៥លានដុល្លារ សម្រាប់ការបើកប្រាក់ខែឲ្យមន្រី្តរដ្ឋការ នៅក្នុងតំបន់ហ្កាហ្សា។ នាយករដ្ឋមន្រ្តីអ៊ីស្រាអែលធ្លាប់បានលើកឡើងថា លោកសម្រេចចិត្តយ៉ាងដូច្នេះ ដើម្បី ធានាភាពស្ងៀមស្ងាត់ ហើយនិងជៀសវាងវិបត្តិមនុស្សធម៌ ក្នុងទឹកដីកាហ្សារបស់ប៉ាឡេស្ទីន។
ប៉ុន្តែ គេព្រួយបារម្ភថា ការផ្ទុះអាវុធ រហូត ដល់សម្លាប់មន្រ្តីជាន់ខ្ពស់អ៊ីស្រាអែល នៅថ្ងៃអាទិត្យម្សិលមិញ នឹងជំរុញឲ្យអ៊ីស្រាអែលបើកប្រតិបត្តិការ យោធា ទ្រង់ទ្រាយធំ ដើម្បីវាយប្រហារទៅលើចលនាហាម៉ាស ក្នុងទឹកដីហ្កាហ្សា។ សូមបញ្ជាក់ថា តាំងពីខែមីនាឆ្នាំនេះ ការបាញ់ប្រហាររបស់អ៊ីស្រាអែល ទាំងជើងគោក និងតាមយន្តហោះចម្បាំងបានសម្លាប់ប្រជាជនប៉ាឡេស្ទីន យ៉ាងតិច ២២៧នាក់។ អ៊ីស្រាអែលដែលមានទាហានពីរនាក់ស្លាប់នៅក្នុងការប្រឈមមុខដាក់គ្នាជាមួយ ប៉ាឡេស្ទីន បាននិយាយការពារប្រតិបត្តិការយោធារបស់ខ្លួនថា ធ្វើឡើងដើម្បីប្រឆាំងតបនឹងក្រុមហាម៉ាសប៉ាឡេស្ទីន ដែលបានបាញ់បំផ្លោងគ្រាប់រ៉ុកកែតសំដៅទឹកដីអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ