ហេតុអ្វីបានជាអង្គការសម្ព័ន្ធអារ៉ាប់សម្រេចបង្កើតឲ្យមានកម្លំាងយោធាអារ៉ាប់រួមនៅក្នុងតំបន់?
ថ្ងៃអាទិត្យ ទី២៩ មីនានេះ ជាថ្ងៃទី២ និងជាថ្ងៃចុងក្រោយនៃជំនួបកំពូលរបស់អង្គការសម្ព័ន្ធអារ៉ាប់នៅក្នុងទីក្រុងស្ហាមែល ឆែកក្នុងប្រទេសអេហ្ស៊ីប។ មានសេចក្តីសម្រេចចិត្តជាច្រើនដែលជំនួបកំពូលអនុម័ត ពិសេសគឺការបង្កើតឲ្យមានកម្លំាងពហុជាតិអារ៉ាប់មួយសម្រាប់ការពារសន្តិសុខ សុវត្ថិភាព និងផលប្រយោជន៍របស់ប្រទេសអារ៉ាប់នៅក្នុងតំបន់ ពោលគឺជាកម្លំាងអន្តរាគមន៍រហ័ស។ ការបង្កើតឲ្យមានកម្លំាងពហុជាតិអារ៉ាប់មួយនៅក្នុងតំបន់បានធ្វើឡើង ចំពេលដែលប្រទេសអារ៉ាប៊ីសាអូឌីត រួមជាមួយប្រទេសជិត ១០ ទៀតកំពុងបន្តវាយប្រហារផ្លូវអាកាសលើពួកឧទ្ទាមហ៊ូទី្សក្នុងប្រទេសយេម៉ែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៧
អង្គការសម្ព័ន្ធអារ៉ាប់បានប្រសូត្រឡើងក្នុងថ្ងៃទី២២ មីនា ឆ្នំា ១៩៤៥ ជាមួយនឹងសមាជិកចំនួន ៧ប្រទេស តែមកដល់សព្វថ្ងៃ ចំនួនសមាជិកបានកើនដល់ ២២ប្រទេស។ គិតមកដល់ពេលបច្ចុប្បន្ន អង្គការអារ៉ាប់មួយនេះមានអាយុ ៧០ឆ្នំា។ ក្នុងរយៈពេល ៧០ឆ្នំាកន្លងទៅ អង្គការសម្ព័ន្ធអារ៉ាប់ក៏ធ្លាប់បានគិតគូរពីគម្រោងស្រដៀងគ្នានេះដែរ តែត្រូវបានខកខានដោយសារតែភាពខុសគ្នានៅក្នុងរង្វង់ប្រទេសសមាជិកទាក់ទងនឹងនិន្នាការនយោបាយ និងសាសនា។ ទន្ទឹមគ្នានេះ បរិបទពិភពលោកកាលពី ៧០ឆ្នំាមុន ក៏មិនដូចគ្នានឹងបរិបទពិភពលោកបច្ចុប្បន្ននេះដែរ ពិសេសនៅតំបន់បជ្ឈិមបូព៌ា។
តំាងពីក្រោយមហាភេរវកម្មថ្ងៃ១១ កញ្ញា ២០០១ នៅសហរដ្ឋមេរិកមក ពិភពលោកបាន និងកំពុងបន្តប្រឈមមុខនឹងការគំរាមកំហែងពីអង្គការភេរវនិយមចំនួនពីរ គឺអង្គការអាល់កៃដា និងអង្គការរដ្ឋអ៊ីស្លាម ហើយគឺនៅតំបន់ដើមបូព៌ាដែលជាជង្រុក ជាប្រភព និងជាកន្លែងដែលកំពុងប្រឈមមុខខ្លាំងជាងគេ។ គឺនៅក្នុងតំបន់ដើមបូព៌ានោះឯងដែលសង្រ្គាមសាសនាអ៊ីស្លាមកំពុងពុះកញ្ជ្រោលខ្លំាងរវាងក្រុមនិកាយឈីអ៊ីត និងក្រុមនិកាយស៊ុយនីត។ ទំាងនេះ គឺហេតុផលដែលបានជម្រុញឲ្យអង្គការសម្ព័ន្ធអារ៉ាប់ប្រសូត្រចេញនូវកម្លំាងបង្រួបបង្រួមអារ៉ាប់មួយនៅពេលនេះ។
មានកិច្ចការជាច្រើនដែលត្រូវបន្តធ្វើ
រហូតមកដល់ពេលនេះ គេនៅមិនទាន់ដឹងពីរចនាសម្ព័ន្ធលម្អិតរបស់កម្លំាងយោធាអារ៉ាប់រួមនោះទេ ព្រោះនៅមានកិច្ចការជាច្រើនទៀតដែលប្រទេសសមាជិកនីមួយៗត្រូវលើកយកទៅជជែកពិភាក្សាគ្នាជាបន្តនៅថ្ងៃខាងមុខ។ អ្វីដែលប្រមុខរដ្ឋ និងប្រមុខរដ្ឋាភិបាលទំាង ២២ប្រទេសជាសមាជិកនៅក្នុងអង្គការសម្ព័ន្ធអារ៉ាប់បានសម្រេចពេលនេះ គឺគ្រាន់តែជាគ្រោងឆ្អឹងប៉ុណ្ណោះ ចំណែកតួដែលត្រូវផ្គុំឲ្យចេញជារូបរាងយ៉ាងណានោះ គឺជាភារកិច្ចរបស់ថ្នាក់រដ្ឋមន្រ្តីក្រសួងការពារជាតិ។ សេចក្តីជូនដំណឹងមួយពីជំនួបកំពូលឲ្យដឹងថា ការចូលរួមរបស់ប្រទេសសមាជិកនៅក្នុងអនាគតកម្លំាងយោធាអារ៉ាប់រួមនឹងត្រូវធ្វើឡើងដោយការស្ម័គចិត្ត មានន័យថា ប្រទេសណាចង់ចូលរួមក៏ចូលរួមទៅ មិនចូលរួមក៏ហីទៅ។
យ៉ាងណាក៏ដោយ គេត្រូវរង់ចំាមើលការពិតជាក់ស្តែងនៅពេលខាងមុខ ព្រោះបទពិសោធន៍ស្រដៀងគ្នានៅក្នុងអតីតកាលធ្លាប់ទទួលបានបរាជ័យរួចហើយ។ គួរបញ្ជាក់ជូនថា ការបង្កើតឲ្យមានកម្លំាងយោធាអារ៉ាប់រួមមួយនៅក្នុងតំបន់ពេលនេះ គឺជាគំនិតផ្តួចផ្តើមដំបូងរបស់លោកប្រធានាធិបតីអេហ្ស៊ីបអាប់ដែល ហ្វាតា អាល់ស៊ីស៊ី។ លោកអាល់ស៊ីស៊ីដែលបារម្ភពីកំណើនឥទ្ធិពលរបស់ចលនាភេរវនិយម ពិសេសអង្គការរដ្ឋអ៊ីស្លាមនៅប្រទេសស៊ីរី ឬអ៊ីរ៉ាក់ និងដែលពួកជ្រុលនិយមនេះបាន និងកំពុងបន្តឆ្លងវាតទីចូលក្នុងប្រទេសលីប៊ី និងតំបន់ស៊ីណៃក្នុងប្រទេសអេហ្ស៊ីប។
យេម៉ែនកំពុងក្លាយជាសមរភូមិប្រជែងកម្លំាងរវាងអារ៉ាប៊ីសាអូឌីត និងអ៊ីរ៉ង់?
កម្លំាងយោធាអារ៉ាប់រួមដែលអង្គការសម្ព័ន្ធអារ៉ាប់សម្រេចបង្កើតពេលនេះ គឺមិនដូចគ្នានឹងកម្លំាងដែលប្រទេសអារាប៊ីសាអូឌីតកំពុងដឹកនំាជាមួយកម្លំាងរបស់ប្រទេសជិត ១០ ទៀតវាយប្រហារផ្លូវអាកាសលើពួកឧទ្ទាមហ៊ូទី្សក្នុងប្រទេសយេម៉ែននោះទេ។ អ្វីដែលអារ៉ាប៊ីសាអូឌីតកំពុងធ្វើនេះ គឺជាគំនិតផ្តួចផ្តើងឡើងដោយរដ្ឋាភិបាលអារ៉ាប៊ីសាអូឌីតតែម្នាក់ឯង និងក្នុងកាលៈទេសៈបន្ទាន់មួយប៉ុណ្ណោះ ពោលក្នុងពេលដែលពួកឧទ្ទាមហ៊ូទី្សកំពុងវាតទីក្តាប់អំណាចនៅយេម៉ែនដែលអារ៉ាប៊ីសាអូឌីតចាត់ទុកជារឿងគ្រោះថ្នាក់ចំពោះសន្តិសុខខ្លួន។ មួយវិញទៀត ក្រៅពីប្រទេសអារ៉ាប់ ក៏មានប្រទេសអាស៊ីប៉ាគីស្ថាន និងប្រទេសអាហ្រ្វិកស៊ូដង់ និងម៉ារ៉ុក។
ចំណែក កម្លំាងយោធាអារ៉ាប់រួម គឺជាកម្លំាងអចិន្រ្តៃយ៍មួយចូលរួមតែពីក្រុមប្រទេសអារ៉ាប់ និងសម្រាប់តែការពារសន្តិសុខ និងសន្តិភាពនៅក្នុងសមាជិកខ្លួនប្រឈមនឹងការគំរាមកំហែងពីខាងក្រៅ។ គេអាចប្រៀបប្រដូចកម្លំាងយោធាអារ៉ាប់រួមពេលនេះទៅនឹងកម្លំាងរបស់អង្គការអូតង់។
ជាការពិត កម្មវត្ថុនៃការវាយប្រហារនៅយេម៉ែនពីសំណាក់អារ៉ាប៊ីសាអូឌីត គឺសំដៅស្តារស្ថានភាពនៅយេម៉ែនឡើងវិញ តែកម្មវត្ថុនេះក៏មានបង្កប់ដោយយុទ្ធសាស្រ្តតំបន់មួយទៀត គឺព្រមានទប់នឹងការពង្រីកឥទ្ធិពលរបស់អ៊ីរ៉ង់និកាយឈីអ៊ីតទប់នឹងអារ៉ាប៊ីសាអូឌីតនិកាយស៊ុយនីត។ ខណៈនេះ អ៊ីរ៉ង់នៅមិនបានបញ្ចេញប្រតិកម្មអ្វីធំដុំទេ តែគេក៏មិនច្បាស់ថា អ៊ីរ៉ង់នឹងបន្តធ្វើជាទស្សនិកជនចំពោះទង្វើរបស់អារ៉ាប៊ីសាអូឌីតនាពេលនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ