អ៊ីស្រាអែល៖លោកនេតាន់យ៉ាហ៊ូអាចនឹងចោទប្រកាន់ក្នុងរឿងពុករលួយនាសម័យឃោសនាបោះឆ្នោតសភា
នៅក្នុងប្រទេសអ៊ីស្រាអែល លោកនាយករដ្ឋមន្រ្តីនេតាន់យ៉ាហ៊ូដែលកំពុងជាប់អង្កេតក្នុងរឿងពុករលួយចំនួន ៣ករណីអាចនឹងរងការចោទប្រកាន់នៅក្នុងសម័យឃោសនាបោះឆ្នោតសភាដែលគ្រោងរៀបចំនៅថ្ងៃទី៩ មេសាខាងមុខ។ ព័ត៌មានមួយនេះកំពុងធ្វើឲ្យលោកនេតាន់យ៉ាហ៊ូដែលបានឈរឈ្មោះជាថ្មីមានការបារម្ភជាពន់ពេក ហើយក្រុមមេធាវីរបស់លោកបានស្នើរដ្ឋអាជ្ញាឲ្យពន្យារការសម្រេចចិត្តរហូតដល់ថ្ងៃរៀបចំបោះឆ្នោត។ តែសំណើមួយនេះត្រូវបានតុលាការច្រានចោល។
ចុះផ្សាយនៅថ្ងៃ៖
ស្តាប់ - ០១:៤៦
គេនៅមិនទាន់ដឹងថា បើលោកនេតាន់យ៉ាហ៊ូនឹងទទួលការចោទប្រកាន់ក្នុងរឿងអាស្រូវពុករលួយ តើនឹងមានផលប៉ះពាល់អ្វីខ្លះលើលោកសម្រាប់ការបោះឆ្នោតសភានាថ្ងៃទី៩ មេសាខាងមុខ?។ តែនាយករដ្ឋមន្រ្តីផុតអាណត្តិ និងដែលបានឈរឈ្មោះជាថ្មីរូបនេះកំពុងបារម្ភពីការបាត់បង់សម្លេងគាំទ្រ ប្រសិនបើមានការចោទប្រកាន់លើលោកមែននោះ។ ក្តីបារម្ភយ៉ាងដូចនេះហាក់កំពុងបន្តមានជាមួយនឹងការឡើងសម្លេងរបស់គូប្រជែងដ៏សំខាន់ម្នាក់របស់លោក គឺអតីតមេបញ្ជាការកងទ័ពលោកបេននី ហ្កង់។ អ៊ីចឹងហើយបានជានៅសប្តាហ៍មុន ក្រុមមេធាវីរបស់លោកនេតាន់យ៉ាហ៊ូបានជួបរដ្ឋអាជ្ញាលោក Avichai Mandelblit ដែលជាឥស្សរជនម្នាក់គត់មានសិទ្ធិអំណាចកំណត់វាសនាផ្លូវច្បាប់ចំពោះលោកនេតាន់យ៉ាហ៊ូ។
នៅក្នុងជំនួបនោះ ក្រុមមេធាវីរបស់លោកនេតាន់យ៉ាហ៊ូបានស្នើរដ្ឋអាជ្ញាកុំឲ្យសម្រេចចិត្តនៅមុនការបោះឆ្នោត។ អ្វីដែលក្រុមមេធាវីបារម្ភ គឺខ្លាចលោក Avichai Mandelblit សម្រេចចិត្តក្នុងសម័យឃោសនាបោះឆ្នោត។ តែសំណើមួយនេះត្រូវបានរដ្ឋអាជ្ញាច្រានចោលកាលពីថ្ងៃសុក្រ ទី១ កុម្ភៈ។ លោក Avichai Mandelblit បានយល់ឃើញថា វាជាផលប្រយោជន៍សាធារណៈដែលការសម្រេចចិត្តត្រូវធ្វើឡើងនៅមុនការបោះឆ្នោត និងថា លោកមានការទទួលខុសត្រូវក្នុងការបិទបញ្ចប់សំណុំរឿងមួយនេះឲ្យបានឆាប់បំផុតដែលអាចធ្វើទៅបាន។ ចំណែកលោកនេតាន់យ៉ាហ៊ូបានថ្លែងតាំងពីថ្ងៃព្រហស្បតិ៍ ទី៣១ មករាដោយចោទរូបរដ្ឋអាជ្ញាពីបទបានច្រានចោលសំណើរបស់ក្រុមមេធាវីលោក។
សម្រាប់លោកនេតាន់យ៉ាហ៊ូ លោកបានមើលឃើញពីទង្វើរបស់លោករដ្ឋអាជ្ញា Avichai Mandelblit ដែលធ្វើឡើងតាមគំនាបពីក្រុមឆ្វេងនិយម និងពីប្រព័ន្ធផ្សព្វផ្សាយព័ត៌មាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ