អារ៉ាប៊ីសាអូឌីតស្នើឲ្យផ្អាកសង្រ្គាមរយៈពេល ៥ថ្ងៃនៅយេម៉ែនដើម្បីដឹកជំនួយទៅជួយជនស៊ីវិល
នៅថ្ងៃព្រហស្បតិ៍ ទី៧ ឧសភា ប្រទេសអារ៉ាប៊ីសាអូឌីតដែលកំពុងដឹកនំាកម្លំាងសម្ព័ន្ធវាយប្រហារផ្លូវអាកាសលើពួកឧទ្ទាមហ៊ូទី្សក្នុងប្រទេសយេម៉ែនបានស្នើឲ្យផ្អាកប្រតិបត្តិសឹករយៈពេល ៥ថ្ងៃ។ គោលដៅ គឺដើម្បីអនុញ្ញាតឲ្យអង្គការមនុស្សធម៌នានាអាចដឹកជញ្ជូនជំនួយមនុស្សធម៌ទៅជួយប្រជាជនយេម៉ែនដែលកំពុងរងគ្រោះខ្វះស្បៀងអាហារដោយសារតែសង្រ្គាម។ សំណើរបស់ទីក្រុងរីយ៉ាដយ៉ាងដូច្នេះបានធ្វើឡើងតាមសេចក្តីស្នើសុំរបស់លោករដ្ឋមន្រ្តីការបរទេសអាមេរិកចន ឃ៊ែរីដែលបានទៅបំពេញទស្សនកិច្ចក្នុងប្រទេសអារ៉ាប៊ីសាអូឌីតនៅថ្ងៃព្រហស្បតិ៍ ទី៧ ឧសភា។ ខណៈនេះ នៅមិនទាន់មានចម្លើយតបយ៉ាងម៉េចពីចលនាឧទ្ទាមហ៊ូទី្សចំពោះសំណើរបស់ប្រទេសអារ៉ាប៊ីសាអូឌីតទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
គឺនៅក្នុងសន្និសីទកាសែតរួមគ្នាជាមួយលោកប្រមុខការទូតអាមេរិកចន ឃ៊ែរីក្នុងទីក្រុងរីយ៉ាដដែលលោកប្រមុខការទូតអារ៉ាប៊ីសាអូឌីតអាដែល អាល់យូប៊ែរបានថ្លែងឲ្យដឹងថា អារ៉ាប៊ីសាអូឌីតបានស្នើឲ្យមានបទឈប់បាញ់រយៈពេល ៥ថ្ងៃនៅតំបន់ខ្លះក្នុងប្រទេសយេម៉ែនដើម្បីអនុញ្ញាតឲ្យមានការដឹកជំនួយទៅជួយជនស៊ីវិលដែលកំពុងរងគ្រោះដោយសារសង្រ្គាម។ តែលោកអាល់យូប៊ែរបានយល់ឃើញថា បទឈប់បាញ់នឹងអាចធ្វើទៅបាន លុះត្រាណាតែគ្រប់ភាគីទំាងអស់សុខចិត្តទទួលយក និងគោរពឲ្យបានត្រឹមត្រូវ ពិសេសគឺភាគីឧទ្ទាមហ៊ូទី្ស និងក្រុមយុទ្ធជនប្រដាប់អាវុធដែលស្មោះស្ម័គ្រនឹងអតីតប្រធានាធិបតីយេម៉ែនធ្លាក់ពីអំណាច។
ចំណែកលោកប្រមុខការទូតអាមេរិកចន ឃ៊ែរីបានបញ្ជាក់ច្បាស់ៗថា បទឈប់បាញ់អាចនឹងធ្វើបាន គឺវាអាស្រ័យទំាងស្រុងលើឆន្ទៈរបស់ពួកឧទ្ទាមហ៊ូទី្ស ព្រមទំាងឆ្លៀតជម្រុញឲ្យពួកនេះ និងភាគីពាក់ព័ន្ធផ្សេងទៀតទទួលយកសំណើរបស់ប្រទេសអារ៉ាប៊ីសាអូឌីត។ ក្រៅពីធ្វើការអំពាវនាវដោយផ្ទាល់ចំពោះពួកឧទ្ទាម លោកឃ៊ែរីក៏បានឆ្លៀតអំពាវនាវដល់អ្នកដែលបានចេញមុខគំាទ្រពួកឧទ្ទាមហ៊ូទី្សឲ្យប្រើឥទ្ធិពលរបស់ខ្លួនដើម្បីកុំឲ្យឱកាសដ៏ល្អនេះកន្លងផុតទៅឲ្យសោះ។ ត្រង់ចំណុចនេះ លោកឃ៊ែរីបានលើកឡើងពីក្តីបារម្ភរបស់អាមេរិកចំពោះសកម្មភាពបង្កអស្ថិរភាពនៅក្នុងតំបន់ពីសំណាក់ប្រទេសអ៊ីរ៉ង់។
ទន្ទឹមគ្នានេះ និងដើម្បីបង្ហាញពីជំហរគំាទ្ររបស់អាមេរិកចំពោះសម្ព័ន្ធមិត្តអារ៉ាប៊ីសាអូឌីត លោកឃ៊ែរីបានប្រាប់ឲ្យដឹងពីការដែលអាមេរិក និងសហគមន៍អន្តរជាតិនឹងបន្តប្រឹងប្រែងទប់ស្កាត់ការហូរអាវុធចូលក្នុងប្រទេសយេម៉ែន ដោយអនុលោមតាមសេចក្តីសម្រេចចិត្តរបស់ក្រុមប្រឹក្សាសន្តិសុខអនុម័តនាខែមេសាកន្លងទៅ។ ដោយឡែក លោកប្រមុខការទូតអាមេរិកបានច្រានចោលចំពោះគំនិតនៃការបើកប្រតិបត្តិការវាយលុកផ្លូវគោកនៅក្នុងប្រទេសយេម៉ែន។ យោងតាមលោកឃ៊ែរី អាមេរិក និងអារ៉ាប៊ីសាអូឌីតមិនបានលើកឡើងពីបញ្ហានេះទេ និងថា អ្វីដែលអាមេរិកកំពុងបារម្ភខ្លំាងជាងគេនោះ គឺជោគវាសនារបស់ជនស៊ីវិលដែលកំពុងជាប់កុននៅក្នុងសង្រ្គាមសព្វថ្ងៃ។ ខណៈនេះ នៅមិនទាន់មានចម្លើយតបយ៉ាងម៉េចពីចលនាឧទ្ទាមហ៊ូទី្សចំពោះសំណើរបស់ប្រទេសអារ៉ាប៊ីសាអូឌីតទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ