អារ៉ាប៊ីសាអ៊ូឌីត បញ្ជូនទាហ៊ានទៅក្រុងអាឌែន ប្រទេសយេម៉ែន
បន្ទាប់ពីបានដឹកនាំការវាយប្រហារតាមផ្លូវអាកាស ទៅលើប្រទេសយេម៉ែន ចាប់តាំងពីថ្ងៃទី២៦មីនា កន្លងមក អារ៉ាប៊ីសាអ៊ូឌីត ទើបបានបញ្ជូនទាហានទៅដល់ទីក្រុងអាឌែន ដើម្បីវាយបង្រាប ក្រុមឧទ្ទាមហ៊ូទីស នៅលើដីបន្ថែមទៀត។ ទោះបីជាមិនទាន់មានការអះអាងជាផ្លូវការក៏ដោយ ក៏ដំណឹងនេះ មិនបានធ្វើឲ្យគេ ភ្ញាក់ផ្អើលឡើយ ព្រោះអារ៉ាប៊ីសាអ៊ូឌីត ធ្លាប់បានប្រាប់ហើយថា បើចាំបាច់ គេនឹងបញ្ជូនទ័ពជើងគោកទៅទៀត ដើម្បីវាយកម្ទេចក្រុមឧទ្ទាមហ៊ូទីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
គ្មានអ្វីអាចបញ្ឈប់ អារ៉ាប៊ីសាអ៊ូឌីតបានទេ។ ដូចការដែលធ្លាប់បានស្មានទុក អារ៉ាប៊ីសាអ៊ូឌីត បានបញ្ជូនកម្លាំងទ័ពថ្មើរជើង ចូលទៅដល់ទីក្រុងកំពង់ផែអាឌែន នៅថ្ងៃអាទិត្យទី ៣ ឧសភា នេះបើតាមការរាយការណ៍ប្រាប់ អ្នកយកព័ត៌មានបារាំង របស់អ្នកនាំពាក្យយោធាយេម៉ែន ម្នាក់ ដោយសុំមិនបញ្ចេញឈ្មោះ។ ដូចគ្នាដែរ កាសែតយេម៉ែនAden Al Ghad បានចុះផ្សាយផងដែរថា នៅថ្ងៃអាទិត្យម្សិលមិញនេះ មានទាហាន ជាង៤០នាក់ ដែលមកពីអារ៉ាប៊ីសាអ៊ូឌីត បានមកដល់ក្រុងអាឌែន ដើម្បីជួយប្រយុទ្ធ ខាងកងកម្លាំងរដ្ឋាភិបាលយេម៉ែន និងក្រុមប្រជាតស៊ូ ដែលកំពុងតែ តដៃយ៉ាងស្វិតស្វាញ ជាមួយពួកឧទ្ទាមហ៊ូទីស។
តាមរយៈប្រភពព័ត៌មានផ្សេងទៀត បានបញ្ជាក់ថា ទាហាន ដែលទើបធ្វើដំណើរមកដល់នេះ ភាគច្រើនជាទាហានក្នុងជួរកងទ័ព អារ៉ាប៊ីសាអ៊ូឌីត និងសាធារណរដ្ឋអារ៉ាប់រួម ប៉ុន្តែមានដើមកំណើតយេម៉ែន។ ទាហានដែលទើបមកដល់ បានចូលទៅសមរភូមិប្រយុទ្ធភ្លាមៗ នៅតំបន់យុទ្ធសាស្ត្រ ជុំវិញព្រលានយន្តហោះក្រុងអាឌែន ដែលទីនោះហើយ បានក្លាយជាទីលានប្រយុទ្ធគ្នាស្លាប់រស់ ម្ខាងគឺក្រុមឧទ្ទាមហ៊ូទីស រួមជាមួយក្រុមអ្នកស្មោះស្ម័គ្រ នឹងអតីតលោកប្រធានាធិបតី អាប់ដាឡា សាឡេស និងម្ខាងទៀត គឺក្រុមស៊ុនីត ដែលស្មោះស្ម័គ្រនឹងលោកប្រធានាធិបតី ហាឌី។
មិនត្រឹមតែមិនព្រមផ្អាកការទម្លាក់គ្រាប់បែក ទៅតាមការអំពាវនាវ របស់អង្គការសហប្រជាជាតិ ក៏ដូចជាអង្គការមនុស្សធម៌ផ្សេងទៀតហើយ ឥឡូវពេលនេះ អារ៉ាប៊ីសាអ៊ូឌីត បានទាំងថែមបញ្ជូនទ័ពជើងគោក ទៅយេម៉ែនទៀត។ នេះសបង្ហាញឲ្យឃើញថា អារ៉ាប៊ីសាអ៊ូឌីត គ្មានចេតនា ទម្លាក់អាវុធ និងបញ្ចុះបញ្ចូលឲ្យក្រុមបដិបក្សនៅយេម៉ែន ចូលតុចរចាគ្នា ដោយសន្តិវិធីនោះទេ។
អង្គការសហប្រជាជាតិ តាមរយៈបេសកជនពិសេសថ្មី ដែលទើបតែត្រូវបានតែងតាំង នៅមិនទាន់ធ្វើអ្វីបានជាដុំកំភួននៅឡើយទេ។ ស្របពេលជាមួយគ្នានេះ អ្នកដែលរងទុក្ខធ្ងន់ គឺប្រជាជនស្លូតត្រង់ នៅយេម៉ែន ដែលស្លាប់ ដោយគ្រាប់បែក គ្រាប់កាំភ្លើង របួស ខ្វះស្បៀងអាហារ ព្រោះការនាំចេញនាំចូល ត្រូវបានកាត់ផ្តាច់ ទាំងស្រុង ជិតពីរខែមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ